Video – Nagpur | ट्रान्झिट रिमांडवर आलेले रवी राणा म्हणतात, आता दुसऱ्या मंत्र्यालाही ईडी अटक करेल, आता कुणाचा नंबर?
अमरावतीच्या पालकमंत्री यांचा 1200 कोटी रुपयांचा घोटाळा उघडकीस येईल. ईडी त्याचा तपास करत आहे. सीएम आणि त्यांच्या अवतीभवती घुटमळणाऱ्या अनिल परब यांचे घोटाळे देखील समोर येतील, असंही रवी राणा म्हणाले.
नागपूर : आजची स्थिती पाहता महाराष्ट्र सरकार अस्थिर आहे. राज्याचे मंत्री अनिल परब (Minister Anil Parab) यांची फाईल तयार आहे. लवकरच त्यांना ईडी अटक करेल. राज्य सरकार कोसळणार असून, महाराष्ट्रात राष्ट्रपती शासन लागणार आहे. षडयंत्र करून माझ्यावर गुन्हा दाखल केलाय. मी अमरावतीत नसतानाही पालकमंत्री यांनी कट रचून माझ्या विरोधत षडयंत्र केले. माझ्या विरोधात 307 सारखे खोटे गुन्हे दाखल केले. हे सर्व मुख्यमंत्री व अमरावतीचे पालकमंत्री (Amravati Guardian Minister) यांच्या दबावात झाले. जर महविकास आघाडी खोटे गुन्हा दाखल करून आमदाराला फसवत असेल तर सामान्य जनतेचे काय. महाविकास आघाडीच्या नेत्यांना याचा जबाब द्यावा लागेल. या सरकारचे अनेक मंत्री ईडीच्या रडारवर आहेत, असा गौप्यस्फोट आमदार रवी राणा (Ravi Rana) यांनी केला.
गुन्हा दाखल करणाऱ्यांवर मानहानीचा दावा ठोकणार
आमदार रवी राणा पंधरा दिवसांनंतर आपल्या मतदारसंघात जात आहेत. ते दिल्लीहून नागपूर विमानतळावर आले. तेव्हा राणा म्हणाले, मी दिल्लीत असताना माझ्यावर 307 चा गुन्हा दाखल करतात ही माझी फसवणूक आहे. आज मी दिल्लीतील न्यायालयातून ट्रान्झिट बेल घेऊन राज्यात आलो आहे. खोटा गुन्हा दाखल करणाऱ्यावर मानहानीचा दावा दाखल करणार आहे. अमरावतीच्या पालकमंत्री यांचा 1200 कोटी रुपयांचा घोटाळा उघडकीस येईल. ईडी त्याचा तपास करत आहे. सीएम आणि त्यांच्या अवतीभवती घुटमळणाऱ्या अनिल परब यांचे घोटाळे देखील समोर येतील.
पोलिसांविरोधात निषेध रॅली काढणार
अमरावती महापालिकेने शिवाजी महाराजांचा पुतळा रात्री छन्नी हातोडीने तोडला. त्यांच्यावर कारवाई न करता मी दिल्लीत असताना माझ्यावर कारवाई करण्यात आली. पंधरा दिवसांनंतर मी अमरावतीमध्ये जात आहे. त्याठिकाणी डॉक्टर बाबासाहेब आंबेडकर यांच्या पुतळ्याला हार अर्पण करणार. महात्मा गांधी यांच्या पुतळ्याला हार अर्पण करणार. त्यानंतर प्रशासनाविरोधात निषेध रॅली काढण्यात येईल. पोलीस विभाग आणि सरकारनं मला फसविण्याचा प्रयत्न केला. याचा निषेध करणार असल्याचं रवी राणा म्हणाले.
पाहा व्हिडीओ
