Rohit Pawar | रोहित पवार यांचा मनोज जरांगे यांच्या समर्थनार्थ मोठा निर्णय

पुणे | 25 ऑक्टोबर 2023 : मराठा नेते मनोज जरांगे पाटील यांनी मराठा आरक्षणासाठी आज पुन्हा उपोषणाचं हत्यार उपसलं आहे. त्यांनी सरकारला मराठा आरक्षणासाठी 40 दिवसांचा वेळ दिला होता. पण 40 दिवसांनंतरही सरकारने मराठा आरक्षणाबाबत ठोस निर्णय घेतला नाही. त्यामुळे मनोज जरांगे पाटील यांनी आज पुन्हा उपोषणाला सुरुवात केली आहे. त्यांच्या उपोषणाला राज्यातील विरोधी पक्षांनी पाठिंबा दिलाय. राष्ट्रवादी काँग्रेसचे आमदार रोहित पवार यांनी तर मनोज जरांगे यांच्या उपोषणाला पाठिंबा देण्यासाठी मोठा निर्णय घेतला आहे.

मनोज जरांगे पाटील यांच्या उपोषणाला पाठिंबा देण्यासाठी रोहित पवार उद्या एक दिवसासाठी अन्नत्याग आंदोलन करणार आहेत. रोहित पवार यांनी आज युवा संघर्ष यात्रेदरम्यान याबाबतची घोषणा केली आहे. रोहित पवार यांच्या नेतृत्वात सध्या राष्ट्रवादी काँग्रेसचे अध्यक्ष शरद पवार यांच्या गटाची राज्यात युवा संघर्ष यात्रा सुरु आहे. रोहित पवार या यात्रेच्या निमित्ताने राज्यभर फिरुन सर्वसामान्यांच्या आणि कार्यकर्त्यांच्या भेटीगाठी घेत आहेत. या दरम्यान त्यांनी आज महत्त्वाची घोषणा केली.

रोहित पवार अन्नत्याग करुन 18 किमी पायी चालणार

रोहित पवार उद्या दिवसभर अन्नत्याग आंदोलन करणार आहेत. मनोज जरांगे पाटील यांच्या समर्थनार्थ रोहित पवार एक दिवसीय अन्नत्याग आंदोलन करणार आहेत. विशेष म्हणजे या दरम्यान त्यांची युवा संघर्ष यात्रा सुरूच असणार आहे. ते उद्या 18 किमी पायी चालणार आहेत. रोहित पवार उद्या अन्नत्याग करुन सणसवाडी ते पाडोळी असं 18 किमी पायी चालणार आहेत.

सोलापुरात तर गावकऱ्यांनी शपथच घेतली

मराठा आरक्षणाच्या मुद्द्यावरुन मराठा समाज आक्रमक झालाय. राज्यातील हजारो गाव-खेड्यांमध्ये राजकीय नेत्यांना प्रवेशबंदी घालण्यात आली आहे. मराठा समाजाला आरक्षण मिळत नाही तोपर्यंत राजकीय पुढाऱ्यांना गावात प्रवेश दिला जाणार नाही, असा निर्णय गावकऱ्यांनी घेतला आहे. पंढरपूरमध्ये खर्डी गावात राजकीय नेत्यांना प्रवेश बंदी घालण्यात आली आहे. गावकऱ्यांनी आगामी निवडणुकीत मदतान न घेण्याचा निर्णय घेतला आहे. तसेच राजकीय नेत्यांना गावात फिरु देणार नाही, अशी शपथच गावकऱ्यांनी घेतली आहे.

दुसरीकडे सांगोला तालुक्यातील मेडशिंगि ग्रामपंचायतीच्या निवडणुकीवर गावकऱ्यांनी बहिष्कार घातला आहे. मेडशिंगि ग्रामपंचायतीची पोटनिवडणूक लागली आहे. या पोटनिवडणुकीत एका जागेसाठी आठ जणांनी अर्ज भरले होते. पण गावकऱ्यांनी मराठा समाजाच्या आरक्षणासाठी, जरांगे पाटिल यांना पाठिंबा देण्यासाठि आठ जणांनी अर्ज मागे घेवून पोटनिवडणुकीवर बहिष्कार टाकला आहे.