Pune News | पुण्यात ठरले, आता डीजे अन् लेझरमुक्त करणारा हा सर्वात मोठा उत्सव, कोणी घेतला निर्णय?

laser light in ganesh visarjan

अभिजित पोते, पुणे | 6 ऑक्टोंबर 2023 : पुणे शहरात गणेश उत्सवात लेझरचा वापर करण्यात आला होता. त्याचे परिणाम अनेकांच्या डोळ्यांवर झाल्याचे आता समोर येऊ लागले आहे. तसेच शहरातील महत्वाच्या भागात गणेश उत्सव विसर्जन मिरवणुकीत आवाजाची पातळी मर्यादेपेक्षा डबल होती. गणेश मंडळांनी लावलेल्या डीजेमुळे आवाज वाढला होता. या सर्वांचा त्रास त्या भागातील रहिवाशांना झाला तसेच मंडळाच्या कार्यकर्त्यांनाही झाला. गणेश विसर्जन मिरवणुकीनंतर अनेक कार्यकर्ते डोळे आणि कानाच्या तक्रारी घेऊन डॉक्टरांकडे गेले. या सर्वांच्या पार्श्वभूमीवर पुणे शहर डॉल्बीमुक्त करण्यासाठी शुक्रवारी पावले उचलली गेली.

कोणता उत्सव होणार डीजे मुक्त

पुणे शहरात डीजे आणि लेझरमुक्त आंबेडकर जयंती साजरी करण्याचा निर्धार शुक्रवारी आंबेडकरी जनतेने केला. तसेच पुणे शहरासह राज्यातील विविध शहरात डॉ. बाबासाहेब आंबेडकर यांची आगामी जयंती डीजे आणि लेझरमुक्त करण्याचा निर्णय घेण्यात आला. यासाठी सर्वत्र जनजागृती करण्यात येणार आहे. पुणे शहरातील संबंधित मंडळांमध्ये डीजे आणि लेझरचा वापर या वर्षीपासून बंद करण्यात येईल, असा निर्णय घेण्यात आला.

विविध मंडळांना देणार भेटी

पुणे शहरातील विविध मंडळे आणि विहारांना भेट देऊन आंबेडकर जयंतीमध्ये डीजेचा वापर करू नये, असे मतपरिवर्तन करण्यात येणार आहे. पुणे शहर डॉल्बीमुक्त आंबेडकर जयंती साजरी करण्यासंदर्भात विचारमंथन करण्यासाठी आयोजित चर्चासत्रात हा निर्णय घेण्यात आला. लेझर आणि डीजेचे होणाऱ्या दुष्परिणामामुळे हा निर्णय घेण्यात आला. आंबेडकरी जनतेने घेतलेल्या या निर्णयाचे पुणेकरांकडून स्वागत करण्यात येत आहे.

लेझर असतात धोकादायक

गणेश विसर्जन मिरवणुकीत हिरव्या लेझर लाईटचा वापर केला गेला. या लेझरची फ्रिक्वेन्सी खूप जास्त असते. त्यामुळे विसर्जन मिरवणुकीचा आनंद घेणाऱ्या अनेक तरुणांना नेत्ररोग तज्ज्ञाकडे धाव घ्यावी लागली. यामुळे लेझर लाईट विरोधात सामजिक संस्थांकडून आवाज उठवला जात आहेत. या लेझर वापरावर बंदी आणावी, अशी मागणी करण्यात आली.