‘तुला शिकवीन चांगलाच धडा’ मालिकेत मोठा ट्विस्ट; अक्षरासमोर आलं भुवनेश्वरीच सत्य
'तुला शिकवीन चांगलाच धडा' या मालिकेचं कथानक अत्यंत रंजक वळणावर येऊन पोहोचलं आहे. अक्षरासमोर अखेर भुवनेश्वरीचं सत्य येणार आहे. त्यामुळे मालिकेच्या पुढील भागात या दोघींमध्ये चांगलीच चढाओढ पहायला मिळणार आहे.
झी मराठी वाहिनीवरील 'तुला शिकवीन चांगलाच धडा' या लोकप्रिय मालिकेत रोज नवीन ट्विस्ट पाहायला मिळत आहेत. अक्षरा आणि भुवनेश्वरी यांच्यामधलं नातं एक वेगळं वळण घेताना दिसणार आहे.
अक्षराने पुनः शाळेत जायला सुरुवात केली आहे. हे भुवनेश्वरीला अजिबात आवडलेलं नाही. अक्षराच्या शाळेच्या पहिल्याच दिवशी भुवनेश्वरी फुलपगारे सरांना फोन करुन सांगते की, "अक्षराला जर शाळेत घेतलं तर तुमचा तो शाळेत शेवटचा दिवस असेल."
त्यामुळे भुवनेश्वरीचा हा डाव अक्षरा तिच्यावरच उलटवणार का? फुलपगारे सरांची नोकरी वाचणार का? हे पाहणं औत्सुक्याचं ठरणार आहे.
भुवनेश्वरीला सतत होणारी तिची हार आता सहन होत नाही. तेव्हा ती अक्षराच्या बहिणीला म्हणजेच इराला आपल्यासोबत घेतेय. त्याचबरोबर भुवनेश्वरी, चारुहासने जो भूतकाळ उलगडला त्यामध्ये तिची काय बाजू आहे हे स्वत:हून अक्षरासमोर व्यक्त करते.
आता भुवनेश्वरीचं हे सत्य खरं आहे की कोणतं नवीन नाटक? हे येणाऱ्या भागातच कळेल. 'तुला शिकवीन चांगलाच धडा' ही मालिका सोमवार ते शनिवार रात्री 8 वाजता झी मराठी वाहिनीवर प्रेक्षकांच्या भेटीला येते.