Mumbai hoarding collapse : होर्डिंग कंपनीचा मालक भावेश भिंडेचा सुनील राऊतशी काय संबंध? नितेश राणेंचा थेट सवाल

politics started over mumbai ghatkopar chedda nagar petrol pump hoarding collapse

मुंबईत काल एक मोठी दुर्घटना घडली. घाटकोपर छेडा नगर येथे पेट्रोल पंपावर एक भलमोठं होर्डिंग कोसळलं. या दुर्घटनेत 14 निष्पाप नागरिकांचा बळी गेला. आता यावरुन सत्ताधारी पक्ष आणि विरोधी पक्षामध्ये जोरदार राजकारण रंगलं आहे. हे होर्डिंग ज्या कंपनीच होतं, त्याच्या मालकाविरोधात एफआयआर नोंदवण्यात आलाय. भावेश भिंडे असं या होर्डिंग कंपनीच्या मालकाच नाव आहे. त्याचा उद्धव ठाकरेंसोबतचा एक फोटो सोशल मीडियावर व्हायरल झालाय. या फोटोमध्ये तो उद्धव ठाकरे यांना पुष्पगुच्छ देताना दिसतोय. यावरुन आता सत्ताधारी पक्ष उद्धव ठाकरे यांना टार्गेट करत आहे. काल संध्याकाळी मुंबईत वादळी वाऱ्यासह पाऊस कोसळला. त्यावेळी पेट्रोल पंपावर आडोशाला थांबलेल्या लोकांवर तसेच इंधन भरण्यासाठी आलेल्या गाड्यांवर हे भलंमोठ होर्डिंग कोसळलं.

कणकवलीचे भाजपा आमदार नितेश राणे यांनी भावेश भिंडे मातोश्रीवर काय करत होता? असा थेट सवाल विचारला आहे. “ज्या कंपनीची ही होर्डिंग होती, त्याला मुंबई महापालिकेने नोटीस दिली होती. होर्डिंग हटवा, तुमचा कार्यकाळ संपला म्हणून सांगितलं होतं. त्या मालकाने ऐकलं नाही” असं नितेश राणे म्हणाले. “भावेश भिंडे नेमका कोणाचा पार्ट्नर आहे. संजय राऊतचा भाऊ सुनील राऊतचा त्याच्याशी काय संबंध?” असा सवाल नितेश राणेंनी केलाय. “या भावेश भिंडेला सुनील राऊत मातोश्रीवर घेऊन गेले, उद्धव ठाकरेंसोबत त्याचा फोटो काढला होता का?” असा सवाल नितेश यांनी विचारलाय.

दुर्घटनास्थळी नेत्यांमध्ये भांडण

दुर्घटनास्थळी भाजपा आणि महाविकास आघाडीच्या नेत्यांमध्ये भांडणही झालं. भाजपा नेते किरीट सोम्मय्या, मिहिर कोटेचा आणि पराग शहा घटनास्थळी होते. त्याचवेळी महाविकास आघाडीचे संजय दीना पाटील तिथे आक्रमक झाले होते. घाटकोपर पोलिसांनी या प्रकरणात इगो मीडियाचे मालक भावेश भिंडेसह अन्य व्यक्तींविरोधात गुन्हा नोंदवलाय. कलम 304, 338, 337, 34 अंतर्गत एफआयआर नोंदवण्यात आला असून प्रकरणाची चौकशी सुरु आहे. मृतांच्या नातेवाईकांना 5 लाख रुपयांची मदत जाहीर करण्यात आली आहे.