Maharashtra Breaking News LIVE 16 January 2025 : प्रथमदर्शनी चोरीसाठी चोर सैफच्या घरात शिरल्याचे दिसत आह – पोलीस

सैफ अली खान यांच्या घरी चोरीसाठी चोर शिरल्याचे प्रथमदर्शनी दिसत असल्याचे पोलिसांनी स्पष्ट केले आहे.

मंत्री धनंजय मुंडे  परळी वैद्यनाथाचे दर्शन घेऊन त्यांच्या कार्यालयाकडे रवाना झाले आहेत.

कालव्यातून होणारा बेकायदेशीर पाणी उपसा थांबवा, अशा सूचना मंत्री राधाकृष्ण विखे पाटील यांनी जलसंपदा अधिकाऱ्यांना दिल्या आहेत. डोंगळे, मोटार लावून पाणी चोरी थांबवावी. वेळ आल्यास जिल्हाधिकारी आणि पोलीस प्रशासनाची मदत घ्या. टेलपर्यंत पाणी प्रथम पोहोचवा, अशा सूचना विखे पाटलांनी दिल्या आहेत.

वांद्रे पोलीस पथकाने सैफ अली खानच्या घरी काम करणाऱ्या मोलकरीणीला पोलीस ठाण्यात आणलं असून तिची चौकशी केली जात आहे. जेव्हा ती व्यक्ती घरात शिरली, तेव्हा मोलकरीणीने सर्वांत आधी त्याला पाहिलं आणि आरडाओरडा सुरू केला. त्यानंतर त्यावेळी घरात उपस्थित असलेला सैफ अली खान तिथे पोहोचला.

सैफ अली खानवर शस्त्रक्रिया पूर्ण झाली असून त्याची प्रकृती स्थिर असल्याची माहिती समोर येत आहे. सैफवर आरोपीने सहा वार केले होते. लिलावती रुग्णालयात सैफवर उपचार सुरू आहेत.

सैफ अली खानच्या हल्लेखोराचा शोध घेण्यासाठी मुंबई गुन्हे शाखेने कंबर कसली आहे. मुंबई गुन्हे शाखेच्या आठ टीम तपासात जुंपल्या आहेत. एन्काऊंटर स्पेशलिस्ट दया नायक देखील तपास करत आहेत.

सैफ अली खानवरील हल्ल्याचा तपास करण्यासाठी मुंबई गुन्हे शाखेच्या 8 टीम स्थापना करण्यात आली आहे आणि मुंबई पोलिसांच्या 7 टीम कार्यरत आहेत. सैफ अली खानवरील हल्ल्याप्रकरणी एकूण 15 टीम तपास करत आहेत.

“सैफ अली खानवरील हल्ला पूर्वनियोजीत कटाचा भाग असू शकतो. त्याला जीवे मारण्याच्या हेतूने हल्ला करण्यात आला असेल. मुलाचं नाव तैमुर ठेवण्यात आलं तेव्हापासून सैफला टार्गेट केलं जात आहे” असं वक्तव्य राष्ट्रवादी शरद पवार गटाचे आमदार जितेंद्र आव्हाड यांनी केलं आहे. सैफ अली खान याच्या हल्ल्यावर जितेंद्र आव्हाड यांनी प्रतिक्रिया दिली आहे.

अभिनेता सैफ अली खानवर मध्यरात्री अडीच वाजता वाजण्याच्या सुमारास चाकूने हल्ला करण्यात आल्याची धक्कादायक घटनेंन सर्वांनाच विचारात पाडलं आहे. अभिनेत्याला लीलावती रुग्णालयात दाखल करण्यात आले आहे, जिथे त्याच्यावर शस्त्रक्रिया करण्यात आली आहे. त्याच्या तब्येतीबद्दल चाहते चिंतेत आहेत. पोलिसांकडून चाहत्यांना शांतता ठेवण्याचे वारंवार आवाहन करण्यात येत आहे. तसेच आता सैफची लेक सारा अली खानही लिलावतीमध्ये दाखल झाली आहे.

