Video : एका मालगाडीची दुसऱ्या मालगाडीला जोरदार धडक, दोन्ही गाड्या रेल्वे रुळावरच पलटी; अपघात इतका भयंकर की…

बांकुडा : ओडिशातील बालासोर येथील रेल्वे अपघाताची घटना ताजी असतानाच आज आणखी एक भीषण अपघात झाला आहे. रेल्वे रुळावर उभ्या असलेल्या मालगाडीला समोरून येणाऱ्या मालगाडीने जोरदार धडक दिली. ही धडक इतकी जोरदार होती की मालगाडीचे 12 डब्बे रेल्वे रुळावरून घसरले. या अपघातात कोणतीही मोठी जीवितहानी झाली नाही. मात्र, दुसऱ्या मालगाडीचा मोटरमन जखमी झाला आहे. पश्चिम बंगालच्या बांकुडा येथे ही दुर्घटना घडली आहे.

आज पहाटे 4 वाजता ही भीषण दुर्घटना घडली. एक मालगाडी बांकुराहून बिष्णूपूर येथे जात होती. त्यावेळी ओंदा रेल्वे स्टेशनवरील रेल्वे रुळावरील लूप लाइनवर आणखी एक मालगाडी उभी होती. मागून येणाऱ्या दुसऱ्या मालगाडीने रेल्वे रुळावरील मालगाडीला जोरदार धडक दिली. हा अपघात इतका भयंकर होता की मालगाडीचे डब्बे पटरीवरून उतरून एकमेकांवर चढले. मालगाडीचे एकूण 12 डब्बे रेल्वे रुळावरून उतरले आहेत. दोन्ही मालगाड्या रेल्वे रुळावरच पलटी झाल्या आहेत. त्यामुळे इतर रेल्वे सेवांवरही परिणाम झाला आहे. या अपघातामुळे पुरुलिया हावडा एक्सप्रेस रद्द करण्यता आली आहे. अनेक ठिकाणी एक्सप्रेस थांबवण्यात आल्या आहेत. तर पोरबंदर संतरागाछी एक्सप्रेसला पुरुलिया स्टेशनहून चांडील टाटानगर मार्गे पाठवले जात आहे.

व्हिडीओ व्हायरल

या रेल्वे अपघाताचा एक व्हिडीओ व्हायरल झाला आहे. यात ट्रेनचं इंजिन ट्रॅकच्या बाहेर गेल्याचं दिसत आहे. मालगाड्यांचे अनेक डब्बे पटरीवरून उतरले आहेत. एका मालगाडीचं प्रचंड नुकसान झाल्याचंही या व्हिडीओतून दिसत आहे. सुदैवाने हा मालगाडीचा अपघात असल्याने कोणतीही जीवित हानी झाली नाही. फक्त एका ड्रायव्हरला मार लागला असून त्याच्यावर रुग्णालयात उपचार सुरू आहेत. तसेच मालगाडीचा अपघात झाल्याची माहिती मिळताच रेल्वेच्या कर्मचाऱ्यांनी मदत कार्यास सुरुवात केली आहे. तसेच रेल्वे रुळावरून मालगाडीचे डब्बे हटवण्याचे काम युद्धपातळीवर सुरू करण्यात आलं आहे.

चौकशी होणार

दरम्यान, मालगाड्यांच्या या अपघाताची चौकसी होणार आहे. अधिकाऱ्यांची एक टीम घटनास्थळी दाखल झाली आहे. ज्या डब्ब्यांचं अधिक नुकसान झालंय ते डब्बे आधी रुळावरून हटवले जात आहेत. या अपघातानंतर आता उलटसुलट चर्चांना उधाण आलं आहे. मालगाड्यांऐवजी एक्सप्रेसचा अपघात झाला असता तर मोठी जीवितहानी झाली असती असं सांगितलं जात आहे. नुकताच ओडिशाच्या बालासोर येथे मोठा रेल्वे अपघात झाला होता. या अपघातात 250 हून अधिक लोक ठार झाले होते. तर तब्बल एक हजार प्रवासी जखमी झाले होते.