pune fire | पुणे शहरातील दुचाकीच्या शोरुमला भीषण आग, अनेक वाहने जळून खाक

अभिजित पोते, पुणे | 5 ऑक्टोंबर 2023 : पुणे शहरातील आगीचे सत्र सुरुच आहे. एक, दोन महिन्याच्या कालावधीत पुणे शहरात भीषण आगीच्या घटना घडत आहेत. आता गुरुवारी सकाळी सिंहगड रस्त्यावर असणाऱ्या एका दुचाकीच्या शोरुमला आग लागली. या आगीत अनेक वाहनांचे नुकसान झाले आहे. आग विझवण्यासाठी अग्नीशमन दलाचे पाच बंब घटनास्थळी दाखल झाले. त्यानंतर आगीवर नियंत्रण मिळवण्यात यश आले. ही आग शार्ट सर्कीटमुळे लागल्याची शक्यता आहे.

कुठे लागली आग

पुणे शहरातील सिंहगड रोडवर नवशा मारुती मंदिरामागे दुचाकीचे शोरुम आहे. टिव्हीएस कंपनीचे हे शोरुम आहे. या ठिकाणी सकाळी 7.45 मिनिटांनी आग लागली. आगीची माहिती मिळताच पुणे मनपाच्या अग्निशमन दलाची 5 वाहने घटनास्थळी दाखल झाली. अग्नीशमन दलाने दीड, दोन तासांच्या प्रयत्नानंतर आगीवर नियंत्रण मिळवले. परंतु तोपर्यंत सर्व्हिस सेंटरमधील 20 ते 25 दुचाकी जळाल्याची प्राथमिक माहिती आहे.

पुणे शहरात सातत्याने आगीच्या घटना

पुणे शहरात आगीच्या घटना गेल्या काही महिन्यांपासून सातत्याने घडत आहे. पुणे शहरातील वाघोलीत येथील गोडाऊनला जून महिन्यात मोठी आग लागली होती. आगीत ४ सिलेंडर फुटले होते. या भीषण आगीत तीन जणांचा दुर्देवी मृत्यू झाल्याची घटना घडली होती. त्यानंतर काहीच दिवसांना पुणे शहरातील टिंबर मार्केटमध्येही आग लागली होती. त्या आगीत मोठ्या प्रमाणावर नुकसान झाले. जुलै महिन्यात कोंढवा बुद्रुकमधील येवलेवाडी येथील गोडाऊनला भीषण आग लागली होती.

हॉटेलच्या आगीत दोघांचा मृत्यू

पुणे येथील मार्केटयार्डमध्ये असलेल्या हॉटेल रेवळ सिद्धी या ठिकाणी जून महिन्यात आग लागली होती. दोन मजले असणाऱ्या या हॉटेलमधील आगीत दोन कामगारांचा मृत्यू झाला होता. त्यापूर्वी 2022 मध्ये पुणे शहरातील लुल्ला नगरमधील हॉटेलमध्ये आग लागली होती. तसेच जून 2022 मध्ये पुण्यातील रूफ टॉप रेस्टॉरंटमध्ये आग लागल्याची घटना घडली होती. त्यानंतर आता दुचाकीच्या शोरुमला लागलेली आग शार्ट सर्किटमुळे लागल्याचा प्राथमिक अंदाज आहे.