शर्ट झटकलं, मान हलवली, दाढीला हात, आदित्य ठाकरे यांच्याकडून भर सभेत एकनाथ शिंदे यांची नक्कल, पाहा VIDEO

ठाणे : ठाण्यात महाविकास आघाडीकडून (Maha Vikas Aghadi) आज जोरदार शक्तीप्रदर्शन करण्यात आलं. ठाकरे गटाच्या कार्यकर्त्या रोशनी शिंदे (Roshni Shinde) यांच्यावर करण्यात आलेल्या हल्लावरुन शिवसेना (Shiv Sena) आणि पोलिसांच्या विरोधात महाविकास आघाडीने आज जनप्रक्षोभ मोर्चा काढला. युवासेना प्रमुख आदित्य ठाकरे (Aaditya Thackeray) आणि राष्ट्रवादी काँग्रेसचे आमदार जितेंद्र आव्हाड यांनी या मोर्चाचं नेतृत्व केलं. या मोर्चाची ठाणे पोलीस आयुक्ताल जवळ सांगता झाली. यावेळी तिथे आदित्य ठाकरे यांनी जोरदार भाषण केलं. या भाषणावेळी आदित्य ठाकरे यांनी मुख्यमंत्री एकनाथ शिंदे यांची नक्कल केली. आदित्य यांनी आपल्या भाषणावेळी दोनवेळा मुख्यमंत्र्यांची नक्कल केली. यावेळी कार्यकर्त्यांनी वन्स मोर अशी घोषणाबाजी केली.

“महिलांवर हात उचलायचे, सुषमा ताई, सुप्रिया ताईंना शिवीगाळ करायची आणि मर्दानगी दाखवायची”, अशी टीका करत असताना आदित्य ठाकरे यांनी पहिल्यांदा मुख्यमंत्र्यांची नक्कल केली. यावेळी त्यांनी शर्ट झटकलं, इकडेतिकडे बघितलं आणि नंतर दाढीला हात लावला. त्यांच्या या नक्कलीवर अनेक कार्यकर्ते हसले. त्यानंतर त्यांनी पुन्हा निशाणा साधायला सुरुवात केली. “असे लोकं एकदाच होतात. परत कधी येऊ द्यायची नाही. लोकशाही आहे की लोकशाही संपली? मोर्चा काढलं तर बोलायचं नाही तर आरती करायची का?”, असा सवाल त्यांनी केला.

भाषणावेळी पुन्हा मुख्यमंत्र्यांची नक्कल

“हॉस्पिटलमध्ये आमची रोशनी ताई ऑक्सिजनची नळी लावून आहे. बेडवर आहे. तिला बोलता येत नाही. काल तिचे हाल पाहिले. तिची मनस्थिती काय आहे, तिला किती त्रास होतोय ते पाहिलं. पण बाहेर पोलीस बसवले आहेत. कारण ती ज्या मिनिटाला बरी होईल आणि बसेल त्या मिनिटाला तिला अटकेत टाका आणि बाहेर पाठवून द्या. मान्य आहे? नाही. पण आजच्या अटी-शर्तींनुसार मला या मुख्यमंत्र्यांचं कौतुक करायला लागतंय”, असं म्हणत त्यांनी पुन्हा मुख्यमंत्र्यांची नक्कल केली. यावेळी पुन्हा त्यांनी शर्ट झटकलं आणि दाढीला हात लावला. “माझी पण दाढी आहे. नाहीतर नंतर सलूनचं दुकान काढावं लागेल”, असं ते उपरोधिकपणे म्हणाले.

“तुमच्या स्वत:च्या मतदारसंघात एका महिलेवर अत्याचार होतो. तिला पोटात लाथा मारल्या जातात. महिला सुरक्षित नाही. पुढे जाऊन तिच्यावर गुन्हा दाखल होतो. सगळ्यांनी सीसीटीव्ही पाहिले. हल्ला महिलेवर झालाय. बाई-पुरुष दोन्ही तिला मारत आहेत. इथल्या माजी महापौर आहेत, त्या शिंदे गटात गेल्या आहेत, त्यांनी सांगितलंय की, असाच धडा शिकवला पाहिजे. असं कसं राज्य चालू शकतं? तुम्ही मंत्री म्हणून बसता तेव्हा तुमचा आमचा कुणी नसतो. सगळे आपली असतात. पाणी देताना धर्म, जात, रंग बघितलं जात नाही. मतदान कोणी कुणाला केलंय हे बघितलं जात नाही. सर्वांची सेवा करायची असते. हेच शिवसेनेने शिकवलं आहे. हेच महाविकास आघाडीचं ध्येय होतं. पण या माणसाचं किती कौतुक करायचं?”, असा घणाघात त्यांनी केला.