Karnataka Hijab| शैक्षणिक संस्थेत रिकाम्या पोलवर भगवा फडकवला, जय श्रीरामचा नारा !
व्हायरल होत असलेला व्हिडिओ शिमोगा येथील असल्याचा दावा केला जात आहे. कर्नाटकात उफाळून आलेल्या हिजाब वादाच्या पार्श्वभूमीवर हा व्हिडिओ सोशल मीडियावरून फिरत आहे.
बंगळुरूः कर्नाटकमध्ये हिजाब (Karnatak Hijab) घातल्याने मुस्लिम मुलींना प्रवेश नाकारल्याच्या घटनेनंतर विविध प्रकारचे व्हिडिओ (Viral Video) समोर येत आहेत. हा व्हिडिओ शिमोगा (Shimoga) शहरातील असल्याचे उघड झाले आहे. या शहरातील गव्हर्नमेंट फर्स्ट ग्रेड कॉलेजमधील असल्याची माहिती उघड झाली आहे. या व्हिडिओत एक जण खांबावर चढून भगवा ध्वज फडकावतो असे दिसतेय. सोशल मीडियावर सध्या हा व्हिडिओ व्हायरल होत आहे. व्हिडिओमध्ये एक मुलगा खांबावर चढून भगवा ध्वज फडकावतो आणि खाली उभे असलेले विद्यार्थी जय श्रीरामचा नारा लगावत आहेत.
शिमोग्यातील कॉलेजमधील व्हिडिओ
दरम्यान, शिमोग्यातील गव्हर्नमेंट फर्स्ट ग्रेड कॉलेजमधील हा व्हिडिओ असल्याचे महाविद्यालयाचे प्राचार्य धनंजय बी. आर. यांनी स्पष्ट केले. ही घटना घडली तेव्हा मी तिथेच उपस्थित होते, असेही त्यांनी सांगितले. हे विद्यार्थी खांबावर चढले तेव्हा खांबावर कोणताही झेंडा नव्हता. हा पोल रिकामा होता. त्यामुळे विद्यार्थ्यांनी तिरंगा काढला, असा दावा सोशल मीडियावरून केला जात होता, मात्र तो असत्य असल्याचे प्राचार्यांनी सांगितले. तसेच काही वेळातच हा भगवा देखील खाली काढण्यात आला होता.
हिजाबचा वाद काय आहे?
साधारण 23 दिवसांपूर्वी हा वाद सुरु झाला. कर्नाटकातील उडपी येथील कुंदापूर परिसरातील पीयू महाविद्यालयात हिजाब घालण्यावरून हा वाद सुरु झाला आहे. शिक्षणमंत्री बी सी नागेश यांनी सांगितले की, हा वाद सुरु होण्यापूर्वी या महाविद्यालयात येमाऱ्या मुली हिजाब घालत नव्हत्या. हिजाब घातल्यानंतर संबंधित महाविद्यालयाने त्यांना प्रवेश नाकारला. याविरोधात मुलींनी कर्नाटक उच्च न्यायालयात धाव घेतली आहे. आम्ही केवळ हिजाब घातला म्हणून महाविद्यालय प्रशासनाने आम्हाला शिक्षणाचा अधिकार नाकारलाय. आमच्या धार्मिक आणि मूलभूत हक्कांमध्ये हस्तक्षेप केला जाऊ नये, अशी याचिका त्यांनी केली आहे. या प्रकरणावर आज सुनावणी होत आहे.
डिस्क्लेमर : सदर वृत्तात यापूर्वी शैक्षणिक संस्थेवरील पोलवरुन तिरंगा हटवून भगवा फडकावला असे लिहिण्यात आले होते. मात्र फेसबुकच्या फॅक्ट क्रेसेंडोनी निदर्शनास आणून दिल्यानंतर सदर मजकूरात बदल करण्यात आला आहे.
इतर बातम्या-