‘नवरी मिळे हिटलरला’ मालिकेत मोठा ट्विस्ट; एजे-लीलाच्या नात्यात..
'नवरी मिळे हिटलरला' ही मालिका दररोज रात्री 10 वाजता झी मराठी वाहिनीवर प्रेक्षकांच्या भेटीला येते. या मालिकेने अल्पावधीतच प्रेक्षकांची मनं जिंकली आहेत. यामध्ये राकेश बापट आणि वल्लरी लोंढे यांच्या मुख्य भूमिका आहेत.
झी मराठी वाहिनीवरील 'नवरी मिळे हिटलरला' या मालिकेला अल्पावधीतच प्रेक्षकांची पसंती मिळाली. राकेश बापट आणि वल्लरी लोंढे यांच्या मुख्य भूमिका असलेल्या या मालिकेचं कथानक आता रंजक वळणावर आलं आहे.
'नवरी मिळे हिटलरला' या मालिकेत लीला आणि एजे पाचपरतावणीसाठी लीलाच्या माहेरी गेले असताना एजेला एक रात्र तिथे राहावं लागतं. एजेला काही गोष्टींचा त्रास होतोय पण काही गोष्टी त्याला नव्याने कळतात.
लीलाच्या आई बाबांसमोर एजे आणि लीला सुखी जोडपं असल्यासारखे वावरत आहेत. एजे असं वागत आहेत हे पाहून लीलाला खूप बरं वाटतं. पण किशोर तिला सतत आठवण करून देत आहे की तुला अंतराच्या मृत्यूचे पुरावे शोधायचे आहेत. त्यामुळे ती एजेकडे सतत साशंक नजरेने पाहत आहे.
एजे लीला घरी परत आल्यावर लीला अंतराचं कपाट उघडायला जाते आणि एजे ते पाहतो. अंतराच्या कोणत्याही गोष्टीला हात लावलेलं त्याला आवडत नाही आणि तिथे या चुकीबद्दल एजे लीलाला शिक्षा करतो.
काय असेल आहे अंतराच्या मृत्यूमागचं रहस्य? लीला घेऊ शकेल का सत्याचा शोध ? एजे आणि लीलाच्या नात्यामध्ये फुलेल का प्रेमाची कळी? या सर्व प्रश्नांची उत्तरं प्रेक्षकांना मालिकेच्या आगामी भागात मिळतील.