महायुतीच्या मंत्रिमंडळात असणार की नाही? एकनाथ शिंदे यांनी स्वत: दिलं उत्तर 

एकनाथ शिंदे

महाराष्ट्र विधानसभा निवडणुकीचा निकाल जाहीर होऊन 11 दिवस उलटल्यानंतर आज महायुतीच्या नेत्यांनी राजभवनात जावून महाराष्ट्राचे राज्यपाल सी. पी. राधाकृष्णन यांची भेट घेतली. यावेळी भाजपचे गटनेते देवेंद्र फडणवीस, शिवसेनेचे गटनेते एकनाथ शिंदे, राष्ट्रवादी काँग्रेसचे गटनेते अजित पवार यांनी एकत्रितपणे सरकार स्थापनेचा दावा केला. यानंतर या तीनही प्रमुख नेत्यांची एकत्रित पत्रकार परिषद पार पडली. यावेळी देवेंद्र फडणवीस यांनी एकनाथ शिंदे यांच्याबाबत मोठं वक्तव्य केलं. “एकनाथ शिंदे यांना मंत्रिमंडळात राहावं अशी विनंती केली. त्यांच्या आमदारांचीही तीच विनंती आहे. त्यांचा आम्हाला सकारात्मक प्रतिसाद मिळेल अशी आशा आहे”, असं मोठं वक्तव्य देवेंद्र फडणवीस यांनी केलं. त्यांच्या या वक्तव्याने एकनाथ शिंदे हे महायुतीच्या मंत्रिमंडळात असतील की नाही? याबाबतचा सस्पेन्स निर्माण झाला आहे. याबाबत एकनाथ शिंदे यांना पत्रकारांनी प्रश्न विचारला. त्यावर त्यांनी प्रतिक्रिया दिली.

तुम्ही देवेंद्र फडणवीस यांच्या मंत्रिमंडळात सहभागी होणार आहात का? असा प्रश्न पत्रकारांनी एकनाथ शिंदे यांना विचारला. त्यावर त्यांनी प्रतिक्रिया दिली. “अरे बाबा, ते सांगितलं ना, तुम्हाला संध्याकाळी सांगतो ते. संध्याकाळी सांगतो ना. तुम्हाला तर एकदमच पाहिजे सगळं. देवेंद्र फडणवीस माझ्याकडे आले. त्यांचा मनाचा मोठेपणा आहे. मी त्यांना धन्यवाद देतो. आमचे सर्व महायुतीच्या आमदारांचादेखील जो आग्रह आहे, सगळ्यांना धन्यवाद देतो, सगळ्यांचा आदर करतो”, अशी भूमिका एकनाथ शिंदे यांनी मांडली.

‘इथेच देवेंद्रजींनी मी मुख्यमंत्री व्हावं म्हणून…’

“आम्ही राज्यपालांची भेट घेऊन महायुतीचं सरकार स्थापन करण्याची परवानगी मागितली. राज्यपालांनी परवानगी दिली. उद्या साडेपाच वाजता आझाद मैदानात शपथविधी आहे. देवेंद्रजींनी निमंत्रण दिलं. आम्हीही देतो. अडीच वर्षापूर्वी इथेच देवेंद्रजींनी मी मुख्यमंत्री व्हावं म्हणून माझ्या नावाची शिफरस केली होती. आज देवेंद्रजी मुख्यमंत्री व्हावेत अशी शिफारस आणि समर्थनाचं पत्र दिलं आहे”, असं एकनाथ शिंदे म्हणाले.

“आम्ही आधीच त्यांना पाठिंबा दिला होता. मोदी आणि अमित शाह असतील नड्डा असतील हे जो काही निर्णय घेतील त्याला आमचा पाठिंबा असेल अशी भूमिका आम्ही घेतली होती. गावी गेलो तरी तुम्ही काय काय चालवत असता. मी मनमोकळेपणाने भूमिका स्पष्ट केली. खेळीमेळीच्या वातावरणात हे सरकार स्थापन होतंय याचा आनंद आहे. आता पर्यंतच्या इतिहासात एवढं बहुमत मिळालं नव्हतं”, असंही एकनाथ शिंदे म्हणाले. “आमच्यात कोण मोठा कोण छोटा असं काही नव्हतं. आम्ही एकत्र काम करत होतो. सरकार सर्वसामान्यांसाठी असतं. आम्ही त्याचं पालन केलं. आम्ही विकास आणि योजना याची सांगड घातली”, असंदेखील एकनाथ शिंदे यावेळी म्हणाले.