राज ठाकरेंची तोफ मुख्यमंत्री शिंदे आणि उद्धव ठाकरे यांच्यावर बरसली

मनसे अध्यक्ष राज ठाकरे आपल्या प्रत्येक भाषणांमध्ये उद्धव ठाकरे यांना अडीच वर्षांच्या मुख्यमंत्रिपदावरुन घेरत आहेत. अर्थात उद्धव ठाकरे यांनी लोकसभा निवडणुकीत त्यावर TV9च्या मुलाखतीत उत्तर दिलेलं आहे. आधी अडीच वर्षे भाजपचाच मुख्यमंत्री होणार होता, त्यामुळं आपण बोललो नाही असं उद्धव ठाकरे म्हणाले होते. पण अडीच वर्षावरुन तरी मोदी आणि शाह जाहीर सभेत कुठं बोलले, असा प्रतिसवाल राज ठाकरेंनी केला आहे.

राज ठाकरेंची तोफ मुख्यमंत्री शिंदेंवरही जोरदार बरसतेय. त्यावरुन TV9चे संपादक उमेश कुमावतांनी राज ठाकरेंना मुलाखतीत हाच थेट प्रश्न विचारला. त्यावर मनसे अध्यक्षांनी रोखठोक उत्तर दिलं आहे. माहिममध्ये अमित ठाकरेंच्या विरोधात शिंदेंनीही विद्यमान आमदार सदा सरवणकरांना मैदानात उतरवलं. त्यावरुन शिंदे आणि मनसेच्या पदाधिकाऱ्यांमध्ये शाब्दिक चकमकही सुरु झाली. मात्र आपण अमित ठाकरेंसाठी उमेदवार मागे घ्या म्हणून गळ घातली नाही, असं सडेतोड उत्तर राज ठाकरेंनी दिली आहे.

राज ठाकरे यांनी चर्चा न करताच माहिममध्ये उमेदवार दिल्याचं स्वत: मुख्यमंत्री शिंदे म्हणाले होते. त्यावर शिंदेंचीच पहिली निवडणूक आहे म्हणत, चर्चा काय करणार असं राज ठाकरे म्हणाले. राज ठाकरेंनी मतदानाच्या आधीच आपण महायुतीसोबत जाणार असल्याचं सांगितलं. मग असं असतानाही ते शिंदेंवर टीका करतायत. त्यावरुनही राज ठाकरेंना सवाल केला.

महायुतीसोबत जाणार मग शिंदेंवर टीका का ? मुंबईत भाजपच्या बड्या नेत्यांविरोधात मनसेनं उमेदवार दिलेला नाही. पण शिंदेंच्या उमेदवारांच्या विरोधात मनसेनं आपले उमेदवार उभे केलेत. त्यामुळं छुपी युतीवरुनही टीका होतेय. पण ज्या ठिकाणाहून मागणी झाली नाही, तिथं उमेदवार दिलेला नाही असं राज ठाकरेंनी म्हटलं आहे.

राज ठाकरेंच्या भाषणातील टीका आणि भूमिका यावरुन अनेकांच्या मनात बरेच सवाल आहेत. त्या प्रत्येक प्रश्नाचं उत्तर राज ठाकरेंनी TV9च्या मुलाखतीतून दिलं आहे.