महाराष्ट्राच्या दोन माजी मुख्यमंत्र्यांचा पराभव

मुंबई : महाराष्ट्रातील दोन माजी मुख्यमंत्र्यांचा पराभव झाला आहे. काँग्रेस प्रदेशाध्यक्ष अशोक चव्हाण आणि काँग्रेसचे ज्येष्ठ नेते सुशीलकुमार शिंदे या दोन्ही माजी मुख्यमंत्र्यांचा आपापल्या मतदारसंघात पराभव झाला आहे. अशोक चव्हाण हे नांदेड लोकसभा मतदारसंघातून, तर सोलापूर लोकसभा मतदारसंघातून सुशीलकुमार शिंदे रिंगणात होते. दोन्ही ठिकाणी दोन्ही नेत्यांचा पराभव झाला.

नांदेडमधून अशोक चव्हाणांचा पराभव

अशोक चव्हाण हे काँग्रेसचे विद्यमान प्रदेशाध्यक्ष आहेत. तर महाराष्ट्राचं मुख्यमंत्रिपदही त्यांनी भूषवलं आहे. 2014 साली मोदीलाटेत काँग्रेसने ज्या दोन जागा जिंकल्या होत्या, त्यात नांदेडची एक जागा जिंकली होती. त्यानंतरही अशोक चव्हाणांनी नांदेड महापालिकेची निवडणूक जिंकली होती. मात्र, यंदा लोकसभा निवडणुकीत अशोक चव्हाणांना पराभवाला सामोरं जावं लागलं आहे. भाजपचे उमेदवार प्रताप पाटील चिखलीकर यांनी अशोक चव्हाण यांचा पराभव केला.

सोलापूरमधून सुशीलकुमार शिंदेंचा पराभव

सोलापूरमधील यंदाची लढत तिरंगी होती. काँग्रेसकडून माजी केंद्रीय गृहमंत्री आणि राज्याचे माजी मुख्यमंत्री सुशीलकुमार शिंदे मैदानात होते, तर भाजपकडून जयसिद्धेश्वर महाराज आणि वंचित बहुजन आघाडीकडून प्रकाश आंबेडकर रिंगणात होते. मात्र, जयसिद्धेश्वर महाराज हे सोलापुरातून विजयी झाले आहेत.

वंचित बहुजन आघाडीनेही सोलापुरात चांगली मतं मिळवली. त्यामुळे सुशीलकुमार शिंदेंना वंचित बहुजन आघाडीचा फटका बसल्याचे चित्र पाहायला मिळाले. प्रकाश आंबेडकर आणि सुशीलकुमार शिंदे हे दोघेही सोलापुरात पराभूत झालेत.