एसटी कुठवर आली, आता तुमच्या मोबाईलवर पाहा, नवीन वर्षात महामंडळाचं प्रवाशांना गिफ्ट

एसटीचे लोकेशन कळणार

ग्रामीण भागात एसटीही दळणवळणाचे मुख्य साधन आहे. अनेकांची सकाळ ही एसटीच्या प्रवासानेच होते. पण एसटी अनेकदा वेळ हुकवत असल्याने प्रवासी ताटकळतात. त्यांना एसटीची वाट पाहत थांबावे लागते. आता तर विविध योजनांमुळे जाईन तर एसटीनेच, असा आग्रह ज्येष्ठ नागरिकांसह महिला प्रवासी धरतात. त्यांच्यासाठी आता परिवहन महामंडळाने नवीन वर्षात मोठं गिफ्ट दिले आहे. आता एसटी बस कुठंपर्यंत आली आहे, हे प्रवाशांना त्यांच्या मोबाईलवर पाहता येणार आहे.

एसटी महामंडळाचे राज्यभर जाळे

एसटी महामंडळाचे राज्यभर जाळे पसरलेले आहे. 50 हजार मार्गावर जवळपास सव्वालाख फेऱ्या होतात. लांब पल्ल्याचा प्रवास करणाऱ्या प्रवाशांना आगाऊ तिकीट काढूनही मनस्ताप सहन करावा लागतो. त्यांना वेळेवर पोहचूनही एसटीची वाट पाहावी लागते. त्यांना एसटी किती वेळात येणार, आता बस कुठे आहे, याची कोणतीही माहिती मिळत नाही. मग प्रवाशांचा त्रागा वाढतो. यावर आता एसटी महामंडळाने तोडगा काढला आहे.

व्हेईकल ट्रॅकिंग सिस्टिम ॲप

राज्य परिवहन महामंडळाने प्रवाशांच्या सोयीसाठी व्हेईकल ट्रॅकिंग सिस्टिम ॲप आणले आहे. VLT च्या माध्यमातून प्रवाशांना एसटीचे थांबे, बस स्थानकात बस किती वाजता येणार हे 24 तास अगोदर कळेल. या ॲपच्या माध्यमातून प्रवाशांना लालपरीचे लोकेशन मोबाईलवर कळेल. त्यासाठी एसटी तिकिटावरील क्रमांकाच्या माध्यमातून प्रवाशांना बस स्थानकात एसटी किती वाजता येणार हे कळेल. एसटीच्या ताफ्यातील सर्वच बसेसला व्हेईकल ट्रॅकिंग सिस्टिम बसवण्यात येणार आहे. त्यामुळे प्रवाशांना या ॲपच्या माध्यमातून बसची सध्यस्थिती, लोकेशन कळेल.

या सेवेची सुरुवात करण्यासाठी रोस मार्टा कंपनीने रूट मॅपिंग पूर्ण केले आहे. सिस्टिममध्ये इंटिग्रेशनही पूर्ण केले आहे. सध्या वार्षिक ऑपरेशनल पॅटर्नमधील बदल, त्यामध्ये इंटिग्रेट करण्याचे काम सुरू आहे. येत्या काही आठवड्यात हे काम पूर्ण होणार आहे. एसटी प्रवाशांनी आगाऊ तिकीट काढल्यावर त्यावरील ट्रिप कोड, एसटीच्या ॲप्लिकेशनमध्ये ट्रॅक बसवर टाकल्यावर तिचे लोकेशन प्रवाशांना समजेल. मुंबई सेंट्रल मध्यवर्ती कार्यालयात त्यासाठी अद्ययावत नियंत्रण कक्षाची स्थापन करण्यात आली आहे.