नाना पाटेकर-मकरंद अनासपुरे यांची कलंदर जोडी एकत्र
नाना पाटेकर आणि मकरंद अनासपुरेंची ही मजेशीर जोडगोळी 'ओले आले' मधून आपल्याला नक्कीच मनसोक्त हसवेल यात काही शंका नाही. पण हा चित्रपट प्रेक्षकांना जगण्याचा एक अनोखा कानमंत्रसुद्धा देईल असा विश्वास दिग्दर्शकांनी व्यक्त केला आहे. बऱ्याच वर्षानंतर नाना आणि मकरंद एकत्र आले आहेत.
सध्या चला फिरूया.. हसूया.. जगूया.. म्हणत दिग्गज अभिनेते नाना पाटेकर एका धमाल सहलीला निघाले आहेत. हा प्रवास सिद्धार्थ आणि सायलीसोबत चालू आहेच. पण यात मकरंद अनासपुरेसुद्धा त्यांच्या साथीला आहेत.
दिग्गज कलाकारांची मैत्री आपल्याला चित्रपटाच्या प्रवासात पहिल्यांदाच एकत्र पाहता येणार आहे. बऱ्याच वर्षानंतर ही कलंदर जोडी 'ओले आले' या मराठी चित्रपटाच्या निमित्ताने एकत्र आली आहे.
आपल्या अभिनयाचे आणि विनोदाचे चौकार आणि षट्कार मारायला नाना आणि मकरंद अनासपुरे सज्ज असून कोकोनट मोशन पिक्चर्स प्रस्तुत 'ओले आले' हा चित्रपट नववर्षात म्हणजे 5 जानेवारीपासून प्रेक्षकांच्या भेटीस येणार आहे.
'ओले आले' चित्रपटात 'व्यस्त रहा.. पण मस्त रहा..' असं म्हणणारे नाना सिद्धार्थला जगण्याचे सूत्र सांगताना दिसताहेत. खरं तर हा मूलमंत्र ते स्वतःच्या दैनंदिन व्यवहारातून, कधी प्रेमाने तर कधी हट्टाने मुलाला शिकवू पाहताहेत.
बाबा आणि मुलाच्या या मजेशीर जुगलबंदीमध्ये मकरंद अनासपुरेदेखील सहभागी झालेले दिसणार आहेत. आपलं आयुष्य आनंदी, समाधानी असावं असं म्हणणारे मकरंद अनासपुरे या कुटुंबाचा महत्त्वाचा घटक झालेले आहेत.
