Maharashtra Political News live : पुण्यात आज महायुतीची महत्वाची बैठक

महाराष्ट्र नवनिर्माण सेनेच्या वतीने द. मुंबई महायुतीच्या उमेदवार यामिनी यशवंत जाधव यांच्या प्रचारासाठी कार्यकर्ता मेळाव्याचे आयोजन करण्यात आलं आहे. या कार्यक्रमाला मनसे नेते बाळा नांदगावकर, राज्यसभा खासदार मिलिंद देवरा, विधानसभा अध्यक्ष राहुल नार्वेकर, मंत्री मंगलप्रभात लोढा यांची उपस्थिती राहण्याची शक्यता आहे. शिवसेना आमदार यामिनी जाधव यांच्या प्रचाराला सुरुवात झाली आहे. ठाकरे गटाचे नेते अरविंद सावंत यांच्या विरोधात यामिनी जाधव उभ्या आहेत.

मुंबई हायकोर्टाकडून राज्य सरकारला मोठा दिलासा मिळाला आहे.  औरंगाबाद आणि उस्मानाबादच्या नामांतराच्या अध्यादेशाचा विरोधातल्या सर्व याचिका हायकोर्टाने फेटाळल्या आहेत. राज्य सरकारने औरंगाबादचे छत्रपती संभाजीनगर आणि उस्मानाबादचे धाराशिव असे केले नामांतर आहे. या नामांतराला विरोध करणाऱ्या याचिका मुंबई हायकोर्टाने फेटाळल्या आहेत. नामांतराच्या अध्यादेशामुळे संविधानिक अधिकारांचे उल्लंघन झाले नसल्याचे निरीक्षण हायकोर्टाने मांडले आहे..

भाजप नेते गिरिराज सिंह म्हणाले की, मला वाटते की सॅम पित्रोदा हे राहुल गांधींचे गुरू आहेत. कधी ते शिव्या देतात, तर कधी दक्षिण भारत-उत्तर भारताच्या विभाजनाची चर्चा करतात. याबाबत राहुल गांधी आणि सोनिया गांधी यांनी माफी मागावी.

टेंडर कमिशन मनी लॉन्ड्रिंग प्रकरणी अंमलबजावणी संचालनालय (ईडी) टीम रांची येथील ग्रामीण विकास मंत्रालयाच्या कार्यालयावर छापा टाकत आहे. ग्रामीण विकास मंत्रालयाचे कार्यालय प्रकल्प भवनात आहे. मंत्री आलमगीर आलम यांचे स्वीय सचिव संजीव लाल यांच्यासह ईडीची टीम पोहोचली आहे.

नॅशनल कॉन्फरन्सचे उपाध्यक्ष आणि बारामुल्ला लोकसभा मतदारसंघाचे उमेदवार ओमर अब्दुल्ला म्हणाले की, जम्मू-काश्मीरमध्ये असे काही भाग आहेत ज्यांना आम्ही दहशतवादापासून मुक्त केले होते, परंतु आता पुन्हा बंदुकांचा प्रभाव तेथे दिसत आहे. माझ्या सत्तेच्या काळात अनेक क्षेत्रे दहशतवादापासून पूर्णपणे मुक्त होती, मात्र आता तेथे नव्याने दहशतवाद सुरू झाला आहे.

गुजरातच्या सौराष्ट्रमध्ये भूकंपाचे सौम्य धक्के जाणवले. रिश्टर स्केलवर भूकंपाची तीव्रता 3.4 इतकी होती. यात कोणतीही जीवित किंवा वित्त हानी झालेली नाही. बुधवारी दुपारी 3 वाजून 18 मिनिटांनी हे धक्के सौराष्ट्रच्या तलाला शहरात जाणवले. भूकंपाचा केंद्रबिंदू तलालापासून 12 किमी लांब उत्तर पूर्वमध्ये होता.

काँग्रेस उमेदवार गोवाल पाडवी यांच्या प्रचारासाठी प्रियंका गांधी यांची सभा होणार होती. परंतु प्रियांका गांधी यांना उत्तर प्रदेशची जबाबदारी दिलेली असल्याने त्यांची नंदुरबार येथे होणार सभा रद्द झाली आहे.

डोंबिवलीमध्ये महायुतीच्या पदाधिकारी व कार्यकर्त्यांची महत्त्वाची बैठक. पंतप्रधान नरेंद्र मोदी आणि राज ठाकरे यांच्या सभेच्या नियोजनासाठी ठेवण्यात आली बैठक. डोंबिवलीच्या ग्लोब हॉलमध्ये आयोजित करण्यात आली आहे बैठक. बैठकीत मनसे आमदार राजू पाटील महायुतीचे उमेदवार डॉक्टर श्रीकांत शिंदे त्याचबरोबर भाजपचे पदाधिकारी सह इतर मित्र पक्षाचे पदाधिकारी देखील उपस्थित आहेत.

