‘सातव्या मुलीची सातवी मुलगी’ फेम तितिक्षा तावडेची पहिली कमाई किती होती?
अभिनेत्री तितिक्षा तावडेनं तिच्या पहिल्या पगाराविषयी खुलासा केला आहे. हॉटेल मॅनेजमेंटच्या दुसऱ्या वर्षांत तितिक्षाला स्टायपेंड मिळायचं. त्या स्टायपेंडचे पैसे सहा महिने साठवल्यानंतर तिने हेअर स्ट्रेटनिंग केले होतं.
प्रत्येकासाठी त्याची पहिली स्वकमाई महत्वाची असते. मग तो सर्वसामान्य माणूस असो किंवा सुप्रसिद्ध कलाकार असो. छोट्या पडद्यावरील प्रेक्षकांची लाडकी नेत्रा म्हणजेच अभिनेत्री तितिक्षा तावडेनं तिच्या पहिल्या कमाईची आठवण आणि अनुभव सांगितला आहे.
"माझ्या आयुष्यातील पहिली कमाई म्हणजे माझं स्टायपेंड होतं. जे मला हॉटेल मॅनेजमेंटच्या दुसऱ्या वर्षाच्या अभ्यासक्रमादरम्यान मिळाले होते," असं तिने सांगितलं.
याविषयी ती पुढे म्हणाली, "स्टायपेंड म्हणून मला एक हजार रुपये मिळाले होते. दर महिन्याला एक हजार रुपये अशा हिशोबाने सहा महिने मी त्या स्टायपेंडची बचत केली होती. त्या पैशांतून मी माझे हेअर स्ट्रेट केले होते."
"तेव्हा ती माझी गरज होती आणि मला त्याच्यासाठी आई-बाबांचे पैसे वापरायचे नव्हते. माझा कोर्स पूर्ण झाल्यावर मी एका प्रसिद्ध फूड चेनच्या आऊटलेटसाठी ट्रेनी म्हणून काम केलं होतं. तिथे माझा पगार होता 11,500 रुपये," असं तितिक्षाने सांगितलं.
"मला लक्षात आहे, मी आई-बाबा आणि ताईसाठी कपडयांची खरेदी केली होती. मला गिफ्ट्स घ्यायला खूप आवडतात. त्यामुळे मी खूप खुश होते. आज 'सातव्या मुलीची सातवी मुलगी' मालिकेमुळे जी प्रसिद्धी आणि प्रेम मिळत आहे. माझा प्रवास पाहून मी त्या काळाच्या तितिक्षाला म्हणेन की "काळजी करू नकोस. तू छान करत आहेस. मला तुझा अभिमान आहे", अशा शब्दांत तिने भावना व्यक्त केल्या.