Chandrayaan-3 Update | चांद्रयान 3 विरुद्ध लुना 25, दक्षिण ध्रुवावर पहिलं कोण पोहोचणार?

Luna 25 mission

Image Credit source: AFP

नवी दिल्ली : सध्या देशात चर्चा आहे ती, भारताच्या मिशन चांद्रयान-3 ची. भारतीय अवकाश संशोधन संस्था इस्रोने 14 जुलैला चांद्रयान-3 लाँच केलं. सर्वप्रथम चांद्रयान-3 ला पृथ्वीच्या कक्षेत सोडण्यात आलं. त्यानंतर टप्याटप्याने चांद्रयान 3 चा कक्षा विस्तार करण्यात आला. आता चांद्रयान 3 चंद्राच्या कक्षेत पोहोचलं आहे. येत्या 23 ऑगस्टला चंद्रावर सॉफ्ट लँडिंगची इस्रोची योजना आहे. सर्व भारतीयांचे डोळे चांद्रयान 3 च्या चंद्रावरील सॉफ्ट लँडिंगकडे लागले आहेत. 2019 साली चांद्रयान 2 मिशनमध्ये चंद्रावर सॉ़फ्ट लँडिंग करण्यात अपयश आलं होतं.

आता चांद्रयान 3 मिशनमध्ये मागच्या चुकांमधून धडा घेत बऱ्याच सुधारणा करण्यात आल्या आहेत. चंद्राच्या दक्षिण ध्रुवावर सॉफ्ट लँडिंग करण्याच इस्रोच लक्ष्य आहे. चंद्राच्या दक्षिण ध्रुवावर सॉफ्ट लँडिंग करणारा भारत पहिला देश ठरावा, अशी सर्वांची मनापासून इच्छा आहे.

भारताची जवळच्या मित्र देशाबरोबर स्पर्धा

कारण रशिया, अमेरिका आणि चीन या देशांनी यशस्वी चंद्र मोहिमा केल्या आहेत. त्यांनी त्यांच्या यानाच तिथे यशस्वी सॉफ्ट लँडिंग केलय. पण दक्षिण ध्रुवावर अजूनपर्यंत कोणी गेलेलं नाहीय. भारत तिथे पोहोचणारा पहिला देश ठरु शकतो. पण आता स्पर्धा निर्माण झालीय. भारताच्या अत्यंत जवळच्या मित्र देशाची चांद्रमोहिम येत्या 11 ऑगस्टला लाँच होणार आहे.

दक्षिण ध्रुवावर पहिलं कोण पोहोचणार?

रशियाच ‘लुना 25’ मिशन येत्या 11 ऑगस्टला लाँच होणार आहे. 47 वर्षानंतर रशिया पहिल्यांदाच चंद्रावर यान उतरवणार आहे. ‘लुना 25’ च सॉफ्ट लँडिंग सुद्धा 23 ऑगस्टलाच दक्षिण ध्रुवावर होणार आहे. याच दिवशी भारताच्या चांद्रयान 3 चं लँडिंग आहे. आता फक्त प्रश्न हा आहे की, चंद्राच्या दक्षिण ध्रुवावर पोहोचणार पहिला देश कोण ठरणार?

‘लुना 25’ प्रक्षेपण कुठून होणार?

रशियाच्या फार इस्ट भागातील अवकाश तळावरुन ‘लुना 25’ च प्रक्षेपण होणार आहे. दक्षिण ध्रुवावर बर्फ आणि पाणी असण्याची शक्यता आहे. रशियाच्या चांद्र मोहिमेचा सुद्धा तोच उद्देश आहे. बर्फ, ऑक्सिजनचा शोध घेणं हा रशियाच्या मोहिमेचा उद्देश आहे.