शरद पवार गट काँग्रेसमध्ये विलीन होण्यासंदर्भात शरद पवारांनी मुलाखतीत नकार दिला नाहीय, आमच्या सहकार्यांशी चर्चा करून निर्णय घेणार असं शरद पवारांनी म्हटलंय, असे काँग्रेस नेते पृथ्वीराज चव्हाण यांनी म्हटले आहे.

तुम्ही आजपर्यंत अनेक निवडणूक पहिल्या असतील, पहिले निवडणूक जाहीर झाली की एकाच दिवशी निवडणूक होत आहे. मात्र आज पाच टप्प्यात निवडणूक होत आहे, राज्यात जास्त प्रचार करता यावा यासाठी त्यांनी वेळापत्रक बद्दल, असे शरद पवार यांनी म्हटले.

आतापर्यंत झालेल्या एकाही पालकमंत्र्याने बीड जिल्ह्यासाठी काहीही केले नाही. काल अंबाजोगाई येथील सभेत माझ्यावर बोलले. त्यांनी अभ्यास करून माझ्यावर बोलावे. असे म्हणत सुरेश धस यांच्यावर निशाणा साधला.

बारामती लोकसभेच्या मतदानाच्या दिवशी पैसे वाटपावरून विरोधक बिनबुडाचे आरोप करत आहेत. पराभव दिसत असल्याने हे आरोप होतायत, यात काही तथ्य नाही. बारामती लोकसभेतून राष्ट्रवादीच्या सुनेत्रा पवारच निवडून येतील, कोणी रडल काही झालं, तरी सुनेत्रा पवार पाच हजाराने का होईना निवडून येतील असा विश्वास महादेव जानकर

पंतप्रधान नरेंद्र मोदींच्या वक्तव्यावर बिहारचे माजी उपमुख्यमंत्री आणि आरजेडी नेते तेजस्वी यादव म्हणाले, “पंतप्रधानांना माहित आहे की यावेळी त्यांचं जाणं निश्चित आहे. हुकूमशाही सरकारला हटवण्यासाठी तिसऱ्या टप्प्यातील निवडणुकांमध्ये आमची स्थिती चांगली आहे. आम्हाला विश्वास आहे की 4 जूनला इंडिया आघाडी सरकार स्थापन करणार आहे.”

“हे लोक संविधान बदलण्याबद्दल बोलत आहेत. जेव्हा ही गोष्ट लोकांमध्ये पसरू लागली, तेव्हा पंतप्रधान मोदींना वाटलं की निवडणुकीत नुकसान होईल, म्हणून ते म्हणाले की आम्ही संविधान बदलणार नाही. पण सत्य हे आहे की त्यांनी अशा अनेक गोष्टी केल्या आहेत ज्यामुळे लोक कमकुवत झाले आहेत, त्यामुळे तुम्ही तुमच्या भविष्यासाठी मतदान करा,” असं आवाहन प्रियंका गांधी यांनी केलं.

अमोल कोल्हेना कसं निवडून आणलं ते अगदी कोल्हेंनी राजीनामा देण्याचा अट्टाहास धरला, याचा लेखाजोखा अजित पवारांनी पुन्हा मांडला.
अमोल कोल्हेनी छत्रपती शिवाजी महाराजांचा गनिमी काव्याचा प्रसंग एका चित्रपटात मांडला. त्या चित्रपटानंतर घडलेला प्रसंग अजित पवारांनी उपस्थितांसमोर मांडला. छत्रपती शिवाजी महाराजांची भूमिका ते अगदी महात्मा गांधींची हत्या करणाऱ्या गोडसेंची भूमिका, अरे काय केलं हे तुम्ही. समाज व्यसनाधीन होईल, अशा जाहिराती करून आपलं पोट भरू नये. पण यांचं काय चाललंय? असं म्हणत अजित पवारांनी अमोल कोल्हेंच्या अभिनयावर प्रश्न उपस्थित केला.

मुंबईला पाणीपुरवठा करणाऱ्या धरणांतील पाणीसाठा दिवसेंदिवस कमी होत आहे. मात्र उपलब्ध जलसाठा आणि राखीव साठा 31 जुलैपर्यंत पुरेल अशा रितीने पुरवठ्याचं नियोजन करण्यात आल्याचं मुंबई महापालिका प्रशासनाने स्पष्ट केलं. मुंबईकरांनी काळजी करू नये, मात्र सर्वांनी पाण्याचा काटकसरीने वापर करणे आवश्यक आहे, असं आवाहन आयुक्तांनी केलंय.

