Maharashtra Breaking News LIVE : मुख्यमंत्री देवेंद्र फडणवीस पंतप्रधान नरेंद्र मोदी यांच्यात चर्चा

पुणे विमानतळाच्या जवळ असलेल्या एरो मॉल येथे कॅब चालकाला मारहाण करण्यात आली. काल रात्री मारहाण झालेला व्हिडीओ आता समोर आला आहे. या हल्ल्यानंतर भारतीय मिग कामगार मंचाच्या कॅब चालकांनी काम बंद आंदोलन केले आहे.

एनआयएने राज्यातील भिवंडी आणि अमरावती या दोन शहरांत छापा टाकून एका, एका तरुणाला ताब्यात घेतले आहे. अमरावतीमधून ताब्यात घेतलेला तरुण पाकिस्तानी संघटनेच्या संपर्कात होता. त्याची कसून चौकशी सुरु केली आहे…सविस्तर वाचा…

मुख्यमंत्री देवेंद्र फडणवीस यांनी पंतप्रधान नरेंद्र मोदी यांची दिल्लीत भेट घेतली. यावेळी नरेंद्र मोदी यांनी फडणवीस यांना सांगितले की,  महाराष्ट्र महत्त्वाचे राज्य आहे. या राज्याला गतीशील ठेवणे गरजेचे आहे. केंद्र सरकार त्यासाठी पूर्ण सहकार्य द्यायला तयार आहे.

कोल्हापुरातील काळमवाडी धरणाची गळती काढण्याच्या कामाला अखेर मुहूर्त मिळाला आहे. धरणाच्या गळती काढण्याचे काम जानेवारी महिन्यापासून केले जाणार आहे. गळती काढण्याचे काम मिळालेल्या ठेकेदार कंपनीकडून तयारीला सुरवात झाली आहे.

अदानी कंपनीच्या नवीन विद्युत मीटरच्या विरोधात शिवसेना उद्धव बाळासाहेब ठाकरे पक्षाचे अंधेरी एमआयडीसी अदानी इलेक्ट्रिसिटी कार्यालयाबाहेर आंदोलन केले. शिवसेनेचे अनेक नेते आंदोलनात सहभागी झाले.

मुख्यमंत्री देवेंद्र फडणवीस हे पंतप्रधान नरेंद्र मोदींच्या निवासस्थानी दाखल झाले आहेत. फडणवीस मोदींची भेट घेणार आहेत. याआधी उपमुख्यमंत्री अजित पवार यांनी संसदेत अमित शाह यांची भेट घेतली.

परभणी- साडेअकरा वाजले तरी परभणीची बाजारपेठ बंदच आहे. काल झालेल्या दगडफेकीच्या प्रकारानंतर व्यापारी आज आक्रमक होताना दिसून येत आहेत. व्यापारी जिल्हाधिकारी यांच्याकडे निवेदन देण्यासाठी एकवटले आहेत. मोठ्या प्रमाणावर शहरातील व्यापारी शिवाजी चौकात जमले आहेत. शिवाजी चौक येथून जिल्हाधिकाऱ्यांकडे निवेदन देण्यासाठी व्यापारी जातील.

कोल्हापूर- पंचगंगा नदी प्रदूषणामुळे शिरोळ तालुक्यात शेतकऱ्यांनी संताप व्यक्त केला. मृत माशांचा पंचनामा करण्यासाठी आलेल्या अधिकाऱ्यांना स्वाभिमानी शेतकरी संघटनेनं घेराव घालत जाब विचारला आहे. प्रदूषण नियंत्रण मंडळाचे क्षेत्र अधिकारी अंकुश पाटील यांना तेरवार बंधाऱ्यावर बसवून ठेवत शेतकऱ्यांनी संताप व्यक्त केला. भीमानी शेतकरी संघटनेचे बंडू पाटील आणि त्यांच्या सहकाऱ्यांनी अंकुश पाटील यांना धारेवर धरलं.

उपमुख्यमंत्री अजित पवार यांनी अमित शाह यांची भेट घेतली आहे. संसदेत अजित पवार आणि अमित शाह यांची भेट झाली.

“जेव्हा जेव्हा देवेंद्र फडणवीस मुख्यमंत्रीपदी विराजमान होतात तेव्हा तेव्हा राज्यात जातीय तणाव निर्माण केला जातो,” भिमा कोरेगाव, कोपर्डीतील घटना त्याची उदाहरण असल्याचं धक्कादायक विधान करत भाजपचे माजी राज्यसभा खासदार अमर साबळे यांनी विरोधकांवर निशाणा साधला.