सांगली कृषी उत्पन्न बाजार समितीमध्ये तूरीचे दर घसरले आहेत. साडेतेरा हजार प्रतिक्विंटल इतका दर झाला आहे. त्यामुळे आता तूरडाळचे दर देखील कमी होत आहेत. जवळपास 40 रुपये इतका दर तूरडाळ मध्ये कमी झाला आहे.यामुळे तूर डाळीचे गगनाला भिडलेले दर आता सर्वसामान्यांच्या आवाक्यात येणार आहेत.

बारामतीमध्ये शरद पवार आणि अजित पवार एकाच मंचावर. बारामतीमधील कृषी प्रदर्शनाच्या निमित्ताने दोन्ही नेते एकाच मंचावर आले आहेत. मात्र शरद पवार आणि अजित पवार यांची आसनव्यवस्था एकमेकांच्या शेजारी नाही. त्या दोघांच्या खुर्चीमध्ये अजित जावकर यांची खुर्ची ठेवण्यात आली.

पुणे  जबरी चोरी आणि मोक्काच्या गुन्ह्यातील 6 महिन्यापासून फरारी असलेला आरोपीला गुन्हे शाखा, युनिट-4 ने ताब्यात घेतले.  युनिट-4 चे पथक पेट्रोलिंग करत असताना आरोपी अक्षय सुरेश गायकवाड याला आंबेडकर पुतळा डीपी रोड औंध येथून ताब्यात घेण्यात आले .

लाडक्या बहिणींना जानेवारीच्या हप्त्यासाठी वाट बघावी लागणार, मकर संक्रातीला हप्ता येण्याची शक्यता होती . मात्र जानेवारीचा हप्ता देण्याचा अद्याप कुठलाच निर्णय नाही.  राज्य मंत्रिमंडळाच्या बैठकीत हप्ता देण्याचे निर्णय होतात मात्र अद्याप यावर निर्णय नाही.

सैफ अली खानवर हल्ला करणारी व्यक्ती ही रात्रभर घरात दबा धरून बसली होती. ⁠रात्री २ वाजता त्याचा घरातील महिला कर्मचाऱ्यांशी वाद सूरु असल्याचा आवाज सैफ यांना आला. तो बाहेर आला आणि त्या व्यक्तीने सैफवर हल्ला केला. ⁠हल्लेखोर हा घरातील महिला कर्मचाऱ्यांशी संबंधित होता का ? तो आत कसा आला? तो चोरी करण्यासाठी आला होता का ? याचा पोलिस तपास करत आहेत.

आज धुळे जिल्हा परिषदेचा कार्यकाळ संपणार आहे. जिल्हा परिषदेबरोबरच चारही पंचायत समितीचा कार्यकाळ आज संपणार आहे.  धुळे जिल्ह्यातील धुळे शिरपूर शिंदखेडा साक्री पंचायत समितीचा कार्यकाळ संपणार आहे. प्रशासक जिल्हा परिषदेसह पंचायत समितीचे कामकाज पाहणार आहे. धुळे जिल्हा परिषदेच्या सदस्यांच्या वतीने मुदत वाढवून मिळवण्यासाठी महासभेत ठराव करण्यात आला होता. जोपर्यंत निवडणुका लागत नाही तोपर्यंत प्रशासन बघणार जिल्हा परिषद आणि पंचायत समितीचे काम पाहणार आहेत.

भाजपकडून दिल्ली विधानसभेसाठी स्टार प्रचारकांची यादी प्रसारित करण्यात आली. महाराष्ट्रातून देवेंद्र फडणवीस, नितीन गडकरी, पीयूष गोयल हे स्टार प्रचारक असणार आहेत. तसेच सर्व भाजपशासित राज्याचे मुख्यमंत्री स्टार प्रचारक असतील, अशी माहिती देण्यात आली आहे.

