दलजीत कौरच्या पूर्व पतीला 200 विंचूंनी चावलं; सुजला चेहरा, बोलताही येईना!
अभिनेता शालीन भनोतला 'खतरों के खिलाडी 14'मध्ये 200 विंचूंसोबत स्टंट करणं चांगलंच महागात पडलं आहे. विंचूंनी चावल्यामुळे त्याचा चेहरा पूर्ण सुजला आहे. यामुळे त्याला बोलताही येत नाहीये. शालीनने सोशल मीडियावर हा व्हिडीओ पोस्ट केला आहे.
विविध स्टंट्सवर आधारित रिअॅलिटी शो 'खतरों के खिलाडी'च्या 14 व्या सिझनचं शूटिंग सध्या रोमानियामध्ये केलं जातंय. या शोमध्ये बिग बॉसमधील बरेच माजी स्पर्धक सहभागी झाले आहेत. अभिनेत्री दलजीत कौरचा पूर्व पती आणि अभिनेता शालीन भनोतसुद्धा यामध्ये स्पर्धक म्हणून सहभागी झाला आहे.
या शोमधील एका स्टंटदरम्यान शालीनला बरीच दुखापत झाली आहे. त्याचा व्हिडीओ त्याने इन्स्टाग्राम अकाऊंटवर पोस्ट केला आहे. 'खतरों के खिलाडी'च्या सेटवरील हा व्हिडीओ असून त्याच्या चेहऱ्यावर बरीच सूज आल्याचं पहायला मिळतंय.
या व्हिडीओमध्ये सेटवर उपस्थित असलेली मेडिकल टीम आणि डॉक्टर त्याच्यावर उपचार करत आहेत. तर शालीनच्या दाढेजवळ आणि चेहऱ्याला इतर ठिकाणी सूज पहायला मिळतेय. हा व्हिडीओ पोस्ट करत शालीनने लिहिलं, 'तुमच्यासाठी काहीपण..'
काही रिपोर्ट्सनुसार, शोमध्ये एक स्टंट करताना शालीनला 200 हून अधिक विंचूंनी चावलं. म्हणूनच त्याचा चेहरा सुजला आहे. विंचूंमुळे शालीनच्या चेहऱ्यावरच नाही तर हातापायालाही सूज आली आहे. मात्र त्याची प्रकृती आता ठीक असल्याचं कळतंय.
'खतरों के खिलाडी'मध्ये शालीनचा सहस्पर्धकाशी जोरदार वादसुद्धा झाला होता. असिम रियाजसोबत मतभेद झाल्याने हे भांडण झालं होतं. त्यानंतर असिमला शोमधून काढून टाकण्यात आलं होतं. अखेर सूत्रसंचालक रोहित शेट्टीची माफी मागितल्यानंतर त्याला पुन्हा शोमध्ये घेण्यात आलं.