MNS Vs Shiv sena | शिवसेनेच्या टिझरमध्ये राज ठाकरेंच्या सभेची गर्दी! सोशल मीडियावर जोरदार चर्चा, अखेर शिवसेनेनं व्हिडीओ हटवला

मुंबईः हिंदुत्वाच्या मुद्द्यावरून शिवसेनेला (Shiv Sena) बॅकफूटवर टाकण्याचा विडाच जणू मनसेनं (MNS) उचचला आहे. हनुमान चालिसा, मशिदींबाहेरचे भोंगे, अयोध्या दौरा या मुद्द्यावरून राज ठाकरेंच्या सभा चांगल्याच गाजत आहेत. त्यामुळे शिवसेनेनंही आता भव्य सभा आयोजित केल्या आहेत. याच पार्श्वभूमीवर शिवसेनेनं येत्या 14 मे रोजी बीकेसीवर जंगी सभा आयोजित केली आहे. पक्षातर्फे या सभेसाठीचे टिझरही जारी करण्यात आले आहेत. पहिला टिझर काही दिवसांपूर्वी जारी झाला. आज या सभेचा जो दुसरा टिझर जारी झाला, त्यात मात्र शिवसेनेनं मोठी चोरी केल्याचा आरोप मनसेनं केला आहे. या टिझरमध्ये दिसणारी गर्दी ही राज ठाकरे (Raj Thackeray) यांच्या शिवाजी पार्कमधील सभेची गर्दी असल्याचा दावा मनसेनं केला आहे. शिवसेनेच्या ट्विटर अकाउंटवर हे टिझर जारी झाल्यानंतर मनसेच्या कार्यकर्त्यांनी टीकेच झोड उठवली. त्यानंतर शिवसेनेच्या अकाउंटवरून हे टिझर काढून टाकण्यात आलं. मात्र अनेक कार्यकर्त्यांच्या अकाउंटवर ते होतंच. त्यामुळे मनसेच्या कार्यकर्त्यांनी शिवसेनेची खिल्ली उडवली आहे. तसेच कोण असली आणि कोण नकली, याचा निर्णय आता जनतेनंच घ्यावा, असंही मनसेनं म्हटलंय. दरम्यान, सोशल मीडियावरुन जोरदार खिल्ली उडवली जाऊ लागल्यावर शिवसेनेनं तो व्हिडीओ डिलीट केलाय. मात्र, अनेकांनी तो व्हिडीओ आधीच डाऊनलोड केल्यानं शिवसेनेची चांगलीच पंचाईत झालीय.

मनसेचा आरोप काय?

राज ठाकरे यांचा हिंदुत्वाचा कळवळा नकली असल्याचा आरोप शिवसेनेनं केला आहे. तसेच असली हिंदुहृदय सम्राट यांची सभा येत्या काळात होईल, असे पोस्टरही शिवसेनेच्या वतीने झळकवण्यात आले. मात्र शिवसेनेनं जारी केलेल्या टिझरमध्ये राज ठाकरेंच्या सभेची गर्दी दाखवल्याचा आरोप मनसेनं केला आहे. तसेच असली नकली म्हणणाऱ्यांनी स्वतःचे आत्मपरीक्षण करा. काहीतरी अस्सल तुमचे असू द्या. इतकेही नकली होऊ नका. सभा शिवसेनेची आणि व्हिडिओत गर्दी मनसेच्या सभेची.. अजून माणसं जमा करायला राजसाहेबांचाच आधार घ्यावा लागतोय का? लक्षात आल्यावर ट्विट डिलिट करण्याची नामुष्की शिवसेनेवर ओढवली असल्याची खोचक टीका मनसेनं केली आहे.

व्हिडिओत नेमके काय?

शिवसेनेनं जारी केलेल्या टिझरमध्ये भव्य सभा दाखवण्यात आली आहे. बॅगराऊंडला … जमलेल्या माझ्या तमाम बंधू आणि भगिनींनो.. असे जनतेला आवाहन कऱण्यात आले आहे. त्यानंतर भव्य गर्दीतून उद्धव ठाकरे सभेसाठी येताना दाखवले आहे. यानंतर सभेच्या ठिकाणची दोन-तीन भव्य दृश्य दाखवली आहेत. याच दृश्यांपैकी एक मनसेच्या शिवाजी पार्कमधील गर्दी असल्याचा दावा शिवसेनेनं केला आहे. तसेच टिझरमध्ये पुढे उद्धव ठाकरे, यांनी प्रत्येक गावात, खेड्यात, घरात शिवसैनिक असलाच पाहिजे, असं आवाहनही केलं आहे.