Urmila Matondkar: उद्ध्वस्त चिपळूण पाहून उर्मिला मातोंडकरही रडल्या; पूरग्रस्तांचं केलं सांत्वन
चिपळूणमधील नुकसान पाहताना उर्मिला मातोंडकर यांना अक्षरश: रडू कोसळलं. टीव्ही 9 मराठीने दाखवलेली व्यथा पाहून, ज्या कुटुंबापर्यंत कोणीही पोहोचलं नव्हतं, त्या ठिकाणी जाऊन उर्मिला मातोंडकर यांनी मदत केली. (Urmila Matondkar cried when she saw the ruined chiplun; Consolation of flood victims)
शिवसेना नेत्या आणि अभिनेत्री उर्मिला मातोंडकर (Urmila Matondkar) यांनी पूरग्रस्त चिपळूणमध्ये (Chiplun) जाऊन पाहणी केली.
चिपळूणमधील नुकसान पाहताना उर्मिला मातोंडकर यांना अक्षरश: रडू कोसळलं. टीव्ही 9 मराठीने दाखवलेली व्यथा पाहून, ज्या कुटुंबापर्यंत कोणीही पोहोचलं नव्हतं, त्या ठिकाणी जाऊन उर्मिला मातोंडकर यांनी मदत केली. उर्मिला मातोंडकर यांनी या कुटुंबाला रोख रक्कम देऊन मदत केली.
यावेळी बोलताना उर्मिला मातोंडकरांचा हुंदका दाटला. उर्मिला मातोंडकर म्हणाल्या, “सध्याची परिस्थिती पाहाता, कोणाचाही धीर सुटेल अशी अवस्था झाली आहे. टीव्ही 9 मुळे आम्ही इथे पोहोचलो. मी प्रार्थना करते, टीव्ही 9 असो किंवा अन्य मीडियामुळे लोक इथे पोहोचतील.
हे घर खरोखरच आतमध्ये आहे. कशी मदत पोहोचणार माहिती नाही. मला विश्वास आहे, परमेश्वराने त्यांना वाचवलंय, तर परमेश्वराला काळजी असेल, नक्की पुढची मदत होईल. मी स्वत: नेता नाही, पण आश्वासन दिलंय, माझ्या परीने ते पूर्ण करेन, अजून काय करु, असं म्हणत उर्मिला मातोंडकर ढसाढसा रडायला लागल्या.
चिपळूणमधील महाप्रलयाची स्थिती मी टीव्हीवर पाहिली त्यावेळी माझे मन खूप दुःखी झालं. त्यावेळेला मी कोलकात्याला होते. त्याच वेळेला मी ठरवले आपण कोकणात मदत घेऊन जायचं.
कोकणवासीयांना मदत करायची. कोकणातील चिपळूणची परिस्थिती खूप भीषण आहे. मात्र कोणी तरी पुढाकार घेऊन मदत करणे गरजेचे आहे, तीच मदत घेऊन मी आले, असं उर्मिला मातोंडकर यांनी चिपळूणमध्ये पोहोचल्यावर सांगितलं होतं.
