Maharashtra Political News live : लोकसभा निवडणूक २०२४ पहिल्या टप्प्यातील प्रचारतोफा आज थंडवणार

सांगली : सांगली जिल्ह्यात आज अवकाळी पावसाने जोरदार हजेरी लावली. तर मिरज पूर्व भागातील अनेक गावांना पावसाने अचानक झोडपले असून वादळी वाऱ्यासह झालेल्या पावसाने अनेक झाडे उनमळून पडली आहेत. तसेच अनेक घरांची पत्रे देखील उडाली आहेत. अवकाळी पावसामुळे पिकांचे नुकसान झाले असून वीज पुरवठा खंडित करण्यात आला होता.

मित्राच्या बायकोला बघतोय असल्याचा जाब विचारण्यास गेलेल्या दोघांवर चाकूचा हल्ला.  आरोपीला रेल्वे पोलिसांनी ठोकल्या बेड्या

केमिकल कंपनीत स्फोटामुळे लागलेल्या भीषण आगीत चार कामगार पूर्णपणे आगीत सापडल्याची जिल्हाधिकारी आणि पालकमंत्री गुलाबराव पाटील यांची माहिती. आगीत एकूण  चार जण बेपत्ता असल्याचीही माहिती.

राजू पारवेंचा विजय पक्का असल्याचे मोठे विधान मुख्यमंत्री एकनाथ शिंदे यांनी नुकताच केले आहे.

धुळे लोकसभा मतदारसंघाचे भाजपाचे उमेदवार डॉक्टर सुभाष भामरे यांच्या प्रचार कार्यालयाचा शुभारंभ.  खासदार सुभाष भामरे यांच्या उपस्थितीत प्रचार कार्यालयाला सुरुवात करण्यात आलीये.

जालना लोकसभेची अधिसूचना गुरुवारी जारी होणार. 18 ते 25 एप्रिल या कालावधीत सकाळी 11 ते 3 वाजेपर्यंत उमेदवारांना अर्ज भरता येणार आहे. एका उमेदवाराला चार अर्ज भरता येणार आहेत. जालना लोकसभा मतदारसंघात महायुतीचे रावसाहेब दानवे आणि महाविकास आघाडीचे डॉक्टर कल्याण काळे यांची प्रचारात आघाडी आहे. जालना लोकसभा मतदार संघात रावसाहेब दानवे सलग पाच वेळा खासदार झाले आहेत. कल्याण काळे यांना काँग्रेसने उमेदवारी दिल्याने रावसाहेब दानवे यांना मोठं आव्हान आहे.

“लोकसभा ही 140 कोटी जनतेची निवडणूक आहे. गावकीची निवडणूक नाही. मोदींची प्रशासनावर पकड आहे. पिंपरी चिंचवडचा चेहरा मोहरा बदलला आहे. कुणाचा फायदा होईल यापेक्षा कुणी फायदा केला याचा विचार करा. राहुल गांधी यांचं नाव नाईलाजाने घ्यावं लागतं. मोदी आणि राहुल गांधी यांची तुलना होऊ शकत नाही,” असं अजित पवार म्हणाले.

उन्हाचा चटका, गरम हवेच्या झळा, उकाड्यामुळे होणारी काहिली आजसुद्धा कायम आहे. मुंबईत गेल्या दहा वर्षांतील एप्रिल महिन्यातील सर्वाधिक तापमानाची नोंद मंगळवारी झाली. सांताक्रूझ केंद्राने सरासरी 39.7 अंश सेल्सिअस कमाल तापमानाची नोंद केली. तर ठाण्यात सरासरी 42 अंश सेल्सिअस तापमान नोंदवण्यात आलं.

“परवापासून मला धमकीचे कॉल येत आहेत. त्यात दाऊद आणि छोटा शकीलचा उल्लेख करण्यात येतोय. आपकी कोई खैर नहीं, आपको मार देंगे. आपको मारना है, अशी धमकी मला दिली. कोणी खोडसाडपणा करत असेल असं मला आधी वाटलं होतं. पण नंतर मी पोलिसांना कळवलं तक्रार दाखल केली आहे,” अशी माहिती एकनाथ खडसे यांनी दिली.

