Anju pakistan | कधीच तुझं तोंड दाखवू नको, अंजू हिच्या पोरीची खदखद; नवराही म्हणाला, आता ती नकोच
सोशल मीडियातून आम्ही जे पाहत आहोत, त्यानुसार तिने लग्न केल्याचं दिसून येत आहे. अंजू खोटं बोलत आहे. तिथूनही ती खोटं बोलत आहे. सर्व काही तीच करते.
जयपूर | 27 जुलै 2023 : भारतातून पाकिस्तानात गेलेल्या अंजूने तिचा प्रियकर नसरुल्ला याच्याशी निकाह केला आहे. त्यांचे फोटोही सोशल मीडियावर व्हायरल झाले आहेत. तिचा निकाहनामाही व्हायरल झाला असून त्यात तिचं नाव फातिमा असं लिहिलं आहे. इस्लाम धर्माचा स्वीकार करून तिने निकाह केला आहे. त्यामुळे तिचे कुटुंबीय तिच्यावर प्रचंड नाराज झाले आहेत. तिचे वडीलच नव्हे तर नवरा आणि मुलगीही तिच्यावर प्रचंड नाराज आहेत. दोघांनीही आता आम्हाला तुझं तोंड पाहायचं नसल्याचं म्हटलं आहे.
अंजूचा नवरा अरविंद हा राजस्थानमध्ये होता. यावेळी त्याने मीडियाशी संवाद साधला. मुलं म्हणतात पप्पा तुम्ही काळजी करू नका. जे होईल ते चांगलंच होईल, असं अरविंद म्हणाला. अंजू खोटं बोलून पाकिस्तानात गेली आहे. ती परत आली तर तिचा स्वीकार करणार नाही. ती तिच्या मर्जीने नसरुल्लाकडे गेली आहे. इथे कुणालाच काही सांगितलं नाही, असंही अरविंद म्हणाला.
मुलंही नाराज
अंजूच्या या कृतीमुळे मुलंही तिच्यावर नाराज आहेत. मला आईची काहीच गरज नाही. आम्हाला तिचा चेहराही पाहायचा नाहीये, असं मुलीने सांगितल्याचं अरविंदचं म्हणणं आहे. अंजूने दोन वर्षापूर्वी परदेशात नोकरीला जाण्यासाठी पासपोर्ट बनवला होता. आमच्या दोघांमधील संबंध चांगले होते. आमच्यात कोणताही झगडा झाला नाही. थोडीफार वादावादी होतेच, असं सांगतानाच मी कुठे गायब झालो नव्हतो. मी फक्त मीडियासमोर येत नव्हतो. मला मीडियासमोर यायचं नव्हतं. मी आता खूप थकलोय. माझी प्रकृती ठिक नाहीये, असं त्याने सांगितलं.
अंजू खोटं बोलतेय
सोशल मीडियातून आम्ही जे पाहत आहोत, त्यानुसार तिने लग्न केल्याचं दिसून येत आहे. अंजू खोटं बोलत आहे. तिथूनही ती खोटं बोलत आहे. सर्व काही तीच करते. वर खोटंही बोलत आहे. मुलंही तिच्याशी बोलण्यास तयार नाहीत. मुलांशीही ती खोटं बोलत आहे, असा दावा त्याने केला. अंजू पैसा प्रचंड खर्च करायची. तिने अनेकांकडून उधारी घेतली होती. जे ठरवलं तेच करण्याची तिची सवय हती. ही सवय बदलण्याबाबत मी तिला अनेकदा सांगितलं. पण ती ऐकतच नव्हती, असंही त्याने सांगितलं.