विधानसभा निवडणुकीसाठी भाजपकडून जोरदार तयारी, राज्याबाहेरील नेत्यांची फौज मैदानात

भाजप

BJP Meeting on maharashtra assembly election 2024: राज्यात विधानसभा निवडणुकीचे पडघम वाजू लागले आहेत. राजकीय पक्षांकडून निवडणुकीची तयारी जोरात सुरु झाली आहे. युती आणि आघाड्यांची जागा वाटपासाठी चर्चा सुरु आहे. त्याचवेळी निवडणूक सूत्र आणि प्रचाराची जबाबदारी वाटली जात आहेत. विधानसभा निवडणुकीसाठी भाजपकडून फक्त राज्यातीलच नव्हे तर राज्याबाहेरील नेत्यांची फौज मैदानात उतरवली जाणार आहे. भाजपचे राष्ट्रीय पातळीवरील दिग्गज महाराष्ट्रातील विधानसभा निवडणुकीची सूत्रे पडद्यामागून हलवणार आहेत. त्यासाठी विविध राज्यातील नेत्यांकडून महाराष्ट्रातील राजकीय परिस्थितीचा आढावा घेण्यात आला.

भाजप मुख्यालयात बैठक

अनेक केंद्रीय मंत्र्यांसह दिग्गज नेत्यांनी महाराष्ट्रातील विविध मतदारसंघांमध्ये दौरे सुरु केले आहेत. त्या मतदार संघांचा आढावा घेतला आहे. मतदार संघाचा दौरा करणाऱ्या या नेत्यांची मुंबईत भाजप मुख्यालयात बैठक झाली. या बैठकीत भाजप प्रभारी भुपेंद्र यादव, सहसंघटनमंत्री शिवप्रकाश, माजी मंत्री प्रल्हाद पटेल, मंत्री नरोत्तम मिश्रा यांच्यासह इतर नेते सहभागी झाले. ज्या जागा भाजपकडेच राहणार आहे, त्या ठिकाणावरची रणनीती या नेत्यांकडून आखली जात आहे. तसेच महायुतीमधील पक्षांना मदत करुन राज्यात पुन्हा महायुतीचे सरकार आणण्यासाठी नियोजन केले जात आहे.

सरकारच्या योजनांची माहिती

विधानसभा निवडणूक जाहीर होताच भाजपचे राष्ट्रीय पातळीवरील स्टार प्रचार मैदानात उतरणार आहेत. तसेच बड्या नेत्यांवर विशिष्ट मतदार संघाची जबाबदारी वाटण्यात येणार आहे. लोकसभा निवडणुकीसारखी परिस्थिती पुन्हा निर्माण होऊ नये, म्हणून राज्य सरकारने राबवलेल्या विविध योजनांची माहिती जनतेपर्यंत पोहचवली जात आहे. त्यात लाडकी बहीण सारख्या योजनेत जास्तीत जास्त महिलांचा सहभाग करुन घेण्याचा प्रयत्न केला जात आहे.

शरद पवार गटाचा अहवाल दोन दिवसांत

आगामी विधानसभा निवडणुकीच्या दृष्टीने गोळा केलेला राष्ट्रवादी शरदचंद्र पवार पक्षाचा प्राथमिक अहवाल दोन दिवसांत सादर होणार आहे. हा अहवाल येत्या गुरुवारपर्यंत प्रदेश कार्यलयाला मिळणार आहे. त्यानंतर पक्षाची ताकद आणि संभाव्य उमेदवारांबाबत चर्चा होणार आहे. पहिल्या अहवालानंतर दुसरा अहवाल लगेच दिला जाणार आहे.