T20 वर्ल्ड कप आधी ऑस्ट्रेलियन टीम मोठ्या अडचणीत सापडली आहे. अडचणीच कारण ऐकून तुम्ही सुद्धा हैराण व्हाल. ऑस्ट्रेलियाला T20 वर्ल्ड कप आधी पुढच्या 4 दिवसात 2 वॉर्मअप मॅच खेळायच्या आहेत. पण त्यांच्याकडे फक्त 9 खेळाडू आहेत. हे सर्व आयपीएलमुळे घडलय. मीडिया रिपोर्ट्सनुसार, ऑस्ट्रेलियन टीमला बुधवारी नामीबिया आणि शुक्रवारी वेस्ट इंडिज विरुद्ध अशा दोन प्रॅक्टिस मॅच खेळायच्या आहेत. त्यासाठी ऑस्ट्रेलियाकडे फक्त 9 प्लेयर्स उपलब्ध आहेत. त्यात कॅप्टन मिचेल मार्श पहिला वॉर्मअप सामना खेळणार नाहीत. अशावेळी ऑस्ट्रेलियाकडे 8 खेळाडू आहेत. आता त्यांना सपोर्ट स्टाफमधील सदस्यांना मैदानावर उतरवाव लागणार आहे. त्याचं वय जवळपास पन्नाशीच्या घरात आहे.
ऑस्ट्रेलियाचे अनेक खेळाडू आयपीएलमध्ये खेळत होते. अजूनपर्यंत ते वर्ल्ड कप टीममध्ये दाखल झालेले नाहीत. आयसीसीच्या नियमानुसार, सराव सामन्यात उतरणारे खेळाडू सुद्धा त्याच देशाचे असले पाहिजेत. ऑस्ट्रेलियाला आपल्या सपोर्ट स्टाफमधील हेड कोच एंड्रयू मॅकडॉनल्ड, ब्रॅड हॉज, जॉर्ज बेली आणि आंद्रे बोरोवेक यांना मैदानावर उतरवाव लागू शकतं. ब्रॅड हॉज यांचं वय 49 वर्ष आहे.
ऑस्ट्रेलियन बोर्डाची चूक
हे असं यासाठी घडतय कारण, आयपीएल खेळणाऱ्या पॅट कमिन्स, ट्रेविस हेड, मिचेल स्टार्क, कॅमरुन ग्रीन आणि ग्लेन मॅक्सवेल यांना आराम देण्यात आलाय. क्रिकेट ऑस्ट्रेलियाने आयपीएलच्या थकव्यामधून रिकव्हर होण्यासाठी या खेळाडूंना वेळ दिलाय. ऑस्ट्रेलियन बोर्डाचा हाच निर्णय आता टीमसाठी अडचणीचा ठरतोय. ऑस्ट्रेलियाचा कॅप्टन मिचेल मार्श सुद्धा फिट नसल्याची बातमी आहे. आयपीएल दरम्यान पायाला दुखापत झाली होती, तेव्हापासून तो अजूनपर्यंत मैदानावर उतरलेला नाही. प्रॅक्टिस मॅचमध्ये मार्शला उतरवून ऑस्ट्रेलियाला धोका पत्करायचा नाहीय.