Malnutrition : कुपोषण मुक्तीसाठी ‘बाळ कोपरा’, महिला व बाल विकास विभागाचा नाविन्यपूर्ण उपक्रम

कुपोषण मुक्तीसाठी ‘बाळ कोपरा’

Image Credit source: Google

ठाणे : ग्रामीण भागातील कुपोषणा (Malnutrition)ला आळा घालण्यासाठी शासनाच्या विविध योजनांसह ठाणे जिल्हा परिषद (Thane Zilla Parishad) नेहमीच नाविन्यपूर्ण उपक्रम राबवित असते. जिल्हा परिषदेचे मुख्य कार्यकारी अधिकारी डॉ.भाऊसाहेब दांगडे यांची संकल्पनेनुसार या आर्थिक वर्षात महिला व बाल विकास विभागा (Women and Child Development Department)च्या माध्यमातून अंगणवाडीतील कुपोषित बालकांसाठी ‘बाळ कोपरा’ हा नाविन्यपूर्ण उपक्रम राबविण्यात येणार आहे. त्यासाठी प्रत्येक अंगणवाडीत एक कोपरा तयार करून या कोपऱ्यात क्षार, जीवनसत्वे व सुक्ष्म पोषक तत्वे असणारे खाद्यपदार्थ ठेवण्यात येणार आहे. हे खाद्यपदार्थ बालक स्वतःच्या हाताने खाऊ शकतील अशी व्यवस्था करण्यात येणार आहे.

केंद्र शासनाच्या धोरणाला पूरक

केंद्र शासनाचे राष्ट्रीय पोषण मंडळ (Naional Nutrition Board (NNB) व Food & Nutrition Board (FNB) यांच्या अहवालानुसार वयोगटाप्रमाणे क्षार, जीवनसत्वे व सुक्ष्म पोषक तत्वे (Micronutrients) आहारातून मिळणे आवश्यक असल्याचे नमूद करण्यात आले आहे. त्यामुळे 3 ते 6 वर्षे वयोगटातील बालकांना नियमित आहारा व्यतिरिक्त अतिरिक्त आहार उपलब्ध करून दिल्यास त्यांना योग्य ती प्रथिने व उष्मांक (PROTINE & CALRIES ) मिळून त्यांचे कुपोषण दूर होण्यास मदत होणार आहे. या उपक्रमात अंगणवाडीमध्ये बालकांना नाचणीयुक्त बिस्कीट, राजगिरा स्लाईस, बिस्किट, खोबरा मिक्स वडी आदी अतिरिक्त आहार देण्याचे प्रस्तावित आहे.

ठाणे जिल्हा परिषदेचा महिला व बाल विकास विभागाच्या अखत्यारीत ग्रामीण व आदिवासी भागामधील 9 प्रकल्पातंर्गत एकूण 1,894 केंद्रामध्ये 6 महिने ते 6 वर्षे वयोगटातील 1,31,307 मुले योजनेचा लाभ घेतात. विभागातंर्गत 6 महिने ते 6 वर्षे वयोगटातील बालके व गरोदर स्तनदा माता यांना घरी नेऊन खाण्यायोग्य आहार THR (TAKE FOME RATION) देण्यात येते. तसेच 3 ते 6 वर्षे वयोगटातील अंगणवाडीतील बालकांना अंगणवाडीमध्ये गरम ताजा आहार देण्यात येतो. अशी माहिती जिल्हा कार्यक्रम अधिकारी (महिला व बाल विकास) संजय बागुल यांनी दिली. (New Scheme initiative of Women and Child Development Department for malnutrition)