भीम आर्मीकडून देवेंद्र फडणवीस यांचा पुतळा जाळला; नेमकं प्रकरण काय..?
आमच्या मागण्या 8 दिवसात मान्य केल्या नाही तर आतापेक्षा तीव्र आंदोलन करण्याचा इशाराही भीम आर्मी संघटनेकडून देण्यात आला आहे.
सोलापूर : राज्याचे उपमुख्यमंत्री देवेंद्र फडणवीस यांच्याविरोधात सोलापूर जिल्ह्यात जोरदार निदर्शनं करून फडणवीस यांचा निषेध व्यक्त करण्यात आला. यावेळी सोलापूरमध्ये भीम आर्मीकडून देवेंद्र फडणवीस यांचा प्रतिकात्मक पुतळा जाळून निषेध नोंदवण्यात आला. सोलापूर जिल्ह्यातील अल्पवयीन मुलीवर अतिप्रसंग करून हत्येचा प्रयत्न केल्याच्या निषेधार्थ निदर्शने करण्यात आली आहेत.
सोलापूर जिल्ह्यामध्ये ज्या अल्पवयीन मुलीवर अतिप्रसंग करून हत्येचा प्रयत्न केला गेला आहे. त्या प्रकरणातील आरोपींना फाशीची शिक्षा व्हावी, संबंधित पोलीस अधिकारी, हेड कॉन्स्टेबल यांच्यासह आरोपी करून फौजदारी गुन्हे दाखल करण्याची मागणी भीम आर्मीकडून करण्यात आली आहे.
याप्रकरणी देवेंद्र फडणवीस यांनी योग्य ती दखल घेतली गेली नसल्याने त्यांच्याविरोधात जोरदार घोषणाबाजी करून त्यांचा निषेध व्यक्त करण्यात आला.
सोलापूर जिल्ह्यातील ज्या पिडीतेवर अतिप्रसंग झाला आहे. तिच्या उदर निर्वाहासाठी 50 लाख रुपये शासनाने रक्कम देण्याची मागणी भीम आर्मी संघटनेकडून करण्यात आली आहे.
गृहमंत्री देवेंद्र फडणवीस यांना आपल्या पत्नीसाठी अधिवेशनात बोलण्यासाठी वेळ आहे मात्र एका अल्पवयीन मुलीवर झालेला बलात्कार त्यांना का दिसत नाही ? असा सवाल आंदोलकांकडून करण्यात आला आहे. त्यामुळे हे प्रकरण अधिकच तापण्याची शक्यता असल्याचे सांगण्यात आले आहे.
त्याच बरोबर आमच्या मागण्या 8 दिवसात मान्य केल्या नाही तर आतापेक्षा तीव्र आंदोलन करण्याचा इशाराही भीम आर्मी संघटनेकडून देण्यात आला आहे.
देवेंद्र फडणवीस यांनी या प्रकरणी लक्ष लागून पिडीतेला न्याय मिळवून देण्याची मागणीही यावेळी करण्यात आली आहे. अर्थसंकल्पीय अधिवेशन चालू असतानाही गंभीर प्रकरणाची दखल सरकार घेत नाही असा आरोपही करण्यात आला आहे.