‘संकटमोचक’ गिरीश महाजन डॅमेज कंट्रोलसाठी सोलापुरात, पण…, भाजपला हे नाराजीनाट्य महागात पडणार?
सोलापुरात राजकीय घडामोडींना वेग आला आहे. विशेष म्हणजे भाजपच्या गोटात जोरदार हालचाली घडत आहे. भाजपकडून माढा लोकसभा मतदारसंघासाठी रणजितसिंह नाईक निंबाळकर यांना पुन्हा उमेदवारी जाहीर करण्यात आलीय. त्यामुळे मोहिते पाटील गट नाराज झालाय.
सोलापूर | 17 मार्च 2024 : माढ्याचे खासदार रणजितसिंह नाईक निंबाळकर यांना लोकसभा निवडणुकीसाठी उमेदवारी दिल्याने भाजप नेते धैर्यशील मोहिते पाटील हे नाराज झाले आहेत. धैर्यशील मोहिते पाटील हे माढ्यातून लोकसभा निवडणुकीसाठी इच्छुक होते. पण पक्षाकडून रणजितसिंह नाईक निंबाळकर यांना उमेदवारी देण्यात आल्याने धैर्यशील मोहिते पाटील नाराज झाले आहेत. त्यांनी आज अकलूज येथे त्यांच्या शिवरत्न बंगल्यावर बैठक बोलावलेली. या बैठकीला फलटणचे माजी मंत्री रामराजे निंबाळकर, शेकापचे जयंत पाटील, करमाळ्याचे माजी आमदार नारायण आबा पाटील यांच्यासह अनेक दिग्गज नेत्यांची उपस्थिती होती. या बैठकीनंतर मोहिते पाटील यांच्या समर्थकांनी भाजपला परिणाम भोगावे लागणार, अशा इशारा दिला. या सर्व घडामोडींनंतर भाजपचे संकटमोचक म्हणून ख्याती असलेले नेते गिरीश महाजन हे सोलापूरच्या अकलूज येथे दाखल झाले. धैर्यशील मोहिते पाटील यांची नाराजी दूर करण्यसाठी ते अकलूजला आले. पण ते मोहिते पाटील यांच्या शिवरत्न बंगल्याबाहेर दाखल झाले तेव्हा त्यांच्यासमोर मोहिते पाटील यांच्या समर्थकांनी जोरदार घोषणाबाजी केली.
धैर्यशील मोहिते पाटील यांच्या शिवरत्न बंगल्यावर आज सकाळपासून राजकीय घडामोडींना वेग आलेला बघायला मिळतोय. रणजितसिंह नाईक निंबाळकर यांना उमेदवारी जाहीर झाल्यानंतर मोहिते पाटील गट कमालीचा अस्वस्थ झालाय. दोन दिवसांपासून अकलूजमध्ये घडामोडी वाढल्या आहेत. विशेष म्हणजे आज शिवरत्न बंगल्यावर सकाळी भाजपविरोधात बैठकही पार पडल्याची चर्चा आहे. तसेच धैर्यशील मोहिते पाटील यांना उमेदवारी न मिळाल्याने त्यांच्या समर्थक आणि कार्यकर्त्यांमध्ये प्रचंड असंतोष आहे. हाच असंतोष गिरीश महाजन शिवरत्न बंगल्यावर दाखल झाले तेव्हा बघायला मिळाला. कार्यकर्त्यांनी गिरीश महाजन यांच्यासमोर जोरदार घोषणाबाजी केली. माढ्याचे खासदार धैर्यशील पाटील अशी घोषणा कार्यकर्त्यांनी केली.
संकटमोचक डॅमेज कंट्रोल करण्यात यशस्वी होणार?
धैर्यशील मोहिते पाटील यांच्या गटाची सोलापूर जिल्ह्यात चांगली ताकद आहे. त्यामुळे त्यांची नाराजी ही भाजपला परवडणारी नाही. भाजपने याबाबतचा संभाव्य धोका लक्षात ठेवून मंत्री गिरीश महाजन यांना तातडीने डॅमेज कंट्रोल करण्यासाठी अकलूजला पाठवलं आहे. गिरीश महाजन आता धैर्यशील मोहिते पाटील यांची समजूत काढण्यात यशस्वी होतात का? ते पाहणं महत्त्वाचं ठरणार आहे. ते मोहिते पाटलांची समजूत काढण्यात यशस्वी झाले तर भाजपला मोठा दिलासा मिळेल. अन्यथा लोकसभा निवडणुकीत भाजपला त्याचा फटका बसू शकतो. या प्रकरणात आता काय-काय घडामोडी घडतात? ते पाहणं महत्त्वाचं ठरणार आहे.
