Omicron : मुंबईतील दोघांना ओमिक्रॉनची लागण, राज्यातील ओमिक्रॉन रुग्णांची संख्या 10 वर, चिंता वाढली!
दक्षिण आफ्रिकेतील जोहान्सबर्गवरुन 25 नोव्हेंबर 2021 रोजी मुंबईत आलेल्या 36 वर्षीय पुरुषाला ओमिक्रॉन विषाणूची बाधा झाल्याचे सिध्द झाले आहे. या रुग्णासोबत राहिलेल्या आणि 25 नोव्हेंबरला अमेरिकेहून आलेल्या त्याच्या वर्षीय मैत्रिणीला देखील या विषाणूची बाधा झाल्याचे प्रयोगशाळा अहवालातून समोर आले आहे.
मुंबई : कोरोनाचा नवा प्रकार (Corona New Variant) असलेल्या ओमिक्रॉन (Omicron) विषाणूचा फैलाव आता भारतात वाढताना पाहायला मिळत आहे. मुंबईत आज दोन जणांचा ओमिक्रॉनची लागण झाल्याचं समोर आलंय. राष्ट्रीय विषाणू विज्ञान संस्थेने (National Institute of Virology) दिलेल्या अहवालानुसार, आज मुंबईत ओमिक्रॉन विषाणूचा संसर्ग झाल्याचे सिध्द झाले आहे. यामुळे महाराष्ट्रातील ओमिक्रॉन विषाणू आढळलेल्या रुग्णांची संख्या आता 10 वर पोहोचली आहे.
दक्षिण आफ्रिकेतील जोहान्सबर्गवरुन 25 नोव्हेंबर 2021 रोजी मुंबईत आलेल्या 37 वर्षीय पुरुषाला ओमिक्रॉन विषाणूची बाधा झाल्याचे सिध्द झाले आहे. या रुग्णासोबत राहिलेल्या आणि 25 नोव्हेंबरला अमेरिकेहून आलेल्या त्याच्या 36 वर्षीय मैत्रिणीला देखील या विषाणूची बाधा झाल्याचे प्रयोगशाळा अहवालातून समोर आले आहे. दरम्यान, या दोघांना कोणतीही लक्षणे नाहीत. हे दोन्ही रुग्ण सेव्हन हिल्स रुग्णालयात भरती आहेत. या दोन्ही रुग्णांनी फायझर लसीचे दोन्ही डोस घेतलेले आहेत. या दोन्ही रुग्णांच्या 5 अतिजोखमीच्या आणि 15 कमी जोखमीच्या निकट सहवासितांचा शोध घेण्यात आलेला आहे. पुढील तपास सुरु आहे, अशी माहिती आरोग्य विभागाकडून देण्यात आली आहे.
पुणे, पिंपरीत ओमिक्रॉनचे 7 रुग्ण
पिंपरी-चिंचवडमध्ये सहा तर पुण्यात एकाला ओमिक्रॉनची लागण झाल्याचं रविवारी सायंकाळी स्पष्ट झालं. राज्यातील ओमिक्रॉन बाधितांची संख्या 8 झाली आहे. ओमिक्रॉनचा संसर्ग सुरू होताचं पुणे महापालिका पुन्हा एकदा ॲक्शन मोडमध्ये आली आहे. पालिकेच्या आरोग्य विभागानं सीओईपीच्या मैदानावरील जम्बो रुग्णालयाची पाहणी करत रुग्णालय कार्यरत ठेवण्याच्या सूचना देण्यात आल्या आहेत. दरम्यान, जम्बो रुग्णालय 1 जानेवारीपर्यंत न हलवण्याच्या सूचना अजित पवारांनी बैठकीत दिल्या होत्या. महापालिकेचे आरोग्य प्रमुख डॉ. पवार यांनी काल पाहणी करून रुग्णालय रेडी पझेशनमध्ये ठेवण्याच्या सूचना दिलेल्या होत्या. जम्बो रुग्णालयात एकुण 800 बेडची व्यवस्था आहे.
96 तासात देशातल्या 5 राज्यांत ओमिक्रॉन पसरला
फक्त 96 तासात देशातल्या 5 राज्यांत ओमिक्रॉन पसरलाय. 2 डिसेंबरला कर्नाटकात 2 ओमिक्रॉन बाधित निघाले. नंतर 4 तारखेला गुजरातच्या जामनगरमध्ये एक रुग्ण, 4 तारखेच्या संध्याकाळी कल्याण-डोंबिवलीत एक रुग्ण, आणि यानंतर दिल्लीत एक व्यक्ती ओमिक्रॉन बाधित आलाय. यापैकी कल्याण-डोंबिवलीतला जो ३३ वर्षीय तरुण बाधित झालाय, त्याला फक्त हलका ताप आहे. इतर कोणतीही लक्षणं नाहीत. तो काही दिवसांपूर्वी दक्षिण आफ्रिकेतून मुंबईत आला होता. सध्या त्याला कल्याणच्या कोव्हिड सेंटरमध्ये भर्ती करण्यात आलंय. मात्र त्यानं अद्याप कोरोनाची एकही लस घेतलेली नाही. कोरोनाचा एकही डोस न घेता या तरुणानं दक्षिण आफ्रिकेतून भारताचा प्रवास कसा केला, याबद्दलही आश्चर्य व्यक्त होतंय. दरम्यान, या तरुणाच्या संपर्कात आलेल्या 34 लोकांच्या चाचण्या झाल्या आहेत. त्या सर्वांचे रिपोर्ट निगेटिव्ह आले आहेत.
इतर बातम्या :