Pune rain : पुणे शहरात ऑगस्टमधल्या कमी पावसाची नोंद, हवामान विभागानं दिली सविस्तर आकडेवारी

पुणे पाऊस, संग्रहित छायाचित्र

Image Credit source: tv9

पुणे : मान्सूनचा पाऊस (Monsoon rain) पुणे शहरात चांगला बरसला असला तरी महिन्यातील बहुतांश दिवस कोरडे राहिल्याने ऑगस्टमध्ये (August) शहरात केवळ 153.3 मिमी पावसाची नोंद झाली आहे. उरलेल्या दिवसांत हलक्या पावसाची शक्यता वर्तवण्यात आली आहे. मान्सूनच्या विश्रांतीमुळे मासिक पर्जन्यमानात कोणतीही लक्षणीय सुधारणा होणार नाही. जून ते सप्टेंबर या काळात पावसाळ्यात सर्वाधिक पाऊस पडणारा महिना ऑगस्ट मानला जातो. भारतीय हवामान विभागाने (India Meteorological Department) सादर केलेल्या आकडेवारीनुसार या वर्षी ऑगस्ट हा शहरासाठी 2011नंतरचा सातवा सर्वात ओला महिना ठरला आहे. पुणे शहरात जूनमध्ये केवळ 35 मिमी पाऊस पडला होता, जो 2011नंतरचा दुसरा सर्वात कोरडा महिना होता. हवामान विभागाच्या म्हणण्यानुसार जून अखेरपर्यंत पुण्यात 110.9 मिमी पावसाची कमतरता होती.

14 जुलै रोजी झाला 24 तासांचा पाऊस

जुलैमध्ये पुण्यात 386.2 मिमी पावसाची नोंद झाली, ज्यामुळे तो 2011नंतरचा सर्वात ओला महिना जुलै ठरला. यामुळे 84.2 मिमीने जास्त पाऊस झाला, असे आयएमडीने म्हटले आहे. आयएमडी नुसार, 1 जून ते 28 ऑगस्ट दरम्यान एकूण पाऊस 574.5 मिमी आहे. या हंगामातील सर्वाधिक 24 तासांचा पाऊस 14 जुलै रोजी 53.6 मिमी इतका नोंदवला गेला.

ऑगस्ट महिना हलक्या पावसाने संपण्याची शक्यता

आयएमडी पुणे हवामान अंदाज विभागाचे प्रमुख अनुपम कश्यपी म्हणाले, की पुणे शहरासाठी ऑगस्ट महिना हलक्या पावसाने संपण्याची शक्यता आहे. पुणे शहरात हलक्या पावसाची शक्यता आहे. 30 आणि 31 ऑगस्ट रोजी जिल्ह्याच्या काही ठिकाणी वादळ आणि विजांचा कडकडाट होण्याची शक्यता आहे. तर पुणे शहर आणि जिल्ह्यासाठी अतिवृष्टीचा इशारा नाही.

पुणे शहरात –

वर्ष – ऑगस्टमध्ये मासिक पाऊस (मिमीमध्ये)

1. 2014 – 280.6
2. 2020 – 255
3. 2016 – 230.5
4. 2019 – 209
5. 2012 – 204.9
6. 2017 – 162.2
7. 2022 – 153.3
8. 2006 (सर्व वेळ रेकॉर्ड) – 378