प्रभू श्री राम यांच्या प्रतिमेला वंदन करून युवानेते पार्थ पवार यांच्या बारामती लोकसभा मतदारसंघाच्या प्रचार दौऱ्याला बावधन परिसरातून सुरुवात झाली. यावेळी त्यांनी नागरिकांशी चर्चा करून त्यांच्या अडचणी समजून घेतल्या.

रामनवमी निमित्ताने धुळे शहरात भव्य शोभा यात्रेचे आयोजन करण्यात आले. शोभायात्रेत खासदार सुभाष भामरे यांची उपस्थिती होती. शहरातील शिवतीर्थ चौकापासून शोभा यात्रेची यात्रेची सुरुवात झाली. शोभायात्रेत अयोध्येतील राम मंदिरात बसवलेल्या मूर्तीप्रमाणे मूर्तीची स्थापना करण्यात आली आहे.

गडचिरोली जिल्ह्यातील नक्षलग्रस्त भागात वायुसेनेचे हेलिकॉप्टर आणि मतदान पथके रवाना झाले आहेत. दोन दिवसापासून मतदान पथके पाठवण्याचे काम सध्या ४ हेलिकॉप्टरने सुरू आहे.जीवाची बाजी लावून मतदान करण्यासाठी आम्ही काम करतो अशी मतदान पथकातील कर्मचाऱ्यांनी प्रतिक्रिया दिली आहे.

देशातील युवकांना रोजगार मिळाला पाहिजे हा प्रमुख मुद्दा आहे. त्यासाठी आम्ही आमच्या जाहिरनाम्यात काही आयडिया दिल्या आहेत 30 लाख सरकारी जागा सध्या आहेत त्या मोदींनी भरल्या नाहीत आम्ही त्या सगळ्या जागा भरू, असे आश्वासन राहुल गांधी यांनी दिले आहे.

वंचिताच प्रयोग नेमका कशासाठी, कोणाविरुद्ध लोकसभेच्या मैदानात वंचित उतरली आहे, असे अनेक संभ्रम सर्वसामान्यांनाच नाही तर कार्यकर्त्यांना पण आहेत. वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी आपल्या ट्विटरवर कार्यकर्त्यांना पत्र लिहले आहे.

बारामती लोकसभा मतदारसंघातून रिक्षावाला संघटनेकडून “शरद राम पवार” यांनी उमेदवारी अर्ज दाखल केला आहे. बारामती लोकसभा मतदारसंघात राहणाऱ्या शरद राम पवार नावाच्या व्यक्तीला बघतोय रिक्षावाला या रिक्षा संघटनेने लोकसभेची उमेदवारी दिली आहे. शरद राम पवार हे स्वतः रिक्षाचालक असून गेल्या अनेक वर्षापासून पुण्यातील आंबेगाव बुद्रुक मध्ये वास्तव्यास आहेत. शरद पवार यांच्यासारखं नाव असल्याने राजकीय वर्तुळात शरद राम पवार यांच्या उमेदवारीची विशेष चर्चा सुरु आहे

धैर्यशील मोहिते पाटील आणि उत्तम जानकर एकत्रित येत असल्याचे चित्र आहे. शरद पवारांसोबत सकारात्मक बैठक झाल्याचे त्यांनी सांगितले. आम्ही एकत्र येऊन विकासाचे राजकारण करावे, असं माढाच्या जनतेची इच्छा आहे. उत्तम जानकर 19 तारखेला कार्यकर्त्यांची बैठक घेऊन आपला निर्णय जाहीर करणार आहेत मागचं वैर विसरून एकत्र यावे असं शरद पवारांनी आम्हाला सांगितल्याची माहिती त्यांनी दिली.

महायुतीतील नेते आणि माजी खासदार आनंदराळ अडसूळ यांनी नवनीत राणा यांच्यावर चांगलेच तोंडसूख घेतले. बुलडाणा दौऱ्यावर असताना त्यांनी माध्यमांशी संवाद साधला. त्यावेळी राजकारण सोडेने पण राणा यांच्या प्रचाराला जाणार नसल्याचे निर्धार त्यांनी पुन्हा एकदा बोलून दाखवला

शरद पवारांसोबत सकारात्मक बैठक झाली आहे. आम्ही एकत्र येऊन विकासाचे राजकारण करावे, अशी माढ्याच्या जनतेची इच्छा आहे. उत्तम जानकर 19 तारखेला कार्यकर्त्यांची बैठक घेऊन आपला निर्णय जाहीर करणार आहेत. मागचं वैर विसरून एकत्र यावे असं शरद पवारांनी आम्हाला सांगितलं.

