भाजप युवा मोर्चाच्या कार्यकर्त्यांकडून काँग्रेस कार्यालयावर हल्ला, पोलिसांकडून भाजप कार्यकर्त्यांना जोरदार चोपले
भारतीय जनता युवा मोर्चाच्या कार्यकर्त्यांनी गुरुवारी मुंबईत मोठा गोंधळ घातला. काँग्रेसकडून सातत्याने बाबासाहेबांचा अवमान केला जात असल्याचा आरोप करत मुंबईतील काँग्रेसच्या खासदार वर्षा गायकवाड यांच्या कार्यालयावर हल्ला केला. कार्यालयात तोडफोड करुन शाई फेकली. यावेळी पोलिसांनी भाजप कार्यकर्त्यांना जोरदार चोपले.
काँग्रेस आणि भाजपमध्ये संसदेत राज्यघटनेवरुन सुरु असलेल्या प्रकरणाचे पडसाद मुंबईत उतरले. मुंबईत भाजयु मोर्चाने काँग्रेस विरोधात आंदोलन केले. अचानक मुंबईतील काँग्रेस कार्यालयात पोहचत तोडफोड केली.
भारतीय जनता युवा मोर्चाच्या कार्यकर्त्यांनी मुंबईत काँग्रेस कार्यालयात सोनिया गांधी, राहुल गांधी यांचे असलेल्या फोटोंवर शाई फेकली. तसेच कार्यालयातील खुर्च्या आणि इतर साहित्यांची तोडफोड केली.
भाजप कार्यकर्त्यांकडून जोरदार घोषणाबाजी करण्यात आली. आंदोलकांनी कार्यालायाचा दरवाजा तोडण्याचा प्रयत्न केला. आक्रमक भाजप कार्यकर्त्यांना रोखण्यासाठी पोलिसांना जोरदार लाठीचार्ज केला.
पोलिसांनी आंदोलन करणाऱ्या भाजप कार्यकर्त्यांना चांगले चोपून काढले. आक्रमक झालेल्या पोलिसांना पाहून भाजप कार्यकर्ते पळू लागले. पोलिसांच्या लाठीचार्जचा प्रसाद अनेक भाजप कार्यकर्त्यांना बसला.
भाजपच्या आंदोलन करणाऱ्या कार्यकर्त्यांना पोलिसांनी आझाद नगर पोलीस ठाण्यात नेले. त्या ठिकाणी काँग्रेस कार्यकर्तेही पोहचले. यामुळे पोलिसांनी बंदोबस्त वाढवला आहे. या प्रकरणी गुन्हा दाखल करण्याची प्रक्रिया सुरु आहे.