‘तुला शिकवीन चांगलाच धडा’ मालिकेत रंजक ट्विस्ट; अधिपती – अक्षराची प्रेमाची शाळा
युद्धात आणि प्रेमात सर्वकाही माफ असतं असं म्हणतात. म्हणूनच अक्षराचं मन जिंकण्यासाठी अधिपतीने पाठीला दप्तर आणि शाळेचा गणवेश घालून थेट तिच्या वर्गात प्रवेश घेतला आहे. या प्रेमाच्या परीक्षेत अधिपतीला अक्षराची साथ मिळेल का, हे पाहणं औत्सुक्याचं ठरणार आहे.
झी मराठी वाहिनीवरील ‘तुला शिकवीन चांगलाच धडा’ ही मालिका प्रेक्षकांच्या पसंतीस पडत आहे. या मालिकेचं कथानक अत्यंत रंजक वळणावर आलं असून आगामी भागात प्रेक्षकांचं चांगलंच मनोरंजन होणार आहे. कारण अक्षराच्या प्रेमात अधिपतीने पाठीला दप्तर आणि शाळेचा युनिफॉर्म घालून वर्गात प्रवेश घेतला आहे.
अधिपतीला शाळेतल्या कपड्यांमध्ये पाहून अक्षराची बोलतीच बंद होते. अक्षरा वर्ग सोडून जायला निघते पण तितक्यात अधिपती असं काही बोलतो, ज्यामुळे तिची पावलं परत मागे फिरतात.
भुवनेश्वरीने म्हणजेच आईने घातलेल्या अटीमुळे अधिपतीकडे काही पर्याय नव्हता. पण मास्तरीण बाईंवर असलेल्या प्रेमाखातर त्याला युनिफॉर्म आणि दप्तरची साथ घ्यावी लागली. कारण त्याला अक्षराची मनधरणी करायची आहे.
म्हणतात ना प्रेमाच्या लढाईत सगळंच माफ असतं आणि म्हणूनच अधिपतीने शाळेत जाण्याचा निर्णय घेतला आहे. अक्षरा त्याला शाळेत तरी टाळू शकणार नाही. आता या प्रेमाच्या परीक्षेत अधिपती पास होईल का? अक्षरा त्याला प्रेमाचे धडे आणि माफी देईल का, हे पाहणं औत्सुक्याचं ठरणार आहे.
भुवनेश्वरीला अधिपतीच्या शाळाप्रवेशाबाबत बातमी कळल्यावर काय होईल, हे सर्व प्रेक्षकांना येणाऱ्या भागात पाहायला मिळेल. 'तुला शिकवीन चांगलाच धडा' ही मालिका सोमवार ते शनिवार रात्री 8 वाजता झी मराठीवर प्रेक्षकांच्या भेटीला येते.