माजी परिवहन आयुक्तांचा एसटी कर्मचाऱ्यांना सल्ला, तर कर्मचाऱ्यांच्या वाऱ्यावर सोडू नका, राज्य सरकारलाही आवाहन
एसटी कर्मचाऱ्यांच्या इतर मागण्यास राज्य सरकारनं लवकरात लवकर मान्य कराव्यात, असं आवाहनही त्यांनी केलं आहे. एसटी कर्मचाऱ्यांना किमान वेतन श्रेणीत वाढ झाली नाही, त्यांना सुविधाही मिळाल्या नाहीत. म्हणून त्यांच्याकडून मागणी केली जात आहे, असंही त्यांनी सांगितलं.
पुणे : राज्य सरकारमध्ये विलिनीकरणाच्या मागणीवरुन एसटी कर्मचारी चांगलेच आक्रमक झाले आहेत. आझाद मैदानात सुरु असलेल्या एसटी कर्मचाऱ्यांच्या आंदोलनात भाजप आमदार गोपीचंद पडळकर आणि आमदार सदाभाऊ खोतही सहभागी झाले आहेत. तर परिवहन मंत्री अनिल परब संपकरी एसटी कर्मचाऱ्यांना कामावर रुजू होण्याचं आवाहन करत आहेत. अशावेळी माजी परिवहन आयुक्त महेश झगडे यांनी एसटी कर्मचाऱ्यांना महत्वाचा सल्ला दिलाय. त्याचबरोबर राज्य सरकारलाही महत्वाचं आवाहन केलं आहे. (Mahesh Zagde’s advice to ST employees and appeal to Thackeray government)
एसटी महामंडळाचं राज्य शासनात विलिनीकरणाची मागणी कर्मचाऱ्यांनी जास्त काळ लावून धरु नये. राज्य शासनात महामंडळाचं विलिनीकरण शक्य नाही आणि विलिनीकरण करु नये, असं महेश झगडे यांनी म्हटलंय. तर एसटी कर्मचाऱ्यांच्या इतर मागण्यास राज्य सरकारनं लवकरात लवकर मान्य कराव्यात, असं आवाहनही त्यांनी केलं आहे. एसटी कर्मचाऱ्यांना किमान वेतन श्रेणीत वाढ झाली नाही, त्यांना सुविधाही मिळाल्या नाहीत. म्हणून त्यांच्याकडून मागणी केली जात आहे, असंही त्यांनी सांगितलं.
‘एसटी महामंडळाचं महाराष्ट्रासाठी मोठं योगदान’
संपूर्ण देशभरात सगळ्या सेवा या खासगीकरणाकडे चालल्या आहेत. रेल्वे, एअर इंडिया, एमएसईबी यामुळे राज्य शासनात विलिनीकरण शक्य नाही. राज्य सरकारनेही कर्मचाऱ्यांना वाऱ्यावर सोडू नये. एसटी महामंडळाचं महाराष्ट्रासाठी मोठं योगदान आहे. सगळ्यांनी एकत्रित येऊन कर्मचाऱ्यांना काय देता येईल ते बघायला हवं, असंही झगडे म्हणाले.
अनिल परबांचा भाजपला सवाल
परिवहन मंत्री अनिल परब यांनी भाजपवर जोरदार हल्ला चढवला आहे. आम्हाला काही एसटी बंद ठेवण्यात किंवा खाजगी बसेसना स्टँडवर आणण्यात रस नाही. एसटी कामगार राजकारणाचे बळी ठरत आहेत. आज त्यांची भाषा पाहिली तर संप चिघळवण्याचे काम ते करत आहेत, असं सांगतानाच त्यांच्या काळात एसटीचं विलनीकरण का केलं नाही? असा सवाल परब यांनी केला. त्यावेळी राज्याची आणि एसटीची आर्थिक परिस्थिती चांगली होती. सगळ्या गोष्टी व्यवस्थित होत्या. एसटी व्यवस्थित धावत होती. आज जे मागणीसाठी जोरजोरात बोलत होते त्यांचं तर सरकार तेव्हा होतं. केंद्रातही त्यांचंच सरकार होतं. तेव्हा त्यांनी एसटीचं विलनीकरण का केलं नाही? असा सवाल त्यांनी केला. तसेच आज थातूरमातूर उत्तर देणाऱ्यांनी पूर्ण व्हिडीओ दाखवावाच, असं आव्हानच त्यांनी भाजप नेते सुधीर मुनगंटीवार यांना दिलं.
इतर बातम्या :
नवाब मलिकांवर देशद्रोहाचा गुन्हा दाखल करावा, त्यांची NIA चौकशी व्हावी, चंद्रकांत पाटील यांची मागणी
Mahesh Zagde’s advice to ST employees and appeal to Thackeray government