Agniveer | दोन एकर जमीन…एकुलता एक मुलगा.. शहीद अग्नीवीर अक्षय याची डोळ्यात अश्रू आणणारी कथा

gniveer Gawate Akshay Laxman

पुणे | 24 ऑक्टोंबर 2023 : जगातील सर्वात उंच भाग म्हणजे सियाचीन. या भागातील ग्लेशियरमध्ये अक्षय लक्ष्मण गावटे (वह 22) हा तैनात होता. बुलढाणा जिल्ह्यातील पिंपळगाव सराय या गावामधील अक्षय हा रहिवाशी आहे. सियाचीनमध्ये तैनात असताना तो शहीद झाला. त्याला त्यापूर्वी रुग्णालयात नेण्यात आले. 45 मिनिटांसाठी त्याला सीपीआर दिले. परंतु त्याचे प्राण वाचता आले नाही. त्याचा मृत्यू कशामुळे झाला आहे? हे अजून स्पष्ट झाले नाही. त्याच्या मृत्यूमुळे संपूर्ण गावावर दुःखाचा डोंगर कोसळला आहे. भारतीय लष्कराने त्याच्या सर्वोच्च बलिदानास सलाम करत आपल्या संवेदना व्यक्त केल्या आहेत.

लष्करात भरती होण्याचे होते स्वप्न

अक्षय याचे वडील लक्ष्मण गावटे यांनी सांगितले की, अक्षय याने बीकॉमची पदवी घेतली. त्याला आधीपासून लष्कराचे आकर्षण होते. मी त्याला लष्करात जाऊ नको, असे सांगतो. परंतु तो आपल्या जिद्दीवर कायम होता. तीन दिवासांपूर्वी त्याच्याशी आमचे बोलणे झाले. त्याने माझ्या प्रकृतीची चौकशी केली. आईसंदर्भात विचारणा केली.

अक्षय एकुलता एक मुलगा

अक्षय याच्या परिवारात त्याचे आई-वडील आणि लहान बहिण श्वेता आहे. त्याचे काका सेवानिवृत्त सैनिक आहे. लष्करात दाखल होण्यासाठी त्याने कठोर परिश्रम केले. रात्रंदिवस त्याने अभ्यास केला. त्यानंतर पहिल्याच प्रयत्नात तो यशस्वी ठरला, असे गावातील साहेबराव गावटे यांनी सांगितले.

परिवारकडे दोन एकर कोरडवाहू जमीन

अक्षय याचे आई-वडील शेतात मजुरी करतात. त्यांच्याकडे दोन एकर कोरडवाहू जमीन आहे. त्याची लहान बहिण बारावीत शिकत आहे. तो परिवारात एकमेव कमवता व्यक्ती होता. ऑगस्ट महिन्यात पंधरा दिवस सुटी घेऊन तो घरी आला होता. माजी सरपंच सतीश गावटे यांनी सांगितले की, आमच्या गावांत 20 पेक्षा जास्त सेवानिवृत्त सैनिक आहेत. त्यांच्याकडूनच अक्षय याला सैन्यात दाखल होण्याची प्रेरणा मिळाली. अक्षय याच्या यशानंतर गावातील इतर युवकही अग्नीवीरची तयारी करत आहेत. अक्षय याचा परिवार अतिसामान्य आहे. त्याचा परिवारातील एकुलता एक कमवता मुलगा गेल्यामुळे त्यांना चांगल्या मदतीची गरज आहे.