IND vs PAK: ‘बाबर ही वेळ निघून जाईल’, पाकिस्तानच्या पराभवानंतर खिल्ली उडवणारे भन्नाट मीम्स व्हायरल

Ind vs pak social Media

Image Credit source: Twitter

मुंबई: भारताने आशिया कप 2022 (Asia cup) स्पर्धेची शानदार सुरुवात केली आहे. पहिल्याच सामन्यात भारताने परंपरागत प्रतिस्पर्धी पाकिस्तानवर (IND vs PAK) दिमाखदार विजय मिळवला. भारताच्या या विजयी कामगिरीनंतर पाकिस्तानचा कॅप्टन बाबर आजमवर (Babar Azam) चहू बाजूंनी टीका होतेय. सोशल मीडियावर ट्रोलर्सनी बाबर आजमची अक्षरक्ष: वाट लावली आहे. बाबर आजमने विराट कोहली बद्दल एक टि्वट केलं होतं. त्याच टि्वटची नेटीझन्सनी बाबर आजमला आठवण करुन दिली आहे. बाबर आजमने मागच्या टी 20 वर्ल्ड कप मध्ये साखळी सामन्यात भारताविरुद्ध दमदार खेळ दाखवला होता. त्याच्याच बळावर पाकिस्तानने भारताविरुद्ध एकतर्फी विजय मिळवलेला. पण कालच्या सामन्यात बाबर आजमच काही चाललं नाही. जागतिक टी 20 क्रिकेट मधील हा नंबर 1 फलंदाज भारतासमोर फ्लॉप ठरला. त्याला विशेष चमक दाखवता आली नाही.

अचूक व्यूहरचना आखली

भारताचा प्रमुख गोलंदाज भुवनेश्वर कुमारने अचूक व्युहरचना आखून त्याला जाळ्यात अडकवलं. बाबर आजमने 9 चेंडूत फक्त 10 धावा केल्या. भुवनेश्वरच्या बाऊन्सवर बाबर फसला. त्याने मोठा फटका खेळण्याचा प्रयत्न केला. पण अर्शदीपने सोपा झेल घेतला.

पाकिस्तानी संघ सावरलाच नाही

त्या धक्क्यातून पाकिस्तानचा संघ शेवटपर्यंत सावरलाच नाही. पाकिस्तानची संपूर्ण टीम 147 धावांवर ऑलआऊट झाली. या धावसंख्येचा पाठलाग करताना भारताने अखेरच्या षटकात विजयावर शिक्कामोर्तब केलं.

पाकिस्तानला पराभव पचवता येत नाही

भारताकडून झालेला पराभव पाकिस्तानी क्रिकेटप्रेमींना सहजासहजी पचवता येत नाही. सोशल मीडियावर त्याचे पडसाद दिसून येत आहेत. बाबर आजम ट्रोलर्सच्या निशाण्यावर आहे. काही महिन्यांपूर्वी बाबर आजमने विराट कोहलीच्या समर्थनार्थ एक टि्वट केलं होतं. ही वेळ निघून जाईल, तू मजबूत रहा, नेटीझन्सनी बाबरला त्याच टि्वटची आठवण करुन दिली आहे. बाबर मजबूत रहा, ही वेळ निघून जाईल, असं एका टि्वटर युजरने म्हटलं आहे. बाबर आजमवर भन्नाट पोट धरुन हसवणारे मीम्स सोशल मीडियावर व्हायरल झाले आहेत.