Rishabh Pant : चुकीला माफी नाही, अखेर ऋषभ पंतवर IPL मध्ये मोठी कारवाई

Rishabh Pant

Image Credit source: PTI

IPL 2024 च्या सीजनमध्ये कालचा दिवस दिल्ली कॅपिटल्ससाठी खूपच खराब ठरला. शाहरुख खानच्या कोलकाता नाईट रायडर्स टीमने दिल्ली कॅपिटल्सवर 106 धावांनी मोठा विजय मिळवला. दिल्लीची टीम हरलीच, पण पराभवाच अंतर खूप असल्याने रनरेटमध्ये मोठा फटका बसला. कोलकाता नाईट रायडर्सने प्रथम फलंदाजी करताना 7 बाद 272 धावांचा डोंगर उभारला. प्रत्युत्तरात दिल्लीची टीम 166 रन्सवर ऑलआऊट झाली. KKR च्या सुनील नरेनने दिल्लीच्या गोलंदाजांना चांगलाच दणका दिला. त्याने 39 चेंडूत 85 धावा फटकावल्या. यात 7 फोर, 7 सिक्स होत्या. ऋषभ पंतने सुद्धा जबरदस्त बॅटिंग केली. पण त्याचा उपयोग झाला नाही. ऋषभने 25 चेंडूत 55 धावा फटकावल्या. यात 4 फोर, 5 सिक्स होते.

या पराभवासह दिल्ली कॅपिटल्सच्या टीमला आर्थिक आघाडीवर आणखी एक मोठा धक्का बसला. कोलकाता नाईट रायडर्स विरुद्ध स्लो ओव्हर रेट बद्दल दिल्ली कॅपिटल्सवर कारवाई करण्यात आली. दिल्ली कॅपिटल्सचा कॅप्टन ऋषभ पंतवर आयपीएलच्या शिस्तपालन समितीने कारवाई केली. चालू सीजनमध्ये दिल्लीने षटकांची गती धीमी राखण्याची ही दुसरी वेळ होती. ऋषभ पंतवर 24 लाख रुपये दंडाची कारवाई करण्यात आली. आयपीएलच्या आचारसंहितेनुसार, चुकांची पुनरावृत्ती केल्यास कठोर दंड ठोठावला जातो.

दिल्लीच्या प्लेयर्सवर काय कारवाई?

इमपॅक्ट प्लेयरसह दिल्ली कॅपिटल्सच्या प्लेइंग इलेव्हनमधील 11 खेळाडूंनाही दंड ठोठावण्यात आला. त्यांना प्रत्येकी 6 लाख रुपये किंवा मॅच फी मधील 25 टक्के रक्कम म्हणजे जी कुठली रक्कम कमी असेल, ती कापण्याचे आदेश देण्यात आले. केकेआरने काल यंदाच्या सीजनमधील दुसरी सर्वोच्च धावसंख्या उभारली. याआधी सनरायजर्स हैदराबादने मुंबई इंडियन्स विरुद्ध आयपीएलच्या इतिहासातील सर्वाधिक 277 धावा केल्या आहेत. 3 सामन्यात सलग 3 विजयांसह केकेआरची टीम पॉइंट्स टेबलमध्ये पहिल्या स्थानावर आहे.