भाऊ कदम बनणार ‘सीरियल किलर’; लवकरच नव्या नाटकाचा शुभारंभ
भाऊ कदमच्या चाहत्यांसाठी हे नाटक मनोरंजनाची दिलखुलास पर्वणी असणार आहे. नाटकाचे नेपथ्य प्रदीप मुळ्ये यांचं तर संगीत विजय गवंडे यांचं आहे. प्रकाशयोजना श्याम चव्हाण यांची आहे. तर सूत्रधार सुनील पानकर गोट्या सावंत आहेत.
अभिनेता भाऊ कदम आणि विनोद हे जणू समीकरणच आहे. आता कॉमेडीचा हाच शार्प शूटर 'सिरियल किलर' ठरला आहे. अद्वैत थिएटर्स आणि सिंधु संकल्प एन्टरटेनमेंट प्रा. लि. प्रस्तुत, राहूल भंडारे आणि प्रणय तेली निर्मित आणि केदार देसाई लिखित दिग्दर्शित ‘सिरियल किलर’ हे धमाल नाटक लवकरच प्रेक्षकांच्या भेटीला येणार आहे.
येत्या शनिवारी 12 ऑक्टोबरला रंगभूमीवर हे नाटक दाखल होत आहे. यात भाऊ कदमची मध्यवर्ती भूमिका असून त्याच्या जोडीला अभिनेत्री अश्विनी कुलकर्णी, श्रद्धा हांडे, तेजस पिंगुळकर हे काम करणार आहेत.
मालिका अभिनेत्री आणि रिपोर्टर यांच्यामध्ये घडलेल्या घटनेने संशयाचे सुरुंग पेरले जातात. या घटनेनंतर 'सिरियल किलर' म्हणून आलेला खरंच 'सिरियल किलर' असतो की नसतो, याचा धमाल खेळ रंगतो. फुल टू कॉमेडीच्या रॅपरमध्ये गुंडाळून आलेला 'सिरियल किलर' काय धमाल उडवतो हे पाहणं रंजक ठरणार आहे.
"बेभान कॉमेडी आणि निखळ आनंदासोबतच आमच्या सगळ्यांच्या भन्नाट ट्यूनिंगची ट्रीट देणारं 'सिरियल किलर’ हे नाटक प्रेक्षकांना निखळ आनंद देईल. नाट्यरसिकांना नेहमी काहीतरी वेगळं देण्याचा प्रयत्न अद्वैत थिएटर्सने केला आहे.
‘सिरियल किलर’च्या माध्यमातूनही आम्ही सस्पेंस धमाल अशी नाट्यकृती आणली आहे," असा विश्वास भाऊ कदमने व्यक्त केला आहे.