सेल्फ टेस्ट किटची माहिती पालिकेला देणे बंधनकारक, आयु्क्तांचे नवे आदेश काय? वाचा सविस्तर
सेल्फ टेस्ट किटचा वापर करणाऱ्यांनी त्यांचा अहवाल अपलोड करणे आवश्यक आहे. रूग्णाचा पाठपुरावा करण्यासाठी आणि संसर्ग रोखण्यासाठी हे आवश्यक आहे. या किटचे वितरण करणाऱ्यांनी विक्रेत्यांना किती किट दिली आहेत, याची माहिती आम्हाला देणं बंधनकारक केलंय. असे अतिरिक्त आयुक्त म्हणाले.
मुंबई : देशात सध्या कोरोनाच्या तिसऱ्या लाटेने दहशत माजवली आहे. महाराष्ट्रातही काल एका दिवसात राज्यात 46 हजार 406 रुग्ण (Corona) आढळून आहेत, तर कोरोनामुळे 36 कोरोना रुग्णांचा मृत्यू झाला आहे. मुंबईतला आकडा काहीसा घसल्याने मुंबईला थोडा दिलासा मिळताना दिसून येत आहे. मात्र तरिही मुंबईतील रुग्णवाढ ही इतर जिल्ह्यांच्या तुलनेत अत्यंत जास्त आहे. कोरोनाच्या स्फोटक वाढीने मुंबईला लॉकडाऊनच्या उंबरठ्यावर पोहोचवले होते, त्यामुळे मुंबई महापालिका (Bmc) प्रशासन अलर्ट मोडवर येत, काही कठोर निर्णय घेत आहे. अनेकजण सध्या सेल्फ टेस्ट किटचा वापर करत आहेत, मात्र याबाबत पालिकेला माहिती देणे बंधनकारक असल्याचे आयुक्तांनी सांगितले आहे.
अतिरिक्त आयुक्त सुरेश काकाणी काय म्हणाले?
सेल्फ टेस्ट किटचा वापर करणाऱ्यांनी त्यांचा अहवाल अपलोड करणे आवश्यक आहे. रूग्णाचा पाठपुरावा करण्यासाठी आणि संसर्ग रोखण्यासाठी हे आवश्यक आहे. या किटचे वितरण करणाऱ्यांनी विक्रेत्यांना किती किट दिली आहेत, याची माहिती आम्हाला देणं बंधनकारक केलंय. त्याच बरोबर मेडिकलवाल्यांनी कुणाला विकले असतील त्यांची संपूर्ण माहिती आम्हाला द्यावी लागेल. रोज संध्याकाळी ६ वाजता ही माहिती मेल करावी, असे आदेश अतिरिक्त आयुक्त सुरेश काकाणी यांनी दिले आहेत. वॉर्डनिहाय याची विभागणी करून वॉर्डरूम मार्फत या व्यक्तींशी संपर्क साधला जाईल. असेही काकाणी यांनी सांगितले आहे.
मुलांच्या लसीकरणाचे सेंटर्स वाढवले
कोरोनाची तिसरी लाट आल्याने लहान मुलांचा धोकाही वाढला आहे. त्यामुळेच केंद्र सरकारने 15 ते 18 वयोगटातील मुलांचे लसीकरण करण्याचा निर्णय घेतला. त्यामुळे मुंबईत आणि संपूर्ण महाराष्ट्रातही लहान मुलांचे लसीकरण सुरू झाले. लहान मुलांच्या लसीकरणासाठी पूर्वी कमी सेंटर होते, आता सेंटर्स वाढवले आहेत. यामुळं लसीकरणाची संख्या वाढून 20 टक्क्यांपर्यंत पोहचलीय. येत्या काही दिवसांत 100 टक्के लसीकरणाचे ध्येय साध्य होईल, असेही अतिरिक्त आयुक्त सुरेश काकाणी म्हणाले.
