उपमुख्यमंत्री देंवेंद्र फडणवीस आणि उद्धव ठाकरे यांची विधिमंडळाच्या लिफ्टमध्ये भेट झाली. यावेळी प्रविण दरेकर यांना आधी लिफ्ट बाहेर काढा, असं उद्धव ठाकरे म्हणाले. देंवेंद्र फडणवीस आणि उद्धव ठाकरे या दोघांच्या भेटीची राजकीय चर्चा होतेय. सोबतच उद्धव ठाकरेंनी केलेलं ‘प्रविण दरेकरांना बाहेर काढा’ हे विधान सध्या चर्चेच्या केंद्रस्थानी आहे. असं असतानाच या विधानाशी शब्द साधर्म्य असणारं एक विधान भाजप नेत्याने केलं आहे. अजित पवार यांना महायुतीतून बाहेर काढा, असं या नेत्याने म्हटलं आहे. या विधानामुळे राज्याच्या राजकीय वर्तुळात चर्चांना उधाण आलं आहे.
अजित पवारांनी भाजप कार्यकर्त्यांवर अन्याय केला. अजित पवारांना महायुतीतून बाहेर काढा, मागणी भाजप नेत्याने केली आहे. भाजपचे दौंडचे आमदार राहुल कुल यांच्या समोर भाजपचे पुणे जिल्हा उपाध्यक्ष आणि पुणे बाजार समितीचे संचालक सुदर्शन चौधरी यांनी ही मागणी केली आहे. शिरूर लोकसभा आढावा बैठकीमध्ये सुदर्शन चौधरी यांनी ही खदखद बोलून दाखवली. अजित पवार सत्तेत असतील तर आम्हाला सत्ता नको. पुण्याचे पालकमंत्री म्हणून अजित पवार आमच्या बोकांडी बसलेत. अजित पवारांनी भाजप कार्यकर्त्यांवर अन्याय केला. अजित पवार यांना महायुतीतून बाहेर काढा, असं सुदर्शन चौधरी म्हणालेत.
मागच्या वर्षी अजित पवार यांनी भाजपसोबत जाण्याचा निर्णय घेतला. अजित पवारांनी भाजपशी हात मिळवणी केली अन् महायुती सरकारमध्ये अजित पवार सामिल झाले. अजित पवारांनी बदलेल्या भूमिकेवर विविध प्रतिक्रिया आल्या. ज्यांच्यावर भाजपने भ्रष्टाचाराचे आरोप केले त्याच अजित पवारांना सरकारमध्ये सामील करून घेतल्याने विरोधी पक्षाकडून भाजपवर टीका केली गेली.
अजित पवार यांनी विरुद्ध विचार धारेच्या लोकांसोबत जात सत्तेत सहभाग घेतल्याचं म्हणत विरोधकांनी अजित पवारांवर निशाणा साधला. आता तर महायुतीतील महत्वाचा पक्ष असणाऱ्या भाजपच्या पदाधिकाऱ्यानेच अजित पवारांना महायुतीतून बाहेर काढण्याची मागणी केलीय. त्यामुळे राजकीय वर्तुळात चर्चांना उधाण आलं आहे.