ज्या उमेदवाराने पाच पक्ष बदल बदलले. फडणवीसांनी ही मला सांगितलं, कोल्हेंनी भाजपचे दार ठोठावले. त्यामुळं कोल्हेंनी निष्ठेबद्दल बोलू नये… अमोल कोल्हे यांच्याकडे विकासाचे मुद्दे नाही म्हणून जनतेची दिशाभूल करत आहे… असं वक्तव्य शिवाजी आढळराव यांनी केलं आहे.

नुकताच पुण्याला राहुल गांधी आले असता राहुल गांधींनी मला सांगितलं… राज्यात सर्वत्रकडे प्रादेशिक पक्ष काँग्रेसमध्ये समाविष्ट होतील ही चर्चा… भाजपच्या तानाशाहीचा विरोधात अनेक पक्ष एकत्र येणार आहेत… अनेक पक्षांनी भाजपच्या विरोधात त्यांच्या तानाशाहीच्या विरोधात मूड बांधावी असं राहुल गांधींनी सांगितलं त्यामुळे शरद पवारांच्या वक्तव्यात तथ्य आहे… असं वक्तव्य नाना पाटोले यांनी केलं आहे.

उपमुख्यमंत्री देवेंद्र फडणवीस यांच्या सभेचे शिरपूर मध्ये आयोजन… नंदुरबार लोकसभेच्या महायुतीच्या उमेदवार मीना गावित यांच्या प्रचारार्थ सभेचे आयोजन… उपमुख्यमंत्री देवेंद्र फडणवीस शिरपूरमध्ये दाखल

ठाणे लोकसभेचे शिवसेना महायुतीचे अधिकृत उमेदवार नरेश मस्के यांच्या प्रचाराला ठाण्यातून सुरुवात… प्रचार रॅलीमध्ये भाजप आमदार संजय केळकर, शिवसेना माजी आमदार रवींद्र फाटक सह पदाधिकारी उपस्थित… प्रचार रॅलीमध्ये भाजप आमदार संजय केळकर, शिवसेना माजी आमदार रवींद्र फाटक सह पदाधिकारी उपस्थित

सुप्रिया सुळे चौथ्या टप्प्यातील होणाऱ्या मतदारसंघाच्या प्रचारात सक्रिय होणार आहेत. शिरूर आणि मावळात सुप्रिया सुळे प्रचार करणार आहेत. अजित पवारांनी अमोल कोल्हेंना आव्हान दिल्यानं त्या शिरूरमध्ये स्वतः लक्ष घालणार आहेत.

महायुतीचे उमेदवार खासदार हेमंत गोडसे आज मंत्री छगन भुजबळांची भेट घेणार आहेत. छगन भुजबळ यांचं निवासस्थान असलेल्या भुजबळ फॉर्मवर दोघांची भेट होईल. उमेदवारी जाहीर झाल्यानंतर प्रथमच गोडसे भुजबळ फॉर्मवर जाणार आहेत.

दत्ता भारणे यांच्या व्हिडिओ प्रकरणात रुपाली चाकणकर यांनी एक मागणी केली आहे. एक ते दीड महिन्यापासून रोहित पवार अशा प्रकारचे ट्विट करत आहे, त्यांची भावना ही नैराश्यातून आलेली आहे. त्यामुळे रोहित पवारांवर निवडणूक आयोगाने लक्ष ठेवावे, अशी मागणी त्यांनी केली आहे.

बारामतीमध्ये 60 टक्के मतदान झालेले आहे पण मतदानाचा आकडा वाढायला पाहिजे होता, असे राज्य महिला आयोगाच्या अध्यक्ष आणि राष्ट्रवादी अजित पवार गटाच्या नेत्या रुपाली चाकणकर म्हणाल्या. बुथवर मात्र अनेक मतदारांचे नाव गहाळ झाली होती.पुढच्या निवडणुकीपर्यंत आम्ही या संदर्भात नक्की विचार करू असे त्यांनी स्पष्ट केले.

मुंबईच्या बीकेसी मैदानात सभा घेण्यासाठी महायूती आणि महाविकास आघाडी दोघांनीही एमएमआरडीएकडे परवानगी मागितली आहे. दोघांच्या अर्जावर विचार सुरु आहे. बीकेसी बुलेट ट्रेनच्या बाजूच्या प्लॉटवर सभा होणार आहे. या सभेला मोदी हजर लावणार आहेत.

लोकशाही प्रक्रियेत प्रत्येक मतदार महत्वाचा असल्याने भोर विधानसभा मतदारसंघातील रायरेश्वर मतदान केंद्रापर्यंत पोहोचण्यासाठी लोखंडी शिडीचा वापर करून मतदान पथकाने परवा एक तास पायी प्रवास केला आणि आज हेच पथक परतले आहे.

