ऐतिहासिक क्षणांना उद्यापासून सुरुवात, वाचा अयोध्येच्या राम मंदिराच्या 6 दिवसांच्या कार्यक्रमांचं वेळापत्रक

अयोध्या | 15 जानेवारी 2024 : येत्या 22 जानेवारीला अयोध्येत भव्य राम मंदिरात, श्रीरामाच्या मूर्तीची प्राणप्रतिष्ठा होणार आहे. त्याआधी उद्यापासून 6 दिवस विधी पूजन सुरु होणार आहे. तर 22 तारखेचा मुहूर्त आणि गर्भगृहात कोण कोण हजर असतील, याचीही माहिती देण्यात आलीय. 22 जानेवारीला भगवान श्री राम लल्लांच्या मूर्तीच्या प्राण प्रतिष्ठेआधी, 6 दिवसांच्या पूजन विधीला सुरुवात होणार आहे. या सहा दिवसांचं वेळापत्रक समोर आलं आहे.

नेमकं काय आहे वेळापत्रक?

• 16 जानेवारीला दशविधी स्नान, विष्णू पूजन
• 17 जानेवारीला शोभायात्रा निघेल आणि शरयू नदीचं पाणी मंदिरात आणलं जाईल
• 18 जानेवारीला गणेश अंबिका पूजन आणि वास्तूपूजन
• 19 जानेवारीला अग्नी आणि नवग्रहांची पूजा, हवन होईल
• 20 जानेवारीला मंदिराच्या गर्भगृहाला शरयू नदीच्या पाण्याचं स्वच्छ केलं जाईल
• 21 जानेवारीला 125 कळसांच्या पाण्याने रामलल्लांच्या मूर्ती जलाभिषेक केला जाईल

पूजन विधी 21 जानेवारीपर्यंत असेल आणि 22 जानेवारीला दुपारी 12 वाजून 20 मिनिटांनी प्राण प्रतिष्ठेला सुरुवात होईल आणि 1 वाजेपर्यंत पूर्ण होईल. प्राण प्रतिष्ठा सुरु असताना मंदिरातल्या गर्भगृहात पंतप्रधान नरेंद्र मोदी, राज्यपाल आनंदीबेन पटेल, मुख्यमंत्री योगी आदित्यनाथ, श्रीराम जन्मभूमि तीर्थ क्षेत्र ट्रस्टचे अध्यक्ष महंत नृत्य गोपाल दास आणि सरसंघचालक मोहनभागवत उपस्थित असतील.