एमपीएससी पास दर्शना पवार हत्येसाठी राहुल याने सोमवार का निवडला? पोलीस तपासातून आली माहिती समोर

darshana and rahul

पुणे : पुणे येथील दर्शना पवार हिच्या हत्या प्रकरणात नवनवीन खुलासे होत आहेत. दर्शनाचा मित्र असलेला राहुल हंडोरे यानेच तिची हत्या केली होती, हे स्पष्ट झाले. त्यानंतर राहुल हंडोरे याला पुणे ग्रामीण पोलिसांनी अटक केली. ग्रामीण पोलिसांनी २२ जून रोजी त्याला अटक केली होती. त्यानंतर त्याची पोलीस कोठडी घेतली. त्या पोलीस कोठडी दरम्यान त्याची कसून चौकशी केली. यावेळी राहुल हंडोरे याने आरोप कबुल करत पोपटासारखी सर्व माहिती पोलिसांना दिली. त्यानुसार दर्शना हिला लग्नाचे विचारायचे अन् तिने नकार देताच तिची हत्या करायची, असा पूर्ण प्लॅन त्याने केला होता.

काय होता राहुल याचा प्लॅन

राहुल हंडोरे याच्या पोलीस कोठडीची मुदत २९ जून रोजी संपली होती. त्यानंतर पुणे पोलिसांनी पुन्हा त्याच्या पोलीस कोठडीची मागणी केली. न्यायालयाने पोलिसांची मागणी मान्य करत ३ जुलैपर्यंत राहुल हंडोरे याला पोलीस कोठडी दिली. दरम्यान चौकशी दरम्यान राहुल हंडोरे याने दर्शना हिच्या हत्येसाठी सोमवारच का निवडला होता? याची माहिती दिली आहे. त्याने पोलिसांना सांगितले की, शनिवार आणि रविवारी राजगडावर ट्रेकिंगसाठी येणाऱ्यांची गर्दी जास्त असते. परंतु सोमवारी गर्दी नसते. यामुळे दर्शनाला सोमवारी राजगडावर न्यावे, तिला लग्नाचे विचारावे अन् नकार देताच संपवावे, अशा आराखडा त्याने केला होता. त्यासाठी त्याने ब्लेडही खिशात ठेवला होता. हा ब्ले़ड लहान असला तरी त्यामुळे मोठी दुखापत होते.

पोलिसांनी जप्त केली गाडी अन् ब्लेड

राहुल हंडोरे ज्या गाडीने दर्शनाला घेऊन राजगडावर गेला होता, ती गाडी पोलिसांनी जप्त केली आहे. तसेच ब्लेडसुद्धा पोलिसांना मिळाले आहे. ज्या दुकानातून राहुल याने ब्लेड घेतला होता, ते दुकानही पोलिसांना मिळाले आहे. आता पोलीस चौकशी दरम्यान तो अजून माहिती देणार आहे. त्यामुळे या प्रकरणाचा तपासाला अधिक वेग येणार आहे. त्यानंतर लवकरच न्यायालयात आरोपपत्र दाखल होणार आहे.