युगेंद्र पवार यांच्या विजयासाठी शरद पवारांचं कुटुंब कामाला, नातवासाठी आजी, भावासाठी बहीण मैदानात

नातूसाठी आजी बारामती पश्चिममध्ये, भावासाठी बहीण रेवती सुळे बारामती शहरात प्रचाराला

संपूर्ण देशाचे लक्ष लागून असलेल्या बारामती विधानसभा मतदारसंघांमध्ये पुन्हा पवार विरुद्ध पवार अशी काका-पुतण्यामध्ये लढाई होत आहे. राष्ट्रवादी काँग्रेस शरदचंद्र पवार पक्षाच्या वतीने यूगेंद्र पवार यांना उमेदवारी देण्यात आली आहे. त्यांच्या प्रचाराकरिता आज खासदार शरद पवार यांची नात आणि खासदार सुप्रिया सुळे यांची कन्या रेवती सुळे प्रचारामध्ये उतरल्या. त्यांनी शहरामध्ये शेकडो कार्यकर्त्यांच्या उपस्थितीमध्ये रॅली काढली. दुसरीकडे शरद पवार यांच्या पत्नी प्रतिभा पवार यांनीदेखील युगेंद्र पवार यांच्या प्रचारासाठी दौरा करत नागरिकांच्या भेटीगाठी घेतल्या.

नातूसाठी आजी प्रचाराच्या मैदानात उतरल्याचं आज बघायला मिळालं. युगेंद्र पवार यांच्या प्रचारासाठी शरद पवार यांच्या पत्नी प्रतिभा पवार यांनी आज पश्चिम भागाचा दौरा करत गाठीभेटी घेतल्या. लोकसभेच्या निवडणुकीत देखील प्रतिभा पवार यांनी सुप्रिया सुळे यांचा प्रचार केला होता. बारामती विधानसभा मतदारसंघातील काका-पुतण्याची लढाई ही अत्यंत चुरशीची होणार असल्याने या निवडणुकीकडे सर्वांचे लक्ष लागलं आहे.

युगेंद्र पवार यांच्या प्रचारासाठी रोहित पवारही मैदानात

विशेष म्हणजे रेवती सुळे आणि प्रतिभा पवार यांच्याआधी शरद पवारांचे नातू तथा कर्जत-जामखेडचे आमदार रोहित पवार यांनीदेखील काल युगेंद्र पवार यांच्या प्रचारासाठी बारामती तालुक्याचा दौरा केला होता. त्यामुळे बारामती विधानसभा मतदारसंघाची निवडणूक ही चुरशीची होणार आहे. युगेंद्र पवार यांच्या प्रचारासाठी रोहित पवार काल प्रचारासाठी मैदानात उतरलेले बघायला मिळाले. रोहित पवार यांनी काल बारामती तालुक्यातील ग्रामीण भागाचा दौरा केला होता.

“बारामती ही शरद पवारांचीच आहे हे लोकसभेला दाखवून दिले आहे. बारामती आजही शरद पवारांची आहे आणि उद्याही त्यांचीच राहील. आम्ही २३ तारखेला बारामतीत तुतारीचाच गुलाल उधळू. आम्ही आहोत त्याच ठिकाणी आहोत. आम्ही काय महायुतीसोबत गेलो नाहीत. जमेची बाजू आमची ही आहे की शरद पवार आमच्यासोबत आहेत. बारामतीत परिवर्तन झालेल आपल्याला पहायल मिळेल. पुन्हा एकदा लोकसभा लागली की काय अस वातावरण पाहायल मिळतंय”, असं रोहित पवार म्हणाले आहेत.