Black Friday: दोन दु:खद बातम्या, एक अपघात.. मोदींच्या आई हीरा बा, फुटबॉलर पेले यांचं निधन, ऋषभ पंतचा अपघात
आजचा दिवस ठरला 'ब्लॅक फ्रायडे'; दिवसाच्या सुरुवातीलाच तीन मोठ्या घटना; दोघांचं निधन तर एकाचा अपघात
नवी दिल्ली: आज शुक्रवार आहे. मात्र हा दिवस ‘ब्लॅक फ्रायडे’पेक्षा कमी नाही. सकाळपासून तीन मोठ्या घटना घडल्या आहेत. एकीकडे जगातील सर्वांत महान फुटबॉलपटू पेले यांचं निधन झालं. तर दुसरीकडे पंतप्रधान नरेंद्र मोदी यांच्या मातोश्री हीरा बा यांनी पहाटे 3.30 वाजता या जगाचा निरोप घेतला. इतकंच नाही तर क्रिकेटर ऋषभ पंत हा भीषण अपघातात जखमी झाला.
ब्राझीलचे फुटबॉलपटू पेले यांचं निधन
ब्राझीलचे फुटबॉलपटू पेले यांचं वयाच्या 82 व्या वर्षी निधन झालं. पेले यांची मुलगी नॅसिमेंटोने इन्स्टाग्रामवर पोस्ट लिहित याबद्दलची माहिती दिली. 20 व्या शतकाचे महान फुटबॉलपटू पेले यांना कोलन कॅन्सर होता आणि गेल्या काही दिवसांपासून ते साओ पाऊलो रुग्णालयात दाखल होते. पेले यांचं मूळ नाव एडसन एरंटेस डो नासिमेंटो होतं. दमदार खेळीमुळे ते ब्लॅक पर्ल, किंग ऑफ फुटबॉल, किंग पेले या नावांनीही ओळखले जायचे. पेले हे त्यांच्या काळातील सर्वांत महागडे फुटबॉलपटू होते.
पंतप्रधान नरेंद्र मोदी यांना मातृशोक
पंतप्रधान नरेंद्र मोदी यांच्या मातोश्री हीरा बा यांनी अहमदाबादमधल्या रुग्णालयात अखेरचा श्वास घेतला. त्या 100 वर्षांच्या होत्या. प्रकृती अस्वास्थ्यामुळे त्यांना मंगळवारी रुग्णालयात दाखल करण्यात आलं होतं. अहमदाबादच्या युएन मेहता रुग्णालयात त्यांनी अखेरचा श्वास घेतला. हीरा बा यांच्या पार्थिवावर गांधीनगर इथल्या स्मशानभूमीत अंत्यसंस्कार पार पडले.
क्रिकेटर ऋषभ पंतचा भीषण अपघात
क्रिकेटर ऋषभ पंतच्या कारचा रुडकी बॉर्डरवरील दिल्ली-देहरादून हायवेवर भीषण अपघात झाला. ऋषभची कार रेलिंगला धडकली आणि त्यानंतर आग लागली. या अपघातात ऋषभ गंभीर जखमी झाला आहे. रुडकी सिव्हिल हॉस्पिटलमध्ये प्राथमिक उपचारानंतर ऋषभला देहरादूनमधील मॅक्स हॉस्पिटलमध्ये हलवण्यात आलं आहे. अपघातावेळी ऋषभ स्वत: गाडी चालवत होता आणि कारमध्ये तो एकटाच होता. ज्याठिकाणी हा अपघात घडला, ती जागा अपघातप्रवण क्षेत्र असल्याचं म्हटलं जातंय.