“खरंच त्या पती पत्नीला अक्कल आहे की नाही? हा माझा प्रश्न आहे. नैतिकता नाही, अक्कल नाही. आटापिटा करून मंडळींनी मला थांबविले आणि तिला उमेदवारी दिली. 17 रुपयांच्या साड्या वाटून हीची हवा निर्माण झालीय. नवरा बायकोला बंटी बबली नावं दिली, ती विचारपूर्वक दिली आहेत. मी जाहीर केलेलं आहे, राजकारण सोडेन पण प्रचाराला जाणार नाही” असं आनंदराव अडसूळ म्हणाले.

एकनाथ खडसे यांना दाऊद, छोटा शकील गँगकडून धमकी मिळाल्याने खळबळ. मुक्ताईनगर पोलिसात खडसेंनी दिली फिर्याद. अज्ञात मोबाईल धारकाविरुद्ध अदखलपात्र गुन्हा दाखल. चार वेगवेगळ्या मोबाईल नंबरवरून त्यांना दि. 15 आणि 16 एप्रिल रोजी फोन करण्यात आल्याची तक्रारीत माहिती.

अर्ज भरताना दिलेल्या प्रतिज्ञापत्रात नमूद केली मालमत्ता आणि कर्जाची माहिती. माढ्यातील भाजप आणि राष्ट्रवादी शरद पवार गटाचे उमेदवार कोट्याधीश आहेत. त्याचबरोबर दोघांच्या डोक्यावर 30 कोटीचे कर्ज असल्याचे पाहायला मिळतेय. माढ्याचे भाजप उमेदवार रणजितसिंह नाईक निंबाळकर यांच्या कुटुंबाकडे एकूण 168 कोटींची संपत्ती आहे. शरद पवार गटाचे धैर्यशील मोहिते पाटलांकडे एकूण 40 कोटींची संपत्ती आहे. भाजपचे सोलापूर लोकसभेचे उमेदवार राम सातपुते यांच्याकडे 91 लाखांची मालमत्ता आहे. त्याचबरोबर राम सातपुतेंकडे पिस्तूलाचा परवाना देखील आहे.

पालघर लोकसभा मतदारसंघातील महायुतीच्या उमेदवाराचे खोटे पत्र समाज माध्यमावर प्रसारित झाल्याने खळबळ उडाली आहे. भाजप प्रदेश कार्यालयाच्या वतीने पत्राची गंभीर दखल घेण्यात आली आहे.भाजपच्या कायदा विभागाचे अँड अखिलेश चौबे यांनी मरीन ड्राईव्ह पोलीस ठाण्यात तक्रार दाखल केली आहे.

मुंबईसह राज्यभरात राम नवमी उत्साहात साजरी करण्यात येणार आहे. वडाळ्यातील मंदिरात भाविकांची मांदियाळी झाली आहे. मंदिराला ६० वर्ष पूर्ण झाली आहे. मंदिरात विविध कार्यक्रमाचे आयोजन करण्यात आले आहे.

ईडीने जप्त केलेल्या बंगल्यात जाण्यास डिएसके म्हणजेच दीपक कुलकर्णी यांना परवानगी मिळाली आहे.
ठेवीदारांची फसवणूक केल्याप्रकरणी ईडीने त्यांचा बंगला जप्त केला होता. ईडीच्या विशेष न्यायालयाकडून ही परवानगी मिळाली आहे.

लोकसभा निवडणुकीसाठी पहिल्या टप्प्यातील पूर्व विदर्भातल्या पाच लोकसभा मतदारसंघात आज प्रचार तोफा थंडावणार आहेत. आज सायंकाळनंतर उमेदवारांना जाहीर प्रचार करता येणार नाही. आज प्रचाराचा शेवटचा दिवस असल्यामुळे प्रचार रॅली, सभा आणि मिरवणुकीने गाजणार आहे.