‘बाळासाहेबांसोबतची ती भेट शेवटची होती’, राज ठाकरे यांचा हृदयस्पर्शी व्हिडीओ, पाहा Tv9 मराठीचा स्पेशल रिपोर्ट

मुंबई : दिवंगत शिवसेनाप्रमुख बाळासाहेब ठाकरेंच्या (Balasaheb Thackeray) जयंतीनिमित्त ठाकरे गट (Thackeray Group), मनसे (MNS) आणि उपमुख्यमंत्री देवेंद्र फडणवीसांनी (Devendra Fadnavis) व्हिडीओद्वारे अभिवादन केलं. ठाकरे गटानं आमदार फुटीवर बाळासाहेब ठाकरेंच्या भाषणाचा एक भाग शेअर केला. फडणवीसांनी बाळासाहेबांच्या विचारांचे वारस कोण? हे सांगितलं. तर मनसे अध्यक्ष राज ठाकरेंनी (Raj Thackeray) मनसे स्थापनेआधी बाळासाहेब ठाकरेंच्या झालेल्या शेवटच्या भेटीचा किस्स्याचा व्हिडीओ शेअर केला. बाळासाहेब ठाकरेंच्या 96 व्या जयंतीनिमित्त अनेकांनी व्हिडीओंद्वारे अभिवादन केलं. यात सर्वाधिक चर्चेत राहिला राज ठाकरेंनी ट्विट केलेला व्हिडीओ. शिवसेनेतून बाहेर पडण्याआधी बाळासाहेब ठाकरेंच्या भेटीचा शेवटचा प्रसंग राज ठाकरेंनी या व्हिडीओतून सांगितलाय.

जेव्हा राज ठाकरेंची शिवसेनेत घुसमट होऊ लागल्याच्या बातम्या बाहेर येत होत्या. तेव्हा सुरुवातीला शिवसेनेनं त्या फेटाळून लावल्या. त्यावरुन बाळासाहेब ठाकरेंनी एका सभेत नेहमीच्या शैलीत मिश्किल भाष्य केलं होतं.

मात्र शिवसेनेतून राज ठाकरे बाहेर पडले आणि मातोश्रीबाहेरच्या भाषणात माझा वाद विठ्ठलाशी नाही, तर विठ्ठलाभोवतीच्या बडव्यांशी आहे,
हे राज ठाकरेंचं वाक्य त्यावेळी खूप गाजलं.

ठाकरे गटाकडूनही व्हिडीओ शेअर

दुसरीकडे ठाकरे गटानं जर शिवसेनेतून आमदार फुटले तर काय करावं? असं आवाहन केलेला बाळासाहेब ठाकरेंचा जुना व्हिडीओ शेअर केलाय.

उपमुख्यमंत्री देवेंद्र फडणवीसांनीही बाळासाहेब ठाकरेंना मानवंदना देताना एक व्हिडीओ ट्विटरवर शेअर केलाय.

बाळासाहेब ठाकरे आज सर्व पक्षांना हवे आहेत. खासदार संजय राऊत म्हणतात की ठाकरेंकडची शिवसेना हीच खरी शिवसेना आहे.

शिंदे गटाच्या दाव्यानुसार तेच बाळासाहेबांच्या विचारांचे वारस आहेत. राज ठाकरे म्हणतात की त्यांना बाळासाहेब ठाकरेंच्या विचार पुढे न्यायचे आहेत. आणि भाजप म्हणतं की विचारांचं नातं हेच बाळासाहेबांशी खरं नातं आहे.