Hartalika Vrat 2024: हरितालिका व्रत पूजनाचा शुभ मुहूर्त कोणता?
पुराण काळापासून भाद्रपद महिन्यातील शुक्ल पक्षातील तृतीयेच्या दिवशी केले जाणारे हरतालिकेच्या व्रताचे मोठे महत्व असते. हे व्रत करताना महिला शंकर आणि पार्वतीच्या मातीच्या मूर्तीची विधिवत पूजा आणि उपवास करतात.
पतीच्या दीर्घायुष्यासाठी, कुटुंबाची प्रगती आणि समृद्धीसाठी हरितालिकेचं व्रत खूप महत्त्वाचं आहे, असं मानलं जातं. हरितालिका व्रत हे कठीण व्रतांपैकी एक समजलं जातं.
या दिवशी विवाहित महिला आपल्या पतीच्या दीर्घायुष्यासाठी पाणी आणि अन्नाशिवाय उपवास करतात. अविवाहित मुलीही हे व्रत करतात. असं मानलं जातं की भगवान शिव आणि माता पार्वतीच्या कृपेने अविवाहित मुलींना योग्य वर मिळतो. अविवाहित मुली चांगला वर मिळावा म्हणून यादिवशी उपवास करतात.
यावर्षी हरितालिका पूजेचा मुहूर्त सकराळी 6.02 ते 8.33 असा आहे. वेळ- 2 तास 31 मिनिटं. तृतीया तिथी 5 सप्टेंबर 2024 रोजी दुपारी 12.21 वाजता सुरू होईल. तृतीया तिथी 6 सप्टेंबर 2024 रोजी दुपारी 3.01 वाजता संपेल.
हरितालिका व्रत येत्या 6 सप्टेंबर रोजी आहे. या दिवशी भगवान शिवाने देवी पार्वतीला पत्नी म्हणून स्वीकारलं होतं. त्यामुळे विवाहित महिलांसाठी हे व्रत खूप महत्त्वाचं आहे. हरितालिकेचं व्रत शंकर-पार्वतीला समर्पित आहे.
हरितालिका व्रताची पूजा विधी- हरितालिका व्रतामध्ये गणेश, शिव आणि माता पार्वतीची पूजा केली जाते. सर्वप्रथम मातीपासून तीन मूर्ती बनवा आणि टिळक लावून गणेशाला दुर्वा अर्पण करा.
यानंतर भगवान शंकराला फुलं, बेलपत्र अर्पण करा आणि नंतर माता पार्वतीला मेकअपचं सामान अर्पण करा. यानंतर श्रीगणेशाची आरती करा. आरती झाल्यावर शिव आणि माता पार्वतीला नैवेद्य दाखवा.