महायुतीचा मंत्रीमंडळ विस्तार येत्या 14 तारखेला होण्याची शक्यता असून  30 ते 35 आमदार मंत्रीपदाची शपथ घेणार अशी माहिती सूत्रांनी दिली आहे. भाजपचे 15 ते 15 आमदार मंत्रीपदाची शपथ घेणार आहेत. तर शिवसेना शिंदे  गटाचे आणि अजित पवार गटाचे प्रत्येकी 8 ते 9 आमदार मंत्रीपदाची शपथ घेतील असे समजते.

मंत्री मंडळ विस्तारात भाजपचा वरचष्मा राहणार, गृह व अर्थ खाते भाजपकडेच राहणार.

नगरविकास खाते शिवसेनेला मिळण्याची शक्यता असून राष्ट्रवादीच्या पदरात महसूल खातं पडण्याची शक्यता आहे.

सार्वजनिक बांधकाम खातेही सोडण्याची तयारी भाजपने दर्शवली आहे.  एकनाथ शिंदे व अजित पवार यांच्या सोबत अंतिम चर्चा झाल्यावर अधिकृत घोषणा होणार आहे.

आज साहेबांचा वाढदिवस, त्यांना सर्वजण शुभेच्छा द्यायला येतात. मीही शुभेच्छा दिल्या, जनरल चर्चा झाली, राजकीय विषयावर नाही असं अजित पवार यांनी स्पष्ट केलं.

येत्या 14 तारखेला मंत्रिमंडळ विस्तार होऊन शपथविधी होण्याची शक्यता आहे, अजित पवारांनी सांगितली तारीख.

पंतप्रधान नरेंद्र मोदींनी शरद पवारांना वाढदिवसाच्या शुभेच्छा दिल्या आहेत. नरेंद्र मोदी यांनी ट्वीट करत शरद पवारांना शुभेच्छा दिल्या आहेत. राज्यसभा खासदार आणि ज्येष्ठ नेते श्री शरद पवार जी यांना वाढदिवसाच्या हार्दिक शुभेच्छा. त्यांच्या दीर्घायुष्यासाठी मी प्रार्थना करतो, असे पंतप्रधान नरेंद्र मोदी यांनी म्हटले आहे.

अजित पवार, सुनेत्रा पवार, छगन भुजबळ, प्रफुल्ल पटेल शरद पवारांच्या भेटीसाठी पोहोचले आहेत. शरद पवारांच्या दिल्लीतील निवासस्थानी अजित पवार हे दाखल झाले आहेत. शरद पवार यांच्या 85 व्या वाढदिवसानिमित्त अजित पवार शुभेच्छा देण्यासाठी दाखल झाले आहेत.

कोल्हापूर : पंचगंगा नदीत दूषित पाण्यामुळे हजारो मासे मृत अवस्थेत सापडले आहेत. शिरोळ तालुक्यातील तेरवाड बंधारा परिसरातील ही स्थिती पाहायला मिळत आहे. पंचगंगा नदीत सांडपाणी तसेच रासायनिक्त पाणी थेट सोडल्याने पाणी दूषित झाले आहे. पंचगंगा नदीतील पाणी काळेकुट्ट, फेसाळलेले पाहायला मिळत आहे. तरीही प्रदूषण नियंत्रण मंडळाकडून याकडे दुर्लक्ष केले जात आहे. पंचगंगा नदीत हजारो मासे मृत्युमुखी पडले आहेत. वारंवार नदीतील पाणी प्रदूषित होत असल्याने नागरिक आणि शेतकऱ्यांचा संताप पाहायला मिळत आहे.

राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांचा आज वाढदिवस आहे. शरद पवार यांच्या 84 वाढदिवसानिमित्त देशभरातून त्यांच्यावर शुभेच्छांचा वर्षाव होत आहे. शरद पवार यांच्या निवासस्थानी कार्यकर्त्यांची गर्दी पाहायला मिळत आहे.

