हनी ट्रॅप प्रकरणातील प्रदीप कुरुलकर याची पॉलिग्राफ चाचणी होणार का? कोर्टाने काय दिला निर्णय

pradeep kurulkar

Image Credit source: tv9 marathi

योगेश बोरसे, पुणे : पुणे येथील डीआरडीओ संचालक असलेले डॉ. प्रदीप कुरुलकर पाकिस्तानी महिलेच्या हनी ट्रॅपमध्ये अडकले. पाकिस्तानी गुप्तहेर असलेल्या या महिलेच्या कुरुलकर संपर्कात होते. या प्रकरणी ४ मे रोजी त्यांना अटक झाली होती. एटीएसकडून त्यांची कसून चौकशी करण्यात आली. परंतु या चौकशीत त्यांच्यांकडून सहकार्य मिळत नाही. त्यामुळे कुरुलकर यांची पॉलीग्राफ चाचणी करण्याची तयारी एटीएसने सुरु केली आहे. या चाचणीसाठी परवानगी मिळवण्यासाठी पुणे न्यायालयात अर्ज दाखल केला आहे. त्यावर सोमवारी सुनावणी झाली.

न्यायालयाने काय दिला निर्णय

डॉ. प्रदीप कुरुलकर हनी ट्रॅप प्रकरण सुनावणी आता ३० जून रोजी होणार आहे. प्रदीप कुरुलकर यांच्या मुख्य दोन चाचण्यासाठी परवानगी द्या, अशी मागणी एटीएस कडून करण्यात आली होती. त्यात लाय डिटेक्टर चाचणी अन् पॉलीग्राफ चाचणीचा समावेश आहे. विशेष तपास पथकाने या चाचण्या करण्यास परवानगी मिळण्यासाठी पुणे न्यायलायात अर्ज केला होता. त्यावर आज सुनावणी होणार होती. परंतु सोमवारी याप्रकरणी कोर्टाने ३० जूनपर्यंत ही सुनावणी तहकूब केली आहे.

पॉलीग्रॉफ चाचणी होणार

DRDO चे संचालक प्रदीप कुरुलकर सध्या येरवडा कारागृहात आहे. परंतु चौकशीत वेगवेगळी अन् दिशाभूल करणारी माहिती त्यांनी दिली. त्यामुळे त्यांची पॉलीग्राफ टेस्ट करण्याचा निर्णय एटीएसने घेतला. या पॉलीग्राफ चाचणीत रक्तदाब, नाडी आणि श्वासोच्छवासाची गती यावर सत्य, असत्य शोधता येते. त्यामुळे कुरुलकर खरी माहिती देत आहे की दिशाभूल करत आहे, हे या चाचणीतून स्पष्ट होणार आहे.

फॉरेन्सिक अहवाल होता विरोधात

प्रदीप कुरुलकर याने व्हॉट्सॲपने पाकिस्तानी गुप्तहेरास ईमेल आयडी दिला होता. तपास संस्थांना त्याची लोकेशन पाकिस्तान असल्याची माहिती मिळाली. तसेच त्या मेलवरुन काही माहिती पाकिस्तानला दिल्याचे निष्पन्न झाले आहे. पाकिस्तानात माहिती पाठवण्यासाठी कुरुलकर त्या ईमेल आयडीचा वापर करत होता. त्या ईमेलमधून कुरुलकर याने गोपनीय माहिती पाकिस्तानला दिल्याचे फॉरेन्सीक अहवालातून स्पष्ट झाले आहे.