वांद्रे पोलीस आणि गुन्हे शाखेचे पथक अभिनेता सैफ अली खानच्या घरी पोहोचले आहे.  पोलिस सैफ अली खानच्या इमारतीतील सीसीटीव्ही आणि आजूबाजूच्या इमारतींचे सीसीटीव्ही तपासत आहेत. हल्लेखोर कोण होता, तो कुठून आला आणि त्याने कोणत्या उद्देशाने हल्ला केला, याबाबतची माहिती अद्याप पोलिसांना मिळालेली नाही.

पोलिसांनी सैफ अली खानच्या घरात काम करणाऱ्या आणि सुरक्षेचे काम करणाऱ्या लोकांचे मोबाईल जप्त केले आहेत. पोलिसांनी काही लोकांना चौकशीसाठी पोलीस ठाण्यात नेले आहे.

“सैफ अली खानला मध्यरात्री 3.30 वाजताच्या सुमारास लिलावती रुग्णालयात आणलं गेलं. त्याच्या शरीरावर एकूण सहा जखमा होत्या आणि त्यापैकी दोन खोलवर झाल्या आहेत. एक जखम त्याच्या पाठीच्या कण्याजवळ आहे. आम्ही त्याच्यावर उपचार करत आहोत. न्यूरोसर्जन नितीन डांगे, कॉस्मेटिक सर्जन लीना जैन आणि अॅनेस्थेटिस्ट निशा गांधी त्याच्यावर उपचार करत आहेत. सैफवर सर्जरी झाल्यानंतरच आम्ही अधिक माहिती देऊ शकू”, असं लिलावती रुग्णालयाचे सीईओ नीरज उत्तमणी यांनी स्पष्ट केलं.

घरात शिरलेल्या चोराकडून सैफ अली खानवर चाकू हल्ला झाला. त्याला उपचारांसाठी लीलावती रुग्णालयात दाखल करण्यात आलं आहे. सैफ अली खानची प्रकृती स्थिर असल्याची माहिती डॉक्टरांनी दिली आहे. मध्यरात्री अडीच वाजताच्या सुमारास सैफवर झाला हल्ला. त्याच्या शरीरावर एकूण सहा जखमा होत्या आणि त्यापैकी दोन खोलवर आहेत.

पक्ष विरोधी काम करणाऱ्यांना पुन्हा पक्षात घेऊ नका. भाजपातील निष्ठावंत पाठवणार मुख्यमंत्री फडणवीस आणि प्रदेशाध्यक्ष बावनकुळे यांना अहवाल. महापालिका निवडणुकीच्या तोंडावर भाजप सोडलेले अनेक लोक परतीच्या वाटेवर. विधानसभा निवडणुकीत विरोधात काम करणाऱ्यांना पुन्हा घेऊ नये. अन्यथा पक्षात असंतोष निर्माण होण्याची व्यक्त केली भीती.

पुणे जिल्ह्यातील आंबेगाव तालुक्यात म्हणजेच भिमाशंकर परिसरात आता स्ट्रॉबेरीचं नवं क्लस्टर तयार होतंय. मागच्या दोन वर्षात येथील शेतकऱ्यांची आणि स्ट्रॉबेरी क्षेत्राची 10 पटीने वाढ झाली असून जवळपास तीन हेक्टरच्या वर स्ट्रॉबेरीची लागवड झाली आहे

अमरावतीकरांना आता मिळणार दोन वंदे भारत एक्स्प्रेस. अमरावती ते पुणे आणि अमरावती ते मुंबई धावणार वंदे भारत एक्सप्रेस. याबाबतचा प्रस्ताव मध्य रेल्वेने केंद्रीय रेल्वे मंत्रालयाकडे पाठवल्याची माहिती. वंदे भारत एक्सप्रेस सुरू झाल्यास पश्चिम विदर्भातील प्रवाशांना मोठा दिलासा मिळणार.

घरात शिरलेल्या चोराकडून सैफ अली खानवर चाकू हल्ला झाल्याची माहिती आहे. सध्या त्याला उपचारांसाठी लीलावती रुग्णालयात दाखल करण्यात आलं आहे.