‘दंगल’ सुपरहिट होऊनही सुहानी लाइमलाइटपासून का गेली दूर?
'दंगल गर्ल' म्हणून ओळखली जाणारी सुहानी भटनागर या चित्रपटानंतर फारशी कुठे झळकली नाही. सोशल मीडियावरही ती 2021 नंतर सक्रीय नव्हती. दंगल हा चित्रपट सुपरहिट ठरल्यानंतरही तिने लाइमलाइटपासून दूर राहणं पसंत केलं होतं.
आमिर खानच्या 'दंगल' या चित्रपटात ज्युनिअर बबिता फोगाटची भूमिका साकारलेली अभिनेत्री सुहानी भटनागरचं निधन झालं. वयाच्या 19 व्या वर्षी तिने अखेरचा श्वास घेतला. गेल्या काही दिवसांपासून तिच्यावर उपचार सुरू होते.
एका अपघातात सुहानीच्या पायाला फ्रॅक्चर झाला होता. यावेळी उपचारादरम्यान घेतलेल्या औषधांचा साइड इफेक्ट होऊन तिच्या शरीरात पाणी भरलं. याच कारणामुळे तिचं निधन झाल्याचं कळतंय.
सुहानीने 'दंगल'मध्ये आमिर खानच्या मुलीची भूमिका साकारली होती. या चित्रपटातून तिने प्रेक्षकांवर विशेष छाप सोडली होती. मात्र दंगल सुपरहिट होऊनही सुहानी नंतर फारशी कुठे झळकली नाही. लाइमलाइटपासून दूर राहणंच तिने पसंत केलं.
दंगल हा चित्रपट प्रदर्शित झाला तेव्हा सुहानी केवळ 14 वर्षांची होती. त्यामुळे पुढील शिक्षण पूर्ण करण्यासाठी ती बॉलिवूड इंडस्ट्रीपासून दूर गेली. शिक्षण पूर्ण झाल्यानंतर पुन्हा चित्रपटात काम करण्याची इच्छा तिने काही मुलाखतींमध्ये बोलून दाखवली होती.
सुहानी सोशल मीडियावरही फारशी सक्रीय नव्हती. इन्स्टाग्रामवर तिची शेवटची पोस्ट नोव्हेंबर 2021 ची आहे. त्यानंतर तिने कोणतीच पोस्ट केली नाही. इन्स्टाग्रामवर तिचे 21 हजार फॉलोअर्स आहेत. सुहानीच्या निधनावर चाहत्यांनी शोक व्यक्त केला आहे.