सोलापूर – शिवसेना शिंदे गटाचे आमदार संजय राठोड यांना मंत्रिपद मिळावे यासाठी अक्कलकोटच्या स्वामी समर्थ मंदिरात महाआरती करण्यात आली. राष्ट्रीय बंजारा परिषद, ऑल इंडिया बंजारा संघ इत्यादी संघटनेकडून ही महाआरती करण्यात आली. स्वामी समर्थ मंदिरात महाआरती करून संजय राठोड यांना मंत्रिपद मिळावे असे साकडे घालण्यात आले.

परभणीत कालपासून कोंबिंग ऑपरेशन सुरू असल्याचे समजते. राज्याला अजूनही गृहमंत्री लाभलेले नाहीत, त्यामुळे कायदा आणि सुव्यवस्थेचा प्रश्न कुणी हाताळावा हा प्रश्न निर्माण झाला आहे, अशी घटना घडण्याला कारणीभूत होण्याला पोलीस व्यवस्था आणि गृहखाते आहे. कोंबिंग ऑपरेशनच्या नावाखाली आंबेडकरी अनुयायी पिढ्या बरबाद करण्याचा आम्ही निषेध करतो, असे सुषमा अंधारेंनी म्हटले आहे.

कोरोनाकाळापासून साई मंदिरात हार, फुलं, प्रसाद घेण्यास घालण्यात आली होती बंदी. आता साई भक्तांना मंदिरात नेता येणार फुले. ना नफा, ना तोटा दरात साई संस्थान कर्मचारी सोसायटीकडून होणार हार, फुलं प्रसादाची विक्री. आज माजी खासदार सुजय विखे पाटील, साई संस्थानचे प्रशासकीय अधिकारी, साईसंस्थान एम्प्लॉईज सोसायटीचे चेअरमन विठ्ठल पवार आणि शिर्डीचे प्रमुख ग्रामस्थ यांच्या हस्ते होणार फुलं, हार प्रसादाच्या स्टॉलचे उद्घाटन.

वाहनचालकांची दररोज मद्यप्राशन केले आहे का? याची तपासणी करण्यात यावी, असे आदेश ठाणे परिवहन प्रशासनाने ठेकेदारांना काढले आहेत. मुंबईत घडलेल्या घटनेच्या अनुषंगाने वेळीच ठाणे  परिवहन सेवेने सुरक्षेची  उपायोजना योजली आहे. संबंधित चालकाला किमान दोन वर्ष वाहन चालवण्याचा अनुभव असणे गरजेचे आहे. चालकाला  कोणत्याही परिस्थितीत एका दिवसात डबल ड्युटी देऊ नये. त्याप्रमाणे नियमितपणे साप्ताहिक रजा देणे,ठेकेदाराला बंधनकारक असणार आहे

राज्यात पुन्हा थंडी वाढली आहे. उत्तर भारतातून थंड वा-याच्या प्रवाहामुळे राज्यात थंडी पसरली आहे. राज्यात अनेक भागात किमान तापमान 10 अंशांच्या खाली पोहोचले. उत्तर महाराष्ट्रात तर तापमान 4-5 अंशावर पोहोचले होते. देशातील उत्तरेकडील राज्यातून येणाऱ्या थंड वाऱ्यामुळे महाराष्ट्रात गारठा वाढला आहे. राज्यात धुळ्यासह निफाड, गोंदिया, नागपूर, वर्धा येथील तापमान 10 अंश सेल्सिअसच्या खाली गेले आहे. सूर्यास्तानंतर हवेतील गारठा अधिक वाढत आहे.

महाराष्ट्रातील दिग्गज नेते शरद पवार यांचा आज वाढदिवस आहे. बैठकीच्या निमित्ताने अजित पवार आणि सुनेत्रा पवारही दिल्लीतच आहेत. अजित पवार आज शरद पवारांना शुभेच्छा देणार का? याची राजकीय वर्तुळात मोठी उत्सुकता आहे.

राज्याचा मंत्रिमंडळाचा विस्तार 14 डिसेंबरला होणार असल्याची सूत्रांची माहिती आहे. दिल्लीत काल झालेल्या बैठकीत मंत्रिपदांच्या नावांवर शिक्कामोर्तब. दुपारनंतर देवेंद्र फडणवीस, अजित पवार मुंबईला रवाना होणार आहेत. आज रात्री फडणवीस, शिंदे, पवार यांच्यात महत्वपूर्ण बैठक होणार आहे. भाजपचे जवळपास 20 आमदार मंत्रीपदाची शपथ घेणार असल्याची सूत्रांची माहिती.