Chandigarh Mayor|चंदीगडमध्ये जादूची कांडी फिरली; मुसंडी मारूनही ‘आप’ सत्तेपासून दूर, भाजपचा महापौर!
'आप'ने या ठिकाणी 14 जागा जिंकल्या आहेत. तर भाजपकडे 12 जागा आहेत. त्यामुळे या दोघांमध्येच खरी लढत होती. मात्र, झाले असे की...
चंदीगडः केंद्रशासित प्रदेश चंदीगडमध्ये महापौर पदाच्या निवडणुकीत शनिवारी एक अफलातून निकाल लागला. चक्क बहुमताच्या जवळचा आकडा गाठत जोरदार मुसंडी मारलेल्या ‘आप’ला महापौर पदाची खुर्ची गमवावी लागली. अन् हे पद आपसुकपणे भाजपच्या पारड्यात आले. त्यामुळे महापालिकेत जोरदार हंगामा पाहायला मिळाला. एका अतिशय इंटरेस्टिंग निवडणुकीची ही बित्तमबातमी…
‘आप’ने मारली मुसंडी
चंदीगडच्या महापालिकेत एकूण 35 जागा आहेत. या निवडणुकीचे निकाल 14 डिसेंबर रोजी लागले. यावेळी प्रत्यक्षात कोणाकडेही बहुमत नव्हते. मात्र, पहिल्यांदाच 14 जागा जिंकून आम आदमी पक्षाने प्रस्थापितांना जोरदार धक्का दिला. तर भाजपला 12, काँग्रेसला 8, तर अकाली दलाचा 1 नगरसेवक निवडून आला. या नवनिर्वाचित नगरसेवकांना एक जानेवारी रोजी शपथ देण्यात आली.
नगरसेवक सहलीवर
भाजपने माजी नगरसेवक जगतार सिंह जग्गा यांच्या पत्नी सरबजीत कौर यांना महापौर पदाचा उमेदवार जाहीर केले होते. ‘आप’कडून अंजू कत्याल यांना उमेदवारी देण्यात आली. काँग्रेसने निवडणुकीत सहभागी होणार असल्याची घोषणा केली. मात्र, त्यांनी प्रत्यक्षात उमेदवार दिला नाही. सर्व पक्षांना या निवडणुकीत मोठा घोडेबाजार होण्याची भीती होती. त्यामुळे काँग्रेसने आपल्या नगरसेवकांना राजस्थानच्या जयपूरला पाठवले. ‘आप’चे नगरसेवक दिल्ली, कसौले येथे तळ ठोकून होते. भाजपने आपल्या नगरसेवकांना शिमल्याला पाठवले. हे सारे नगरसेवक शुक्रवारी सायंकाळी वापस आले होते.
अन् कात्रजचा घाट दाखवला
‘आप’ने या ठिकाणी 14 जागा जिंकल्या आहेत. तर भाजपकडे 12 जागा आहेत. त्यामुळे या दोघांमध्येच खरी लढत होती. मात्र, झाले असे की काँग्रेसने देवेंद्र सिंह बाबला यांना पक्षातून बाहेर काढले आहे. या बाबला यांनी नवनिर्वाचित नगरसेवक पत्नी हरप्रीत कौर बबलांसह भाजपला साथ दिली. दुसरीकडे भाजपचे खासदार किरण खेर यांना एक मत टाकण्याचा अधिकार आहे. त्यामुळे भाजपकडे बलाबल 14 झाले. या बळावर त्यांनी महापौरपदी बाजी मारली.
‘आप’चे आंदोलन
एकीकडे पंजाबच्या निवडणुका तोंडावर आल्या आहेत. दुसरीकडे चंदीगढमध्ये मोठी उलथापालथ झालेली पाहायला मिळत आहे. या निवडणुकीत गडबड झाल्याचा आरोप आम आदमी पक्षाच्या नगरेसवकांनी केला आहे. आपच्या नगरसेवकांनी महापौरांच्या खुर्चीच्या मागे धरणे आंदोलन सुरू केले. महापालिकेच्या आत मार्शल बोलावण्यात आले. जोरदार हंगामा झाल्याचा पाहायला मिळाला. आपच्या नगरसेवकांनी महापौरांच्या खुर्चीशेजारीच ठिय्या मांडला. हातातोंडाशी आलेली सत्ता भाजपने हिसकावल्यामुळे ‘आप’चा तीळपापड झाल्याचे पाहायला मिळत आहे.
Gold Price|ओ मेरे सोना रे, सोना रे, सोना…भावात चक्क 600 रुपयांची घसरण, चांदीही 60 हजारांखाली!