प्रस्थापित विरुद्ध विस्थापित लढाईची सुरुवात सांगलीत लोकसभा निवडणुकीतून झाली. प्रस्थापितांच्या मतांच्या विभागणीमुळे आपला विजय निश्चित असून येत्या 4 जूनला सांगली लोकसभा मतदार संघात गुलाल आणि भंडारा हा नक्कीच उधळला जाईल,असा विश्वास ओबीसी बहुजन पार्टीचे सांगली लोकसभा उमेदवार प्रकाश शेंडगे यांनी व्यक्त केला आहे.

मतदान संपताच बारामती लोकसभा मतदारसंघात गोळीबार. वारजे येथील रामनगरमध्ये दुचाकीवरुन आलेल्या दोघांनी हवेत केला गोळीबार. रात्री साडे दहा वाजताची घटना. आरोपीं गोळीबार करुन मुंबई पुणे हायवे वरुन कात्रजच्या दिशेने गेले पळून. गोळीबार केलेल्या आरोपींचा वारजे पोलिसांकडून शोध सुरु.

मालेगाव तालुक्यातील डोंगराळेसह परिसरातील नागरिकांनी संतापात फोडला टोल नाका. टोल कर्मचाऱ्याकडून स्थानिकांना अरेरावी केल्याने फोडला टोलनाका. स्थानिकांनी सर्व लेनवरील टोल कार्यालय फोडले. टोल नाक्याचे कॉम्पुटर, कॅमेऱ्यासह सर्वत्र तोडफोड करुन लोखोंचे नुकसान. स्थानिक आणि टोल कर्मचाऱ्यांमध्ये अनेकदा होतात वाद.

पुण्यातील आरपीआय सचिन खरात गटातील अनेकांचे राजीनामे. सचिन खरात यांच्यावर नाराजी व्यक्त करत दिले राजीनामे. राज्यातील अनेक ठिकाणी खरात गटाला झटका. खरात गट सध्या महायुतीमध्ये अजित पवार यांच्यासोबत आहे. कार्यकर्त्यांच्या भावना समजून घेतल्या नाहीत म्हणून अनेकांनी दिले राजीनामे.

मुंबईच्या बीकेसी मैदानात सभा घेण्यासाठी महायुती आणि महाविकास आघाडी दोघांनीही एमएमआरडीएकडे मागितली परवानगी. दोघांच्या अर्जावर विचार सुरु. बीकेसी बुलेट ट्रेनच्या बाजूच्या प्लॉटवर होणार सभा. सभेला मोदींची हजेरी लागणार, नियोजनास सुरुवात.

लोकसभा निवडणुकीच्या तोंडावर पुण्यात एमआयएमला खिंडार पडले आहे. एमआयएमच्या नगरसेविका अश्विनी लांडगे व एमआयएमचे नेते डॅनियल लांडगे यांनी काँग्रेस पक्षात प्रवेश केला आहे. अनेक कार्यकर्त्यांसह त्यांनी काँग्रेस पक्षात प्रवेश केला आहे.

नाशिक जिल्ह्यातील इगतपुरी आणि त्र्यंबकेश्वर परिसरातील 7 ते 8 आदिवासी वाड्यावरील नागरिकांनी मतदानावर बहिष्कार टाकला आहे. गेल्या अनेक वर्षांपासून मागणी करून देखील मूलभूत सुविधा मिळत नसल्याने नागरिकांनी हा निर्णय घेतला आहे. लचकेवाडी, डोंगरवाडी, तोरणवाडी, गणेशनगरसह काही वाड्यावरील नागरिक आक्रमक झाले आहेत.

तीन लाख नागपूरकरांनी 59 कोटी रुपयांचा मालमत्ता कर भरला नाही. नागपूर महापालिकेने कर भरण्यासाठी सवलत देऊनही त्याचा उपयोग झाला नाही. त्यामुळे महापालिकेचे आर्थिक गणित बिघडणार का? असा प्रश्न निर्माण झाला आहे.

बारामतीनंतर आता पुणे लोकसभा निवडणुकीकडे महायुतीने लक्ष केंद्रीत केले आहे. त्यासाठी पुण्यात आज महायुतीची बैठक पार पडत आहे. बैठकीला मंत्री चंद्रकांत पाटील, उपमुख्यमंत्री अजित पवार उपस्थित राहणार आहेत. १३ मे रोजी पुणे लोकसभेसाठी मतदान पर पडतंय त्याच्या संदर्भात रणनीती आखण्यासाठी आणि कार्यकर्त्यांना मार्गदर्शन करण्यासाठी ही बैठक घेण्यात आली आहे.